MARKUSI 13 - Ha`bari Ndjema ya I Maore

Insa asujudza mukomoleo wa iNyumba Ndzitwaharifu

¹ Wakati Insa akolawa hari mwa iNyumba Ndzitwaharifu, moja hari mwa yamaswihaɓa yahe amuambia: «Fundi, ngalia namuna mawe yanu yalio mazuri, na yimiundrio namuna yilio miɓole!»

² Insa amudjiɓu: «Usuona miundrio miɓole yiyo? Kav̄utsoɓaki ata ɓwe moja uju na munyahe amba kalapulisiwa.»

Taãɓu na matreso yajao meso

³ Insa aka aketsi hari mwa uMulima wa Mizaituni|Mulima wa Mizaituni maswa na iNyumba Ndzitwaharifu, ɗe Monye, Yakoɓu, Yuhani na Andreasa waja wamupara weke, wamudzisa suala lini:

⁴ «Riambiye, trongo izo zitsohidjiri lini? Na ãlama trini ɗe itsoonesao amba piya trongo zini zisondrotsimidziha?»

⁵ Sa ile Insa aandrisa uwaambia: «Namudzifahamishe v̄wasuke ata mutru amudanganyani.

⁶ Mana wengi watsodziv̄eleha ha lidzina langu, na urongoa amba: ‹Ɗe wami!›, tsena watsodanganya watru wengi.

⁷ Mwamokia kondro na keme za kondro, musushange. Izo zilazimu zihidjiri, ɓadi raha uwo kautsoka amba ɗe umwiso.

⁸ Watru wa tsi moja watsohima kinyume na tsi yangina, na ufalume kinyume na ufalume munyahe. V̄utsoka midridrimio ya shiv̄andre ya tsi hari mwa mikaɓala na mikaɓala, tsena v̄utsoka madzaha ya ndza. Zizo zitsoka ɗe umwandro wa yamatungu ya udzazi.

⁹ Ɓadi wanyu, namudzifahamishe nafusi zanyu. Mana watru watsomuv̄elehani mbeli za mahakama, na uɓuɓulwa zengwe moni na ziNyumba za Uswali. Mutsov̄elehwa mbeli za mawakala na mafalume ha siɓaɓu ya wami, ile muv̄inge ushahidifu wanyu mbeli zawo.

¹⁰ Ilazimu raɓuzi iHaɓari Ndjema ijudziwe ha piya zinishani.

¹¹ Mwamov̄ingwa amba mwahukumulwe, mwasushange rangu kaɓula na itrongo mutsoirongoao, ɓadi namurongowe itrongo mutsov̄olwaoyo wakati uwo kamwe. Mana wanyu tsi ɗe mutsorongoao, ɓadi ɗe iRoho Ndzitwaharifu.

¹² Mwananya atsomuv̄eleha mwananyahe andre aulawe, na ɓaɓa mwana wahe; wana watsohima kinyume na wadzaɗe wawo, watsotsonga waulawe.

¹³ Mutsoengwa na watru piya ha siɓaɓu ya lidzina langu. Ɓadi mutru atsostahamilio ata umwiso, atsohuyiwa.»

Misomo ya ulaãnifu unagisio

¹⁴ «Wakati mutsoonao uMuangamifu Movu v̄ahanu kalazimu aka, (mutru asomao naelewe ha uzuri), v̄av̄o, wao watsokao Yudeya, nawatrale wandre milimani.

¹⁵ Na uwo atsokao ɓanaraju, asushuke amba asungia arenge shitru moni na inyumba yahe.

¹⁶ Na uwo atsokao shambani hahe, asurudi nyuma amba arenge kandzu yahe.

¹⁷ Maondo ha watruwashe watsokao na hamili, na wao watsohamusao hari mwa suku zizo!

¹⁸ Namufanye mamilio ile trongo zizo zasuhidjiri wakati wa ɓaridi.

¹⁹ Mana hari mwa suku zizo, v̄utsoka maondo madziro rahana piya yao yaonehana rangu umwandro Mungu aumba lidunia, ata ileo ini, wala kav̄utsoka ata idahari mauri ɗe yao.

²⁰ Tsena, na djeli Mola kaka av̄ungudza suku zizo, kav̄u ata mutru atsohuyiwao; ɓadi ha siɓaɓu ya uwatru awatsahua, av̄ungudza ihisaɓu ya suku zizo.

²¹ Ɓasi neka mutru amuambiani: ‹Namuangaliye, Kristi tsunu!› au: ‹Namuangaliye, tsule!› musumuamini.

²² Mana v̄utsohima makristi ya trambo, tsena v̄utsohima watru watsodzifanyao amba washukidziwa marongozi; watsofanya ãlama za ãdjaɓu na midjuza, ile, neka trongo mukinishiha, wadanganye wale watsahuliwa na Mungu.

²³ Ɓasi namudzifahamishe! Tsimujudzani piya zitrongo rangu kaɓula.»

Misomo yahusu umujilio wa uMwana wa Mwanadamu

²⁴ «Ɓadi hari mwa zisuku zizo, ɓaanda ya yamatreso yao, ‹lijua litsongia shidza, na umwezi kautsotoa heu yawo tsena,

²⁵ zinyora zitsopuliha ulawa mbinguni, na zingushindzi zilio hari mwa zimbingu zitsogudzusiwa.›

²⁶ Ɓasi v̄av̄o iv̄o watru watsoona uMwana wa Mwanadamu|Mwana wa Mwanadamu iv̄o ajao hari mwa yamavingu, v̄umoja na ushindzi muɓole na utukufu.

²⁷ Ɓas, atsov̄eleha zimalayika hari mwa zifalaki nne za ishiv̄andre ya tsi ha ungulidza wao watsahuliwa na Mungu, ulawa rangu mwandro wa ishiv̄andre ya tsi, ata umwiso wa zimbingu.»

Musomo warengwa hari mwa umufigiye

²⁸ «Namurenge musomo hari mwa mufano unu ulawanao na umufigiye|mufigiye: marahi yahe yamofanyishiha mangu, na mani yahe yamotsanga, wanyu ujua amba kashikazi ya kariɓu.

²⁹ Ɗe ha inamuna iyo wajau, mwamoona amba trongo izo zisuhidjiri, namujuwe amba uMwana wa Mwanadamu a kariɓu, mulongoju kamwe.

³⁰ Nisumuambiani ha kweli, lidunia la leo lini kalitsov̄ira kaɓula ya trongo zini piya uhidjiri.

³¹ uWingu na ishiv̄andre ya tsi zitsov̄ira, ɓadi marongozi yangu kayatsov̄ira ata idahari.»

Mungu tu ɗe ajuao isuku ya umujilio wa uMwana wa Mwanadamu

³² «Ɓadi yahusu isuku au isa, kav̄usi ata mutru aijuao, tsi ɗe zimalayika zilio pev̄oni, wala tsi ɗe uMwana, ɓadi ɗe Ɓaɓa weke.

³³ Namudzifahamishe, namuke hashiri [na ufanya mamilio], mana kamusujua lini ɗe wakati uwo utsojao.

³⁴ Itsoka mauri mufano wa mutru amolawa hahe andrao musafara, udhwaminisha warumizi wahe ha uv̄a kula moja ihazi yahe yamulazimu. Tsena, waye uãmurisha umugogezi-mulongo ake hashiri.

³⁵ Ɓasi namuke hashiri, mana kamusujua wakati monyewe inyumba atsoregeao, kamuji neka atsoja mahariɓi, au hari-hari ya uku, au mahukuyi yamoyeha, au uku wamosha,

³⁶ ile amoja wakati kamwakodzilindrilia, asumupareni amba mulala.

³⁷ Zizo nimuambiaoni v̄anu, nisuambia piya watru: ‹Namuke hashiri!› »