MAKOLOSIYA 2 - Ha`bari Ndjema ya I Maore

¹ Kweli amba nisutsaha mujuwe uɓole jeje ikondro niiv̄ingao ha tanafu yanyu, ya watru wa shi Laodiseya, na piya wao kawaparoniona isura,

² ile roho zawo zingiye ɓari, wafunganisihe hari mwa uv̄endza, tsena wakane utadjirifu mukamilifu wa uelewa ha namuna yaswafishiha, pare wajuwe iãdjaɓu ya Mungu, ne ɗe Kristi,

³ alio amba haheju ɗe v̄wadzama piya zidafine za ihikima na za ujuzi.

⁴ Nisurongoa zizo pare v̄usuke mutru amudanganyani ha marongozi yendza ladha.

⁵ Mana neka kweli amba tsisi na wanyu ha mwili, ne tsa v̄umoja na wanyu ha roho, tsena nisufurahi iv̄o nionao itaratiɓu ndzuzuri ilio hari mwanyu na uhodari wa uaminifu wanyu ha Kristi.

Uhayati mukamilifu hari mwa uv̄umoja na Kristi

⁶ Ɓasi ha izo, ɓaanda mwamukuɓali Kristi-Insa amba Raɓi, namuẽshi hari mwa uv̄umoja na waye.

⁷ Namudzisise mizi na udziundra hari mwa uv̄umoja na waye, namudzihodarishe hari mwa uaminifu ha ulingana na iyo mwasomedzewa, na uzidishiha hari mwa himida.

⁸ Namufahamu amba v̄wasuke mutru amufanyiani shambwe ha ndzia ya misomo ya ziãkili za shiuɓinadamu ndzidangamanyifu, tsena truv̄u, yilawanao na zimila za shiuɓinadamu, na zitru za ãswili za ulemengu, ɓadi tsi ha Kristi.

⁹ Mana haheju ɗe piya ukamilifu wa shiungu ulio v̄av̄o shimwili,

¹⁰ na wanyu mukamilishiha hari mwa uv̄umoja na waye, alio ɗe iShitswa wa kula utawalizi na kula yezi.

¹¹ Hari mwa uv̄umoja na waye raha, wanyu mutahiriwa|utahiri, wala tsi matahiri yafanyiwa ha mihono ya wanadamu, ɓadi ɗe mutru utolewa ushindzi wa itaɓia ya shiuɓinadamu; na yao ɗe matahiri ya shiKristi.

¹² Mudzihwa v̄umoja na waye ha umuɓaĩsho|uɓaĩsha, na hari mwa uv̄umoja na waye, muregezewa hayi na waye raha ha uaminifu na ushindzi wa Mungu, alio amba amuregeza hayi ulawa ha uwafu.

¹³ Na wanyu mwaka mwafa ha siɓaɓu ya mahosa yanyu na iv̄o kamwaka mwatahiriwa shimwili, Mungu amuẽshisani v̄umoja na Kristi ha uriswamihi piya mahosa yatru;

¹⁴ azimi hatwi likatiɓa laka laangihwa kinyume na wasi, lilio amba masharutwi yalo yakorisingidzia; alitoa ha ulirema mizumari hari mwa umuri wa pawa|muri wa pawa.

¹⁵ Atsua ushindzi wa zingutawalizi na ziyezi, azifedhehisha ha hadhwira ha uziv̄inga hari mwa umwendro wa ushindrifu wa umuri wa pawa wahe.

¹⁶ Ɓasi ha izo, v̄usuke mutru yotsi amunamuani hari mwa iyo muɗyao au munwao, yahusu musherehio, mwezi muv̄ia, au tsena suku za Uv̄umuzi.

¹⁷ Izo piya shivuli ya izo zijao, ɓadi iswafi ɗe Kristi.

¹⁸ Musudzilishe mwarav̄wa ushindrifu na mutru yotsi adzijiv̄idzao ha uwekevu wa trambo na ĩɓada ya malayika; mutru namuna iyo udzihetsi hari mwa izo aonao, na udziɓua tu ɓure-ɓure ha fikira za shiuɓinadamu zahe.

¹⁹ Na waye kasudzifunga na ishitswa ilio amba ha wiyo, piya umwili wafungamaniha ha uzuri ha zifungo za mwili na yimizi yawo, uhua ha muhulio ulawao ha Mungu.

²⁰ Neka amba wanyu mufu v̄umoja na Kristi hari mwa yahusu zitru za ãswili za ulemengu, ɓasi manatrini muẽshio shi watru wa lidunia lini ha udzilisha muv̄ingwe na masharutwi yalo? Amba:

²¹ «Mususike», «musutriye hanyoni», «musuɓambe».

²² Na izo piya zitru muola zamohisa urumilwa. Izo ãmuri na misomo ya shiuɓinadamu,

²³ kweli ziliona sura za hikima: mufano wa ĩɓada, uwekevu, na udzionda umwili; ɓadi kazina faida itsokao yotsi neka tsi ɗe ujiv̄idza ushiuɓinadamu.