MARKUSI 3 - Ha`bari Ndjema ya I Maore

Insa asuzihira mutru afa umuhono

¹ Insa angia raha moni na iNyumba ya Uswali, na moni v̄ale v̄uka mutru aka afa umuhono.

² Watru wakomutunda Insa ha uzuri ile waone neka atsozihira mutru ule iSuku ya Uv̄umuzi|Suku ya Uv̄umuzi, mana wakotsaha wapare ndzia ya umusingidzia.

³ Ɓas, Insa aambia mutru ule afa umuhono: «Hima hari v̄ale.»

⁴ Amwesa awaambia: «Hali iruhusiwa Suku ya Uv̄umuzi ufanya ndjema, au mbi? Uhuyi roho, au uiangamidza?» Ɓadi waɓuriha.

⁵ Ɓas, Insa av̄eleha matso yahe, awaangalia ha utukivu, akana huzuni ɓole ha siɓaɓu ya uhali wa ziroho zawo. Aambia mutru ule: «Ondzoa muhono waho.» Auondzoa, na muhono wahe urudi munono.

⁶ Watru wa ishama ya Mafarisayo walawa v̄ondze, wandre wav̄ana fikira na watru wa ishama ya Hirudu heli watsoshindrao wamuangamidze Insa.

Dunia nyengi isumujilia Insa

⁷ Insa v̄umoja na maswihaɓa yahe wadzivuru wangoni na iɓahari. Dunia ya watru iwaɗungu ulawa Galilaya na Yudeya,

⁸ tsena Yerusalemu, Idumeya, nyambo ya umuro wa Jurdani, na yamaɓavu ya Tiro na Sidoni. Dunia nyengi ya watru ɓaanda wakokia trongo Insa akozifanya, wamujilia.

⁹ Ɓas, aambia maswihaɓa yahe yamutayarishiye laka ha siɓaɓu ya idunia ile, pare watru wasumusinye.

¹⁰ Mana ha iv̄o akozihira watru wengi, piya wao wakana maradhi wakosukumana ile wapare wamuɓambe.

¹¹ Madjini ya peu wakati yakomuona, yakwendra mindru tsini mbeli zahe, na ushelemedza zini: «Wawe ɗe uMwana wa Mungu!»

¹² Ɓadi Insa ayafahamisha ha kusudi yasumutrangaze.

Insa asutsahua Mav̄ingizi-Risala kumi na waili

¹³ Amwesa Insa ahea uju na umulima, ahiri wale akowatsaha, na wao waja wamupara.

¹⁴ Atsahua kumi na waili wake na waye, ile awav̄elehe wajudze iHaɓari Ndjema,

¹⁵ tsena wake na yezi ya utoa mazetwani.

¹⁶ Na wao ɗe wanu: Simoni amuhira tsena Monye,

¹⁷ Yakoɓu mwana wa Zuɓudu, na Yuhani, mwananyahe wa Yakoɓu, walio amba awav̄a lidzina la Ɓoanerge (mana yalo, «wana wa maguguma»),

¹⁸ Andreasa, Filiɓusa, Ɓartolomayo, Matiyo, Tomasi, Yakoɓu mwana wa Halifa, Tadu, Simoni Zeloti,

¹⁹ na Yudasi Iskarioti, ule atsomuv̄iriao nyuma.

Misomo ya Insa yahusu Shetwani

²⁰ Amwesa Insa aregea ɗagoni, na dunia ya watru ingulidzana raha, ata waye na wanyahe kawakopara waɗya.

²¹ Wakati wadjemazahe wa Insa wapara haɓari zile, waja wamurenge, mana wakorongoa amba alatsiha fikira.

²² Na Mafundi ya Sharia yaka yaja ulawa Yerusalemu, yakorongoa: «Ana Ɓelzeɓuli! Ha ushindzi wa umuɓole wa yamazetwani ɗe atoao mazetwani.»

²³ Ɓas, Insa awahiri, amwesa awaambia ha urumia mifano: «Ha namuna jeje Shetwani ashindrao atowe Shetwani?

²⁴ Neka ufalume una umani muraɓani, ufalume uwo kauẽshi.

²⁵ Na neka udjama usuwana wao na wao, udjama uwo kauẽshi.

²⁶ Neka Shetwani asuwana kinyume na iwaye yahe, waye upuha ɓari, kashindri uẽshi, ɓadi umwiso wahe upara.

²⁷ Wala kav̄u ata mutru ashindrao angiye moni na nyumba ya mutru mwendza nguvu, arav̄a mali zahe, neka kafunga raɓuzi mwendza nguvu ule; v̄av̄o ɗe atsoshindrao amurav̄e inyumba.

²⁸ Nisumuambiani ha kweli, wanadamu watsoswamihiwa piya madhambi yawo, na kula luha ya ukufuru.

²⁹ Ɓadi mutru yotsi atsokufuruo iRoho Ndzitwaharifu, katsopara swamaha ata idahari; atriki djukuma la dhambi la daima.»

³⁰ Insa awaambia namuna ile mana wakorongoa: «Ana djini la peu.»

Wadjemazahe wa Insa ɗe wav̄i?

³¹ Sa ile mayahe na wananyahe wawaswili, wahimi v̄ondze, walagidza amba ahirwe.

³² Na dunia ya watru ika iketsi v̄ale ha umuzingidzia. Ɓas, aambiwa: «Tsawo mayaho na wananyaho wa v̄ondze oho, wasuhutsaha.»

³³ Ɓadi awadjiɓu: «Mayangu ɗe uv̄i? Wananyangu ɗe wav̄i?»

³⁴ Ɓasi v̄ale aangalia watru wale waka waketsi wamuzingidzia, amwesa arongoa: «Tsawanu mayangu na wananyangu!

³⁵ Mana yotsi afanyao yamav̄endzeleo ya Mungu, uwo ɗe mwananyangu mutruɓaɓa, mutrumama, tsena ɗe mayangu.»