MAKOLOSIYA 3 - Ha`bari Ndjema ya I Maore

Muendreleo muv̄ia hari mwa uv̄umoja na Insa

¹ Ɓasi ɓaanda mwaregezewa hayi v̄umoja na Kristi, namutsahe trongo za shi uju, v̄ahanu Kristi aketsi humeni ha Mungu.

² Namufikiri izo zilio uju, ɓadi tsi zilio shiv̄andreju mwa tsi.

³ Mana wanyu mufu, na uhayati wanyu utsitsiha v̄umoja na Kristi ha Mungu.

⁴ Wakati Kristi alio uhayati wanyu atsov̄enuhao, v̄av̄o wanyu wajau mutsov̄enuha v̄umoja na waye hari mwa utukufu.

⁵ Ɓasi namuule zitrongo za itaɓia ya shiduniani mulionayo, mauri: uzani, utshafi, taɓia za shahawa, ngushauku mbovu na uv̄endza-upara, ilio sawa na uãɓudu masanamwe.

⁶ Ɗe ha siɓaɓu ya izo ɗe ihadhaɓu ya Mungu ijiliao wao kawasumutuĩ.

⁷ Yao ɗe maendreleo mwakanayo nyuma hule, wakati mwakoẽshi hari mwa trongo zile.

⁸ Ɓadi av̄asa, wanyu wajau, namulatse piya zini: hasera, utukifu, upeu, uruhana, na marongozi maovu yalawao hanyoni.

⁹ Musulaɓane wanyu na wanyu, rangu mwadzitsua utru wa hale na zitrendro zawo,

¹⁰ mwadzipindrisa utru muv̄ia ulio amba usendra na ufanyiha muv̄ia hari mwa ujuzi ulinganao na umufano wa Uwo auumba.

¹¹ V̄anu kav̄u Mugiriki ɓila Muyahudi, mutahiriwa|utahiri au katahiriwa, mushendzi ɓila mumatsaha, murumwa ɓila munafasina, ɓadi Kristi ɗe alio piya, tsena ha piya.

¹² Ɓasi v̄av̄o wanyu mwatsahulwa na Mungu, amba watwaharifu amma wav̄endzewa, namudzipindrise mo wa poreho, uwema, uwekevu, umakini, na suɓira.

¹³ Namustahamiliane wanyu na wanyu, tsena muswamihiane, neka amba v̄wa aliona trongo kinyume na munyahe. Mauri ɗe iheli Mola amuswamihini, namufanye namuna iyo wajau.

¹⁴ Na iɓole zaidi ya piya trongo izo, ɗe wanyu udzipindrisa iuv̄endza, ilio ɗe umutsanganiso mukamilifu.

¹⁵ Utrulivu wa Kristi ulio amba muhiriwa mukanewo ile mufanyihe mwili moja, nautawale rohoni hanyu. Namuke wendza himida.

¹⁶ V̄av̄o urongozi wa Kristi nauke moni hanyu ha piya utadjirifu wawo; namusomedzane na ufahamishana ha piya zihikima. Namuhedze madjimbo, ngutende za sifa, na himbo za shiRoho. Namumuhimbiye Mungu v̄umoja na himida ha piya umo wanyu.

¹⁷ Yotsi mufanyao, neka ha marongozi au shitrendro, namuifanye ha lidzina la Raɓi Insa, na ha ndzia yahe, mumushukuriye Mungu amma Ɓaɓa.

Maendreleo moni mwa zingudjama ziaminio

¹⁸ Watruwashe, namudzihetsi watuĩvu ha waume wanyu, mauri ɗe inamuna yalazimu hari mwa uv̄umoja na Raɓi.

¹⁹ Watruwaume, kula mutru nav̄endze mutrumushe wahe, wala mwasuke wahali na wao.

²⁰ Wanyu wana, namutuĩ wadzaɗe wanyu hari mwa piya, mana iyo umujiv̄ia Raɓi.

²¹ Wanyu v̄anyu maɓaɓa, musutukize wana wanyu, pare wasuje wapuha ɓari.

Yahusu warumwa na warumisa

²² Wanyu warumwa, namutuĩ warumisa wa shiulemenguni wanyu hari mwa piya, tsi tu amba matsoni hawo mauri musutsaha mujiv̄idze wanadamu, ɓadi ha umo warahara, na ha umuria Raɓi.

²³ Yotsi mufanyao, namuifanye ha piya umo wanyu, mauri musumufanyiayo Raɓi, ɓadi tsi wanadamu,

²⁴ ha wanyu ujua amba mutsopara ha Mola umwaratha ha zithawaɓu zanyu. Raɓi Kristi ɗe mumurumishiao.

²⁵ Mana monyewe udhulumu, atsoliv̄wa ha udhuluma wahe; kav̄usi utsahulivu.