MAHEƁRANIYA 12 - Ha`bari Ndjema ya I Maore

Matso yatru nayake ha Insa

¹ Ɓasi ha izo wasi wajau, iv̄o razingidziwa na vingu ɓole namuna iyo la mazahidi, naritruwe kula mudzo na lidhambi liriv̄ambanisao ɓure-ɓure tu, amwesa rendre mbio v̄umoja na ustahamilivu hari mwa yamashindrano ralishiwayo.

² Narilishe matso yatru ha Insa alio koho la uaminifu watru, tsena monyewe uukamilisha. Waye alio amba ha ifuraha aka ahetsiwayo, astahamili umuri wa pawa|muri wa pawa na uonea iaĩɓu yawo, amwesa aketsi humeni mwa ishiri ya ufalume ya Mungu.

³ Ɓasi namufikiri Uwo alio amba astahamili mukanyusho mauri ɗe uwo walawa ha maãswifu, ile mwasulemewe ha mupulio-ɓari.

⁴ Hari mwa ushindrana yanyu kinyume na dhambi, raha kamwakingia ata mwatra damu.

⁵ Afa muɗela umutrilio-ɓari mwav̄olwawo mauri wana amba: «Mwana wangu, usudharau shiv̄ondro ya Mola, tsena usupuhe ɓari wakati ahurudio.

⁶ Mana Mola urudi uwo amuv̄endzao, tsena urema shengwe kula amukuɓalio amba mwana wahe.»

⁷ Ɗe ha siɓaɓu ya murudio wanyu ɗe mustahamilio; Mungu asumurengani mauri wana. Mana uv̄i ɗe umwana ɓaɓahe kamurudi?

⁸ Neka kamwarudiwa mauri piya uwana, v̄av̄o wanyu tsi wana wa kweli, ɓadi wana haramu.

⁹ Na v̄anu ɓaanda ilio amba piyasi rina ɓaɓa ha shimwili arirudio na wasi umustehi, ha mara ngav̄i zaidi ralazimu ridzituĩse ha Ɓaɓa wa roho, ne raẽshi!

¹⁰ Maɓaɓatru yakorirudi mwana muda ha uɗunga izo wakoona amba ndjema. Ɓadi Unu asurirudi ha faida yatru, ile rirenge fungu hari mwa utwaharifu wahe.

¹¹ Kweli amba murudio yotsi kauonehana mwandroni amba trongo ya furaha, ɓadi ya huzuni. Ɓadi mbeli-mbeli oho ɗe uv̄ao wao wakoupara mavuna ya amani, ne ɗe uhaki.

¹² Ɓasi namuhodarishe yimihono majele yanyu yiyo, na yamalondro malemevu.

¹³ «Namutayarishiye ndzia zaondzoha yimindru yanyu», ile uwo ulio goɓo wasuv̄erehe, ɓadi uangale.

Rasuhare urehema wa Mungu

¹⁴ Namukane djitihadi ya uẽshi ha amani na watru piya, amwesa mukane utwaharifu ulio amba neka tsi ha uwo, kav̄u mutru atsomuonao Mola.

¹⁵ Namuke hashiri amba v̄usuke ata mutru ahara urehema wa Mungu; v̄usuke ata muzi wendza nyongo wamea wataãɓisha, trongo ilio amba itsorandra, itupiye watru wengi.

¹⁶ Namuke hashiri amba v̄usuke ata mutru afanyao uzindzi, au akufurishao, mauri ɗe Ĩzu alio amba ha muɗyio moja tu, audzu haki yahe ya mwana wa handra.

¹⁷ Musujua amba mbeli-mbeli oho ɓaanda akotsaha awarithi umuɓarikisho, aharaliwa; kashindra apara mugaudzio utsokao yotsi, wala ukana akoutsaha ha matsozi.

¹⁸ Kamwajilia trongo isikihao: tsi moro uvuao, ɓila tsi shidza, wala uɗu, wala tsi dharuɓa,

¹⁹ ɓila tsi ngono ya ɓaragumu, wala tsi ji la marongozi ha namuna amba wao walikia, wakomia wasuengedzewe tsena kauli yangina.

²⁰ Mana kawakoshindrov̄inga ãmuri ini: «Yotsi atsopahao umulima, wala ukana shinyama, itsoangamidziwa ha mawe.»

²¹ Trongo yakoonehana v̄ale yakorisidza ata Musa akorongoa: «Nisuria ata nisudridrima.»

²² Ɓadi mujilia uMulima wa Siyuna|Mulima wa Siyuna na liɗago la Mungu alio hayi, iYerusalemu ya shipev̄oni, v̄ahanu v̄ulio amba mialifu na mialifu za malayika zingulidzana ha mufurahishio,

²³ ha idjama wa yamadzazi ya handra yaangihwa pev̄oni. Mujilia ha Mungu alio hakimu wa piya, ha ziroho za wendza haki wakamilishiha,

²⁴ mumujilia Insa, umuparanisa wa mukataɓa muv̄ia, na idamu yahe yatsambadziwa ilaguao trongo ndjema rahana ya Haɓilu.

²⁵ Namufahamu, musuharaliye uwo alaguao. Neka wao waharalia uwo akowafahamisha shiv̄andreju mwa tsi kawashindra watrala, ha mara ngav̄i zaidi wasi karitsoshindra ratrala, neka risudziɓausa na Uwo arifahamishao rangu pev̄oni!

²⁶ Uwo alio amba liji lahe ligudzusa wakati uwo ishiv̄andre ya tsi, na av̄asav̄anu atoa wahadi unu: «Mara moja raha nitsodridrimisa wala tsi ɗe ishiv̄andre ya tsi tu, ɓadi na uwingu wajau.»

²⁷ Marongozi yanu amba «mara moja raha», yao yasurongoa amba izo zagudzusiha, ne ɗe izo zaumbwa, zitsotolwa, ile zizo kazigudzusiha ziɓaki.

²⁸ Ha izo, iv̄o riparao utawalizi kaugudzusiha, narihimidiye ha umutolea Mungu ĩɓada imujiv̄iao yendza utuĩvu na staha.

²⁹ Kweli amba Mungu watru, waye moro ukomesao.