MAHEƁRANIYA 8 - Ha`bari Ndjema ya I Maore

Insa ɗe uMutolezi-Masadaka Muɓole wa umukataɓa muv̄ia

¹ iMahususu ya izo rarongoa ɗe ini: Rina Mutolezi-Masadaka Muɓole|Muɓole wa Matolezi-Masadaka namuna iyo, aketsi humeni mwa ishiri ya yezi ya Monyewe Ufalume pev̄oni.

² Waye a murumishi hari mwa liPa Dzitwaharifu rahana Dzitwaharifu|Pa Dzitwaharifu rahana Dzitwaharifu, amma ɗe iNyumba ya Haima|Nyumba Ndzitwaharifu ya Haima ya kweli yamidzwa na Mola, ɓadi tsi na mwanadamu.

³ Kula Mutolezi-Masadaka Muɓole uhetsiwa atoleye masadaka na makafara. Iyo ɗe imana ata yalazimu amba waye wajau akane ya utoa.

⁴ Ne ɗe na djeli Kristi aka shiv̄andreju mwa tsi, katsoka Mutolezi-Masadaka, mana v̄wa wangina watoleao masadaka ha uɗunga iSharia.

⁵ Wao ufanya ĩɓada ha namuna ilio mufano na shivuli ya izo zilio pev̄oni. Mauri ɗe Musa udzitayarisha yahe afanye iNyumba ya Haima, aambilwa na Mungu: «Fahamu amba kula shitru iɗunge umufano waonesewawo mulimaju.»

⁶ Ɓadi leo v̄anu Kristi waye apara urumishi wazidi uhu, iv̄o alio muparanisa wamukataɓa mwema zaidi, wahetsiwa hari mwa nguwahadi ndjema zaidi.

⁷ Mana na djeli umukataɓa wa handra ule kawakana tuhuma, kav̄watsoka ɓandza la mukataɓa wa v̄ili.

⁸ Ɓadi ɗe ha lawama ɗe Mungu arongoa: «V̄usuja suku, Mola ɗe arongoao, zilio amba nitsofunga mukataɓa muv̄ia v̄umoja na umuraɓa waIsraila, na umuraɓa wa Yuda.

⁹ Kautsoka mauri ɗe umukataɓa naufunga na wadzaɗe wawo isuku nawasika ha umuhono, ile niwatowe hari mwa itsi ya Miswiri. Iv̄o wao wenyewe kawaɓaki hari mwa umukataɓa wangu, wami ne tsasongeha na wao, asurongoa Mola.

¹⁰ Ne ɗe tsunu umukataɓa nitsoufungao na umuraɓa wa Israila ɓaanda ya suku zizo, asurongoa Mola. Nitsotria Sharia zangu fikirani hawo, nitsoziangiha rohoni hawo. Nitsoka Mungu wawo, amwesa watsoka umati wangu.

¹¹ Kav̄utsoka tsena atsosomedzao munyahe, wala mutru mwananyahe ha urongoa: ‹Mujuwe Mola›, mana piyawo watsonijua, rangu umutiti ata umuɓole hari mwawo.

¹² Nitsowaswamihi mahosa yawo, amwesa tsitsonahana tsena madhambi yawo.»

¹³ Ha uuhira amba mukataɓa muv̄ia, v̄av̄o wa handra ule aufanya amba wa hale. Na ilio amba ya hale tsena iɗuhwa, iyo isuja izimihe.