MAHEƁRANIYA 3 - Ha`bari Ndjema ya I Maore

Insa muhu wa Musa

¹ Ha izo, wananyangu watwaharifu murengao fuvu hari mwa umuhirio wa shipev̄oni, namumufikiri Insa, uMuv̄elehwa amma uMuɓole wa yaMatolezi-Masadaka|Muɓole wa Matolezi-Masadaka wa uaminifu riukuɓalio.

² Aka muaminifu ha Uwo amuhetsi, mauri ɗe inamuna Musa aka hari mwa piya umuraɓa wa Mungu.

³ Na waye aka aonehana amba astahiki utukufu muɓole rahana wa Musa, mauri muwasi-nyumba ukana hishima rahana inyumba wiyo-wiyo.

⁴ Kweli amba kula nyumba uka amba iwahwa na mutru, na Uwo awaha piya, ɗe Mungu.

⁵ Yahusu Musa waye, aka muaminifu hari mwa piya umuraɓa wa Mungu amba murumishi, alawiye ushahidi izo zakoja zirongoleshehe.

⁶ Ɓadi Kristi waye, shi Mwana ɗe alio muaminifu hari mwa umuraɓa wa Mungu. Na umuraɓa wahe ɗe wasi, neka risusika hodari [ata mwisoni] umuhakikisho na itama iriv̄ao ufahari.

Mufahamisho kinyume na umuharalio

⁷ Iyo ɗe imana, mauri ɗe inamuna iRoho Ndzitwaharifu irongoao: «iLeo ini, neka musukia ji lahe,

⁸ musukaidishe roho zanyu mauri ɗe uwakati wa umutsutsuho, isuku ya umudjereɓio padzaju,

⁹ v̄ahali wadzaɗe wanyu wakoniv̄ima ha unidjereɓu, ɓasi waono zitrendro zangu pandza la maha aruɓaini.

¹⁰ Iyo ɗe imana natukiwa na dunia lilo ata narongoa: ‹Ha daima roho zawo upotea, kawajua ndzia zangu.›

¹¹ Ɓasi tsilav̄a yamini ha hasera zangu: ‹Kawatsongia ata hata hari mwa uv̄umuzi wangu.› »

¹² V̄av̄o namufahamu wananyangu, v̄wasuke ata mutru hari mwanyu akana roho mbovu kaina uaminifu, ata yamuɓausa na Mungu alio hayi.

¹³ Ɓadi namutriane ɓari kula suku, piya wakati mutru ashindrao arongowe «Leo», ile ata moja hari mwanyu asukaidishihe ha udangamanyifu wa lidhambi.

¹⁴ Mana ra hari mwa ushirika wa Kristi neka tu amba risusika hodari ata mwisoni umuhakikisho rilionawo rangu mwandro.

¹⁵ Wakati ulio amba v̄urongolwa: «iLeo ini, neka musukia ji lahe, musukaidishe roho zanyu mauri ɗe uwakati wa umutsutsuho.»

¹⁶ Wav̄i ɗe wakia, amwesa watsutsuha kinyume na waye? Hali tsi ɗe piya wao waka walawa Miswiri ha uv̄ingwa na Musa?

¹⁷ Na kinyume na wav̄i Mungu aka ahadhaɓiha pandza la maha aruɓaini? Hali tsi kinyume na wao waka waãswi, wafa, maiti zawo zapuliha padzaju?

¹⁸ Na wav̄i ɗe waka walav̄iwa yamini amba ata idahari kawatsongia hari mwa uv̄umuzi wahe? Hali tsi ɗe wao kawaka watuĩ?

¹⁹ Risuona ha uzuri amba kawashindra wangia iv̄o kawakana uaminifu.