MAHEƁRANIYA 4 - Ha`bari Ndjema ya I Maore

¹ Ɓasi iv̄o raha uwahadi wa ungia hari mwa uv̄umuzi wahe ulio v̄av̄o, narifahamu v̄usuke ata moja mengoni mwanyu amba kaupara,

² mana rijudziwa iHaɓari Ndjema mauri ɗe watru wao. Ɓadi urongozi waukia kawawafayidisha na itsokao yotsi, iv̄o kawaukia ha uaminifu.

³ Kweli amba wasi riaminio, risungia hari mwa uv̄umuzi Mungu aurongoa amba: «Ɓasi tsilav̄a yamini ha hasera yangu: Kawatsongia ata hata hari mwa uv̄umuzi wangu.» Na v̄av̄o hazi zahe zika zimalidziha rangu lidunia laumbwa.

⁴ Kweli v̄wa v̄ahanu arongoa yahusu isuku ya saɓa amba: «Mungu av̄umua na piya zihazi zahe isuku ya saɓa.»

⁵ Na tsena, arongoa raha hari mwa mustari unu: «Kawatsongia ata hata hari mwa uv̄umuzi wangu.»

⁶ Ɓasi ɓaanda yahetsiwa amba ɓaãdhwi ɗe watsoungiao, na wa handra wao wakia iHaɓari Ndjema kawaungia ha siɓaɓu ya umuharalio wa utuĩ wawo,

⁷ Mungu ahetsi tsena suku yangina ihiriwao «Leo», ha urongoa ɓaanda ya muda mwengi ha ndzia ya Daudu marongozi yanu madza yarongolwa unyuma oho amba: «iLeo ini, neka musukia ji lahe, mwasukaidishe roho zanyu.»

⁸ Kweli amba na djeli Yeshua aka awav̄a uv̄umuzi, Mungu katsorongoa ɓaanda ya v̄av̄o trongo ya suku yangina.

⁹ Ha izo, v̄wa uv̄umuzi ha watru wa Mungu, mauri ɗe wahe isuku ya saɓa.

¹⁰ Mana uwo angiao hari mwa uv̄umuzi wa Mungu, v̄av̄o asuv̄umua wajau na zihazi zahe, mauri ɗe Mungu na zahe.

¹¹ Ɓasi narifanye djitihadi ya ungia hari mwa uv̄umuzi uwo, ile v̄wasuke mutru apuliha ha namuna ɗe wiyo ile ha uhara utuĩ.

¹² Mana urongozi wa Mungu uwo wa hayi, wa hazini, tsena usutsindza rahana sembea lendza nguso mbili; uwo ungia ata utsapua umo na iroho, na zizifungo na yamatra ya miɓa; uwo unamua zifikira na zinia za iroho.

¹³ Kav̄u shiumbe yamudzamishia: piya zitru za wadzi-wadzi matsoni ha Uwo alio amba irilazimu ridzieledze.

Insa Muɓole wa yaMatolezi-Masadaka

¹⁴ Ɓasi ha iv̄o riliona Mutolezi-Masadaka azidi uɓole av̄ira zimbingu, Insa, uMwana wa Mungu, narisike hodari uaminifu riukuɓalio ha hadhwira.

¹⁵ Mana karisina Mutolezi-Masadaka Muɓole kaelewa ulemevu watru; aka adjereɓiwa hari mwa piya zitrongo mauri ɗe wasi, ɓadi kaãswi.

¹⁶ Ɓasi narijiliye v̄umoja na yakini ishiri ya yezi ya urehema, ile ripare poreho na urehema, risaidiwe hari mwa uwakati walazimu.