MARKUSI 16 - Ha`bari Ndjema ya I Maore

Muregezeo hayi wa Insa

¹ Ɓaanda iSuku ya Uv̄umuzi|Suku ya Uv̄umuzi yav̄ira, Mariama wa shi Magdala, Mariama mayahe wa Yakoɓu, v̄umoja na Salome wanunua matra manukatro, ile wandre wav̄ahe umwili wa Insa.

² Asuɓuhi ya isuku ya handra ya umufumo, jua uhea yalo, wandre kaɓurini hule.

³ Wakoambiana: «Mbani ɗe atsoriv̄ingirisiao liɓwe lilio mulongoju mwa likaɓuri?»

⁴ Ɓadi udzua yawo yamatso, waono amba liɓwe lile laka ɓole halisi, liv̄ingirisiwa ɓavuni.

⁵ Ɓaanda wangia moni na likaɓuri, waono mwanahirimu shaɓaɓi aketsi uv̄andre wa hume, apindra nguo ndjeu. Sa ile waremwa na ushangavu.

⁶ Ɓadi awaambia: «Musushange! Musumuzunguha Insa wa Nazareti, aka aremwa mizumari hari mwa muri wa pawa. Aregezewa hayi, kav̄o tsena v̄anu. Namuangaliye, v̄anu ɗe v̄ahanu aka aladzwa.

⁷ V̄av̄o namwendre mwaambiye maswihaɓa yahe, na Monye, amba asumutranguliani ha uendra Galilaya. Oho ɗe v̄ahali mutsomuonao, mauri ɗe iheli amuambiani.»

⁸ Sa ile walawa kaɓurini v̄ale, watrala, wakodridrima ha ushangavu. Kawaambia trongo ata mutru, mana wakoria. [

Insa amuv̄enushia Mariama wa shi Magdala

⁹ Ɓaanda Insa aregea hayi asuɓuhi ya isuku ya handra ya umufumo, amuv̄enushia kadimu Mariama wa shi Magdala, ule aka amutolea mazetwani saɓa.

¹⁰ Mutrumama ule andre ajudza ihaɓari ile ha wale waka na Insa, walio amba waka hari mwa usikitifu na shililo.

¹¹ Iv̄o wakia amba Insa a hayi tsena amuono, kawamuamini.

Insa av̄enushia maswihaɓa maili

¹² Ɓaanda ya v̄ale, av̄enushia ha sura yangina waili hari mwa maswihaɓa yahe waka ndziani, wakwendra malavuni.

¹³ Ɓas, waregea wajudza ha uwasalia, ɓadi wao tsena kawaamini.

Insa av̄enushia maswihaɓa kumi na moja yahe

¹⁴ Mwisoni av̄enushia kumi na moja wale wakati waka mezaju wakoɗya. Awarudi iv̄o kawaamini, na ha uangavu wa roho wawo, mana kawaamini wale wamuona amba aregezewa hayi.

¹⁵ Amwesa awaambia: «Namwendre hari mwa lidunia piya, mujudze iHaɓari Ndjema ha kula shiumbe mwanadamu.

¹⁶ Uwo atsoaminio amwesa atsoɓaĩshiwao|uɓaĩsha, atsohuyiwa, ɓadi uwo katsoamini, atsohukumulwa.

¹⁷ Tsizini ziãlama za midjuza zitsoonehanao ha wao watsoaminio: Ha lidzina langu, watsotoa mazetwani, watsolagua luha pia watsoshukidziwaozo;

¹⁸ watsosika nyoha, na neka wano sumu, kalitsowadhuru ata hata; watsokadza yimihono wawaɗe, na wao watsoangala.»

Insa asuhedzewa pev̄oni

¹⁹ Ɓas, Raɓi Insa|Raɓi ɓaanda ahisa ulagua na wao, ahedzewa pev̄oni, aketsi humeni ha Mungu.

²⁰ Na wao walawa wajudze iHaɓari Ndjema kula v̄ahanu. Raɓi akofanya hazi v̄umoja na wao, na udhiɓitisha marongozi yao ha ziãlama za midjuza zakoyaɗunga.]