MAHEƁRANIYA 6 - Ha`bari Ndjema ya I Maore

¹ Ha izo, narilawe hari mwa ziharufu za handra za umusomo wahusu Kristi, ritsengeleye ata hari mwa ukamilifu wa umusomo, wala tsi ha utria misingi raha: ɗe uendra toɓa ha zitrendrwa mbovu ziv̄ingao hari mwa ufa, uaminifu na Mungu,

² musomo wa yimiɓaĩsho, mukadzio-mihono, muregezeo hayi wa uwafu, na hukuma ya daima.

³ Iyo ɗe trongo rijao riifanye, neka Mungu av̄endze.

⁴ Tsi mukinishiha amba wao waunishiwa suku, wapara ladha ya ineema ya shipev̄oni, warenga fuvu na iRoho Ndzitwaharifu,

⁵ wapara ladha ya urongozi mwema wa Mungu na zingushindzi za ulemengu ujao,

⁶ amwesa amba walatsa uaminifu, tsi mukinishiha amba wav̄ingwe wandre toɓa mara yangina. Mana v̄av̄o wao ha wao ɗe waremao raha mizumari uMwana wa Mungu hari mwa muri wa pawa, tsena wamupuao sheo ha hadhwira.

⁷ Kweli amba wakati shiv̄andre ya tsi ilowao daima-daima ha maji ya vua, iv̄ao mimea yifayidishao walimizi wayo, iyo uɓarikishiwa na Mungu.

⁸ Ɓadi neka isuv̄a zimea zendza miɓa v̄umoja na muri-muɓa, iyo ufanyiha amba kaina faida, uka kariɓu na ulaãniwa, ata mwisoni utrilwa moro.

⁹ Wala ukana risulagua namuna iyo, yahusu wanyu wav̄endzewa, rina yakini amba mwa hari mwa indzia ndjema, ne ɗe ya uhuyifu.

¹⁰ Mana Mungu tsi mudhuluma amba aɗele urumishi wanyu, wala uv̄endza mwauv̄enua ha siɓaɓu ya dzina lahe ha urumishia watwaharifu, tsena ata av̄asa.

¹¹ Ɓadi risutsaha amba kula moja hari mwanyu av̄enuwe djitihadi ɗe wiyo-wiyo ata mupaka mwisoni, ile itama mulionayo iyakinishihe.

¹² Musufanyihe wendza shiɗa, ɓadi mutiɓe wao walio amba, ha uaminifu na suɓira, wasupara umwaratha watolwa wahadi.

Mungu amotoa wahadi, waye uutsimidza

¹³ Wakati Mungu akomutolea wahadi Iɓrahima, ha iv̄o kav̄u muɓole zaidi ya waye amba atsolav̄a na waye, alav̄a na iwaye yahe.

¹⁴ Arongoa: «Ha yakini nitsohuɓarikisha ɓaraka ha uwengi, tsena nitsozidisha ndzao yaho.»

¹⁵ Ha izo ɓaanda asuɓiridza, Iɓrahima apara iyo aka atolewa wahadi.

¹⁶ Wanadamu ulav̄a na uwo alio muɓole rahana wao, na umulav̄io uwo ha uhakikisha marongozi yawo, utria kifu piya mashindrano.

¹⁷ Na Mungu iv̄o akotsaha aonese mawarithi wa uwahadi amba inia yahe kaigauha, aishadidisha ha mulav̄io.

¹⁸ Ha izo, trongo mbili kazigauha, zilio amba hari mwazo tsi mukinishiha Mungu urongoa trambo, zisuriv̄ingia mutrilio-ɓari muhodari, wasi rilio amba umuɓamio watru uka ɗe udzifungamanisa na itama rahetsiwayo.

¹⁹ iTama iyo rinayo mauri nanga hodari tsena mangavu ya iroho. Iyo ungia ata uv̄iria umusutru,

²⁰ v̄ahanu Insa angia amba mutrangulia ha tanafu yatru. Afanyiha Muɓole wa Matolezi-Masadaka wa daima, mauri ɗe inamuna ya Melkisedeki.