MAKOLOSIYA 1 - Ha`bari Ndjema ya I Maore

¹ Wami Ɓaulusu, Muv̄ingizi-Risala wa Kristi-Insa ha yamav̄endzeleo ya Mungu, v̄umoja na umwananya wa shi uaminifu Timutausu,

² risuangishia uwatwaharifu amma wananya wa shi uaminifu wa Kolosiya walio hari mwa uv̄umoja na Kristi: Rehema na utrulivu walawa ha Ɓaɓatru Mungu nazimuendreleyeni.

Ɓaulusu asuhimidia Mungu

³ Risumushukuria Mungu amma Ɓaɓa wa Raɓi watru Insa-Kristi, tsena risumufanyiani mamilio ɓila uzia,

⁴ rangu rakia uaminifu wanyu na Kristi-Insa na uv̄endza mulionawo na piya watwaharifu.

⁵ Iyo ha siɓaɓu ya itama mwalishiwayo pev̄oni, ilio amba muikia nyuma oho ha urongozi wa ikweli, ne ɗe iIndjili.

⁶ Indjili ini imujiliani, mauri ɗe inamuna iv̄ingao mavuna na urandra hari mwa ulemengu kamili. Ɗe inamuna iyo wajau hari mwanyu, rangu isuku mwakia tsena mwajua urehema wa Mungu ha ukweli wawo.

⁷ Muupara ha Eɓafrasu, munyatru wa hazi muv̄endzewa, alio murumishi muaminifu wa Kristi ha tanafu yanyu,

⁸ tsena arijudza uv̄endza mulionawo walawa hari mwa uv̄umoja na iRoho.

Mamilio ha wananya wa shi uaminifu wa Kolosiya

⁹ Iyo ɗe imana ata wasi wajau, rangu isuku raikia, karisuzia umumiliani Mungu na utsaha amba mujadziwe ujuzi wa mav̄endzeleo yahe, ha kula hikima na ushindzi wa uelewa shiroho,

¹⁰ ile mudziv̄inge ha namuna yamustahiki Raɓi, ha umujiv̄ia hari mwa piya, mukane mavuna ya kula shitrendro ndjema, tsena muhuwe hari mwa ujuzi wa Mungu;

¹¹ amwesa raha muhodarishihe hari mwa piya zitrongo, ha inguvu ndzitukufu yahe, ile mukane ustahamilifu na suɓira hari mwa piya, tsena ha furaha.

¹² Namumuhimidiye Ɓaɓatru Mungu amushindrisani ustahiki upara fungu hari mwa umwaratha wa watwaharifu hari mwa iheu.

¹³ Arikomboa na yezi ya shidza, ile ariv̄inge hari mwa utawalizi wa uMwana wahe muv̄endzewa,

¹⁴ alio amba haheju rina ukombofu, ne ɗe umuswamaha wa yamadhambi.

Kristi ɗe Muhu wa piya

¹⁵ Waye ɗe umufano uonehanao wa Mungu kaonehana, mudzalwa wa handra wa kula yaumbwa.

¹⁶ Mana ha iwaye ɗe piya zaumbwa, rangu mbinguni ata shiv̄andreju mwa tsi, zionehanao na izo kazionehana, neka zingufalume, au izo ziliona uhu, au zingutawalizi, au na ziyezi. Piya ziumbwa ha ndzia yahe na ha siɓaɓu waye.

¹⁷ Waye ɗe kaɓula ya piya, na haheju ɗe piya zisikao.

¹⁸ Waye ɗe Shitswa wa umwili, ilio iDjama Ndziwaminifu; waye ɗe umwandro, umudzalwa wa handra alawa ha uwafu, ile hari mwa piya ake ɗe wa handra.

¹⁹ Mana Mungu av̄endze amba piya ukamilifu wahe uke moni na uMwana,

²⁰ tsena ha waye aparanise piya na iwaye yahe, rangu za shiv̄andreju mwa tsi, ata za mbinguni, ha utria amani ha idamu yahe yatriha hari mwa umuri wa pawa|muri wa pawa.

²¹ Na wanyu mulio amba nyumeni hule muka mutengeha, tsena muka maãduwi ha zifikira zanyu na zitrendrwa mbovu zanyu,

²² av̄asa amuparanisani ha ufa wa umwili wa shiuɓinadamu wahe, ile amuyeleheni mbeli zahe amba watwaharifu, ɓila kosa wala tuhuma.

²³ Iyo neka musuɓaki hari mwa uaminifu, muketsi, tsena musiki hodari, ɓila udzilisha muv̄ingwe mbali na itama ya iIndjili mwaikia, ilio amba ijudziwa kula shiumbe utsini na uwingu, na wami Ɓaulusu nafanyiha murumishi wayo.

Urumishi wa Ɓaulusu hari mwa iDjama Ndziwaminifu

²⁴ Av̄asav̄anu nisufurahi na yamaondo niyaonao ha tanafu yanyu, tsena nisutsimidza ha umwili wangu yamatreso yamukosea Kristi ha tanafu ya umwili wahe, ne ɗe iDjama Ndziwaminifu.

²⁵ Tsifanyiha murumishi wayo ulawana na lidjukuma Mungu anidhwaminisha ha tanafu yanyu, amba nitsimidze utekeleza urongozi wa Mungu,

²⁶ ne ɗe iãdjaɓu yaka yadzamisiwa hari mwa yimida yav̄ira na ha zinaswila, ɓadi av̄asa yav̄enulwa ha watwaharifu wahe.

²⁷ Mungu atsaha awajudze utadjirifu mutukufu wa iãdjaɓu ini hari mwa zinishani kazimuji, amba: Kristi moni hanyu, ɗe itama ya utukufu.

²⁸ Waye uwo ɗe rijudzao, ha ufahamisha kula shiumbe mwanadamu na usomedza kula shiumbe mwanadamu ha piya zihikima, ile riv̄inge kula mutru akamilishihe hari mwa uv̄umoja na Kristi.

²⁹ Ɗe ha siɓaɓu ya iyo ɗe nidzirumao ha usongefu, ha zinguvu zahe zirendrao moni hangu v̄umoja na ushindzi.