MAHEƁRANIYA 5 - Ha`bari Ndjema ya I Maore

¹ Kweli amba kula Muɓole wa Matolezi-Masadaka arengwa hari mwa uwanadamu, uv̄olwa djukuma la urumishia Mungu ha tanafu ya uwanadamu, ile awatoleye makafara na masadaka ha siɓaɓu ya madhambi.

² Waye ushindra aelewe wao walio amba kawaji, tsena walatsiha, iv̄o ilio amba waye-waye ne mulemevu.

³ Ɗe ha siɓaɓu ya ulemevu uwo ɗe alazimu adzitoleye waye-waye masadaka ha siɓaɓu ya madhambi, atoleye na wanadamu masadaka ha siɓaɓu ya madhambi yawo.

⁴ Na kav̄u mutru adziv̄ao monyewe isheo iyo, mutru uhiriwa na Mungu akaneyo, mauri ɗe Haruna waye-waye.

⁵ Ɗe inamuna iyo wajau, Kristi kadziv̄a waye monyewe utukufu wa ufanyiha Muɓole wa Matolezi-Masadaka; aupara ha Uwo amuambia amba: «Wawe Mwana wangu; ileo ini tsifanyiha Ɓaɓaho.»

⁶ Mauri ɗe inamuna arongoao raha v̄ahanu v̄wangina: «Wawe wa Mutolezi-Masadaka wa daima, mauri ɗe inamuna ya Melkisedeki.»

⁷ Uka yahe ha shimwili, av̄eleha mamilio na mirayilio ha shililo ɓole na matsozi ha Uwo akoshindra amuhuyi na ufa; na waye atakaɓaliwa ha siɓaɓu ya utuĩvu wahe.

⁸ Ata ha iv̄o aka Mwana, afundriha utuĩ ha maondo ayaona.

⁹ Na ɓaanda akamilishiha, afanyiha ha piya wao wamutuĩo koho la uhuyifu wa daima,

¹⁰ ɓaanda Mungu amufanya Muɓole wa Matolezi-Masadaka, mauri ɗe inamuna ya Melkisedeki.

Mufahamisho hari mwa trongo ya ulatsa uaminifu

¹¹ Hari mwa trongo iyo, rina nyengi za urongoa zilio ndziro za ueledza, ha iv̄o mwafanyiha wadziro wa uelewa.

¹² Wala ukana ika ilazimu muke wasomedza iv̄o mida yiyo yav̄ira, ne musutsaha raha musomedzewe ziharufu za handra za marongozi ya Mungu. Mufanyiha amba musutsaha dzia raha, ɓadi tsi shahula mangavu.

¹³ Na yotsi alio amba raha a hari mwa dzia, uwo kasina maãrifa ya urongozi wa haki: a mwanamutsa.

¹⁴ Ɓadi shahula mangavu, ya watru waɓalihi, walio amba koho la unamuzi lawo lihodarishiha hari mwa trongo ya utafautisha indjema na imbovu.