MARKUSI 4 - Ha`bari Ndjema ya I Maore

Mufano wa mutru ayelao ha utsanya

¹ Suku, Insa aandrisa raha usomedza wangoni na iɓahari. Dunia nyengi ya wanadamu ingulidzana ha umuzingidzia ata andre apashia, aketsi hari mwa laka ɓaharini v̄ale. Na piya idunia ile ika tsandzaleni mwa yamaji.

² Akowasomedza trongo nyengi ha urumia mifano; ɓas, hari mwa yimisomo yahe yile, awaambia zini:

³ «Namuvulishiye! Mutsanyizi-maela alawa, akondrotsanya.

⁴ Utsanya yahe v̄ale, ɓaãdhwi ya maela yapuliha ndziani; nyunyi zija, ziyaɗyi.

⁵ Ɓaãdhwi yangina yapuliha hari mwa shiv̄andre ya tsi kawe kav̄waka trotro nyengi. Yaroso kamwe, mana kayaka yapara trotro kiasi.

⁶ Ata jua uhea yalo, livudzu mimea yale, yahumu, mana kayasisa mizi.

⁷ Ɓaãdhwi yangina yapuliha hari mwa malavu yendza miɓa. Malavu yale yahuwu, yaɓala pumu mimea yile, ata kayadza shitru.

⁸ Yangina iv̄o yapuliha hari mwa trotro ndjema, yameye, yatrendre, ata yadza mavuna: v̄wa yadza thalathini, yangina sitini, na yasalia miya.»

⁹ Amwesa arongoa: «Mutru aliona makio ya ukia, nakiye.»

iMana ata Insa akosomedza ha urumia mifano

¹⁰ Wakati Insa alawia idunia ile, watru waka wamuzingidzia v̄ale v̄umoja na kumi na waili wahe wale wamutafiti hari mwa yimifano yile.

¹¹ Ɓas, awaambia: «Wanyu ɗe mwadjaãliwa ujua isiri ya Utawalizi wa Mungu, ɓadi wao walio v̄ondze wajudziwazo piya ha mifano,

¹² ile, ‹wamoangalia, waangaliye, ɓila uona, na wamokia, wakiye, ɓadi wasuelewe, ile wasuzingise roho zawo ha Mungu, asuwaswamihi!› »

iMana ya umufano wa mutsanyizi-maela

¹³ V̄ale Insa awadzisa: «Wanyu kamusuelewa imana ya mufano unu? Ɓasi mutsoelewa jeje imana ya piya yimifano yasalia?

¹⁴ Mutsanyizi-maela ule utsanya urongozi wa Mungu.

¹⁵ Ɓaãdhwi ya watru uka mauri ɗe wakati yamaela yapulihao ndziani. Uyakia yawo, Shetwani uja, uwatolea urongozi ule waka watrilwawo.

¹⁶ Ɗe ha inamuna iyo raha, wasalia uka mauri ɗe wakati yamaela yapulihao hari mwa ziv̄andre za tsi kawe. Wamokia urongozi wa Mungu, wao uurenga ha furaha.

¹⁷ Ɓadi rangu kausisi mizi moni hawo, uwo uẽshi mwana muda tu, ɓadi wakati v̄ujao taãɓu au matreso ha siɓaɓu ya urongozi wa Mungu, wao ukwala kamwe.

¹⁸ Wasalia tsena uka mauri ɗe wakati maela yapulihao hari mwa miɓa. Watru wao ukia urongozi wa Mungu,

¹⁹ ɓadi mifikirisho ya lidunia lini na ushauku wa utadjirifu udanganyao, iv̄o na ngushauku zasalia za kula namuna, izo uɓala pumu urongozi wa Mungu, ata uwo kautoa mavuna.

²⁰ Amwesa v̄wa wasalia walio mauri ɗe wakati maela yapulihao hari mwa trotro ndjema. Wao ukia urongozi wa Mungu, uukuɓali, amwesa uwo utoa mavuna: v̄wa utoa thalathini, wangina sitini, na wasalia tsena miya.»

Mufano wa kombe la matra

²¹ Wakati ule Insa awaambia raha: «Hali mutru amov̄inga kombe la upatsa, waye ulitria utsini na garando, au vuvuni na shitrandra? Hali kalitrilwa hari mwa shihetsi-kombe?

²² Mana kav̄usi yadzama kaitsov̄enulwa, wala ya siri kaitsotolwa heuni.

²³ Mutru aliona makio ya ukia, nakiye.»

²⁴ Awaambia raha: «Namudzifahamishe na zizo muzikiao. iShiv̄imo muiv̄imiao ɗe mutsov̄imiwaoyo, tsena mutsoengedzewa.

²⁵ Mana mutru aliona, atsov̄olwa; ɓadi uwo kasina, ata alionayo, ne atsorengewayo.»

Mufano wa mbia imeao dzayo tu

²⁶ Insa arongoa tsena: «Utawalizi wa Mungu, uwo mauri ɗe wakati mutru atsanya maela shiv̄andreju mwa tsi.

²⁷ Amolala au amohima uku na mutsana, maela yale urosa na umea, ɓila waye ujua amba ha namuna jeje.

²⁸ iShiv̄andre ya tsi isudza wiyo-wiyo mavuna: raɓuzi troɓwa, iv̄o ke ɓitsi, amwesa ikwindzi yadzinya hari mwa like.

²⁹ Wakati zimbia zaiva, mutru ule utria ishombo yahe hazini, mana mavuna yaja.»

Mufano wa mbia titi rahana zititi

³⁰ Insa arongoa tsena: «Ha trini ɗe ritsofanisao Utawalizi wa Mungu? Ha mufano trini ɗe ritsoueledzao?

³¹ Uwo ufana na mbia titi rahana zititi. Mutru amoitaɓu shiv̄andreju mwa tsi, iyo uka titi rahana piya maela yalio duniani.

³² Ɓadi yamotaɓilwa, iyo uhua, ufanyiha ɓole rahana piya yimimea, utoa na marahi maɓole, ha namuna amba zinyunyi za hawani ushindra zifanye mahara yazo muvuliju hayo.»

³³ Ɗe ha mifano mengi mauri ɗe yini, ɗe Insa akowasomedza urongozi wa Mungu, ha ikiasi ya wale wakomuvulishia.

³⁴ Kakolagua na wao neka tsi ha mifano, ɓadi amoka weke na wao, akoeledza maswihaɓa yahe piya zile.

Insa asuɗaridza pev̄o kali

³⁵ Mahariɓi ya isuku ile kamwe, Insa aambia maswihaɓa yahe: «Narishiye nyambo ya lidzia.»

³⁶ Ɓas, ɓaanda warudisa idunia ile, maswihaɓa yahe yamuv̄ingi hari mwa djahazi lile aka. V̄uka tsena madjahazi yangina v̄umoja na waye.

³⁷ Sa ile v̄uhimi pev̄o ɓole; maluja yakongia moni na lidjahazi ata madza lakojaya.

³⁸ Insa aka alala hari mwa mutsao kutru ya nyuma ya lidjahazi. Maswihaɓa yahe yamumidzi, yamuambia: «Fundi, kwashanga amba risondroangamia?»

³⁹ Insa amaruha, alagulia pev̄o ile, amwesa aambia iɓahari: «Ɗaria, utruliye!» Ɓas, ipev̄o izia, na shiwari ilala.

⁴⁰ Amwesa awaambia: «Manatrini muriao namuna iyo? Ha namuna jeje ata kamusina uaminifu?»

⁴¹ Ɓasi v̄ale waremwa na faza ɓole, ata wakoambiana wao na wao: «Unu mutru trini ata pev̄o na ɓahari zimutuĩo?»