MAHEƁRANIYA 11 - Ha`bari Ndjema ya I Maore

Uaminifu wa watru wa hale

¹ Na uaminifu, uwo ɗe iyakini ya iyo mutru atumainiao, muhakikisho wa izo mutru kasuziona.

² Ɗe ha uwo ɗe uwadzaɗe wakorongolwa na sifa.

³ Ha uaminifu ɗe rielewao amba ulemengu ufanyiwa ha urongozi wa Mungu, ha namuna amba izo zionehanao, kazalawa hari mwa zionehanao.

⁴ Ha uaminifu, ɗe Haɓilu amutolea Mungu sadaka ɓorwa rahana la Kayinu. Na ha wilo apara ushahidifu wa mukuɓalisho wahe, iv̄o Mungu waye-waye akuɓali izo amutamaniazo. Na ha uaminifu wahe uwo, ata iv̄o afa, ne raha asulagua.

⁵ Ha uaminifu ɗe Henoki arengwa, ha namuna amba asuone ufa. Kaparihana tsena, mana Mungu amurenge. Na kaɓula ya waye urengwa, apara ushahidifu amba akomujiv̄idza Mungu.

⁶ Mana neka tsi ha uaminifu, tsi trongo mukinishiha amba mutru amujiv̄idze Mungu, mana uwo amukuruɓiao, alazimu aamini amba a v̄av̄o, tsena amba waye uv̄a thawaɓu wao wamuzunguhao.

⁷ Ha uaminifu ɗe Nuhu ufahamishiwa yahe na Mungu na trongo zilio amba raha kazakoonehana, ha utuĩvu wahe, afanya djahazi ile ahuyi udjama wahe. Ɗe ha uwo ɗe ahukumu ulemengu, amwesa afanyiha muarithi wa umuhakisho uparihanao ha uaminifu.

⁸ Ha uaminifu ɗe Iɓrahima atuĩ uhiriwa yahe andre v̄ahanu v̄ulio amba akoja av̄upare mwaratha. Alawa ɓila ujua v̄ahanu akwendra.

⁹ Ha uaminifu ɗe aja aẽshi shi mudjeni hari mwa tsi aka atolewayo wahadi. Akoẽshi hari mwa maɓanga ya haima, amma na Isiaka na Yaãkuɓu, walio amba waka warithi v̄umoja na waye wahadi uwo-uwo.

¹⁰ Mana akotumainia liɗago liliona misingi mihodari, lilio amba Mungu waye-waye ɗe aliɓunu tsena aliundra.

¹¹ Ɗe ha uaminifu ɗe Sara waye-waye, wala ukana amba aka azidi maha, av̄olwa ushindzi wa madzazi, mana amuono amba muaminifu Monyewe utoa uwahadi.

¹² Iyo ɗe imana ata ha mutru moja, na uwo akokuruɓia ufa, v̄udzalwa indadi mauri ɗe zinyora za mbinguni, mauri ɗe umutsanga wa ɓaharini ulio amba kauhisaɓiha.

¹³ Ɗe hari mwa uaminifu ɗe piya watru wao wafa, ɓila upara trongo waka watolewa wahadi, ɓadi wakoziona, tsena wakozishangiria rangu mbali, ha ukuɓali amba wa wadjeni na watru wav̄irao na ndzia shiv̄andreju mwa tsi.

¹⁴ Watru walaguao namuna iyo, wasuonesa dhwahiri amba wasutsaha v̄ahanu v̄ulio hawo wenyewe.

¹⁵ Na djeli wakana hamu na hule walawa, itsoka amba wapara nafasi ya uregea.

¹⁶ Ɓadi hususwani wakotsaha v̄ahanu v̄ulio ɓorwa, yaãni v̄wa shipev̄oni. Iyo ɗe imana ata Mungu kaono haya uhiriwa Mungu wawo, mana awatayarishia ɗago.

¹⁷ Ɗe ha uaminifu ɗe Iɓrahima wakati akodjereɓiwa, akomutoa Isiaka sadaka. Akotoa sadaka mwana moja-moja wahe, ule aka atolewa zinguwahadi,

¹⁸ tsena ha waye ɗe aka aambilwa: «Ɗe ha Isiaka ɗe utsopariwao zilembwe.»

¹⁹ Akodziambia amba Mungu ana ushindzi ata wa uregeza hayi mufu. Na ha ndzia ya shiurongozi, kweli amupara Isiaka ulawa ufaju.

²⁰ Ɗe ha uaminifu ɗe Isiaka amusopelea Yaãkuɓu na Ĩzu waɓarikishihe hari mwa zijao.

²¹ Ɗe ha uaminifu ɗe Yaãkuɓu wakati akofariki, asopelea kula mwana wa Yusufu, amwesa amutukuza Mungu ha uɗemea hari mwa itsa ya mupweke wahe.

²² Ɗe ha uaminifu ɗe Yusufu ondrofa yahe, alagua umulawio wa Maisraila ulawa Miswiri, amwesa atoa ãmuri yahusu yimiɓa yahe.

²³ Ɗe ha uaminifu ɗe Musa udzalwa yahe, adzamisiwa muda wa mezi miraru na wadzaɗe wahe, mana waono amba umwana aka muzuri, tsena kawaria iãmuri ya mufalume.

²⁴ Ɗe ha uaminifu ɗe Musa uɓalihi yahe ahara uhiriwa mwana wa umwana mutrumama wa Firiyauna.

²⁵ Aono ɓorwa arendrwe mbovu v̄umoja na umati wa Mungu, rahana ukana furaha ya muda hari mwa dhambi.

²⁶ Akoona amba udhilifu ha siɓaɓu ya Kristi, uwo utadjirifu rahana piya zidafine za Miswiri, mana akoangalia ɗe ithawaɓu yakoja.

²⁷ Ɗe ha uaminifu ɗe alawia iMiswiri, ɓila uria hadhaɓu za mufalume; asiki hodari, amba mutru aonao Uwo alio amba kaonehana.

²⁸ Ɗe ha uaminifu ɗe ahetsi uMutupio|Mutupio, na umutsanyio wa damu milongoju, pare uMuangamifu asuɓambe madzazi ya handra ya uwana wa Maisraila.

²⁹ Ɗe ha uaminifu ɗe wav̄ira hari mwa iƁahari Ndzukundru mauri hari mwa trotro kavu, ɓadi Mamiswiri udjereɓu yawo, waroro.

³⁰ Ɗe ha uaminifu ɗe zinguhura za Jeriko zakomoha, ɓaanda zazingidziwa muda wa suku saɓa.

³¹ Ɗe ha uaminifu ɗe lisusu Rahaɓati kaangamia v̄umoja na wao kawakotuĩ, mana aka akariɓisa ha uzuri uwatunduzi wa Israila.

³² Nirongowe trini raha? Nafasi kaiv̄o ya ulagua rangu Djĩdani, Ɓarak, Samsuna, Yefte, Daudu, Samueli na yimitrume,

³³ wao walio amba ha uaminifu, washindri ngufalume, wakorumishia uhaki, wapara yamavuna ya zinguwahadi, na uɓala hanyo zisimba;

³⁴ wazimi ushindzi wa moro, watrala mutsindzio wa upanga, wafanyiha wahodari ata wav̄iria ulemevu wawo, wahodarishiha kondroni, tsena watradza madjeshi wadjeni.

³⁵ V̄wa watrumama wapara wafu wawo ha muregezeo hayi. Ɓadi wasalia watreswa ɓila kawakuɓali ukombofu, ile wapare muregezeo hayi mwema zaidi.

³⁶ Wasalia waondesheha ha mashekedzo na shengwe, na wasalia raha ha silisili na shiv̄a.

³⁷ Waulawa ha mawe, wakutrulwa ha mishari, waulawa ha upanga; wakozingidza v̄av̄o na v̄av̄o ha upindra ngwezi za maɓariɓari na mbuzi, kawakana itsokao yotsi, wakorendrwa naĩ na utreswa,

³⁸ wao walio amba ulemengu kawaka wawastahiki. Wakozingidza hunu na hule mav̄adzani na milimani, moni mwa magumbo na ngama za ishiv̄andre ya tsi.

³⁹ Na piya wao walio amba waka wapara ushahidifu mwema ha siɓaɓu ya uaminifu wawo, kawapara iyo yaka yatolwa wahadi,

⁴⁰ iv̄o Mungu aka ariãzimia trongo ndjema zaidi, ile wasupare ukamilifu ɓila wasi.