MAHEƁRANIYA 10 - Ha`bari Ndjema ya I Maore

¹ Kweli amba iSharia isuv̄inga muvuli wa zindjema zijao, ɓadi tsi sura swafi-swafi ya trongo zizo. Iyo ɗe imana amba ata dahari kaisushindra ha masadaka yao-yao yatolewao v̄av̄o na v̄av̄o, mwaha ata mwaha, yarahatsisa ha ukamilifu wao wamukuruɓiao Mungu ha umuãɓudu.

² Na djeli amba tsi ɗe namuna iyo, ɓasi hali kaitsoka amba watru wazia uyatoa? Mana wao wafanyao ĩɓada iyo, itsoka amba watwaharishiha mara moja ɓas, amwesa kawatsodzituhumia tsena na dhambi.

³ Ɓadi ɗe ikinyume, ha masadaka yale, watru unahanidziwa kula mwaha yamadhambi.

⁴ Mana tsi mukinishiha amba damu ya mahondzo na maɓeɓeru itowe yamadhambi.

⁵ Iyo ɗe imana ata uja yahe ulemenguni, Kristi arongoa: «Kwatsaha sadaka wala kafara, ɓadi unitayarishia mwili.

⁶ Kwajiv̄iwa na masadaka yavudzwa, ɓila masadaka yatolewa ha swamaha la yamadhambi.

⁷ Ɓasi tsirongoa: ‹Tsami nisuja ẽhẽ Mungu, nifanye mav̄endzeleo yaho, ha uɗunga iyo yaangihwa yahusuana na wami moni na ishio yav̄ambwa.› »

⁸ Asurongoa raɓuzi zini: «Kwatsaha, amwesa kwajiv̄iwa na makafara, ɓila masadaka yavudzwa, wala masadaka yatolewa ha swamaha la yamadhambi». Na v̄av̄o, yao masadaka yatolewao ha uɗunga iSharia.

⁹ Amwesa aja asurongoa: «Tsami, nisuja nifanye mav̄endzeleo yaho.» Ɓasi v̄av̄o asuzima ĩɓada ya handra ile, pare ahetsi ya v̄ili.

¹⁰ Ɗe ha mav̄endzeleo yao ɗe ratwaharishiwa ha lisadaka la umwili wa Insa-Kristi, mara moja ɓas.

¹¹ Kula mutolezi-masadaka uhima kula suku ile afanye urumishi wahe, na utolea mara na mara masadaka ɗe yao-yao yalio amba ata dahari kaishindri utoa yamadhambi.

¹² Ɓadi waye, ɓaanda atolea sadaka moja tu ha yamadhambi, aketsi ha daima humeni ha Mungu.

¹³ Rangu v̄av̄o asulindra ata maãduwi yahe yafanyiwe shihetsi-mindru yahe,

¹⁴ mana ha sadaka moja tu, akamilisha ha daima wao watwaharishiwao.

¹⁵ Iyo ɗe itrongo iRoho Ndzitwaharifu irishadidishao wajau. Mana ɓaanda yarongoa zini:

¹⁶ «Tsunu umukataɓa|mukataɓa nitsoufungao na wao ɓaanda ya suku zizo, asurongoa Mola. Nitsotria Sharia zangu rohoni hawo, tsena nitsoziangiha fikirani hawo.»

¹⁷ «Ɓila madhambi yawo na mahosa yawo, tsitsoyanahana tsena.»

¹⁸ Na v̄ahanu v̄ukao swamaha la madhambi, kav̄uka tsena sadaka ha lidhambi.

Ilazimu risuɓiridze na uaminifu watru

¹⁹ Ha izo wananyangu, rina yakini ya mungilio ha unafasi moni na liPa Dzitwaharifu rahana Dzitwaharifu ha idamu ya Insa.

²⁰ Aritsamilia ndzia pia yendza uhayati ha uv̄iria umusutru, yaãni, ha umwili wahe.

²¹ Ɓasi rina Mutolezi-Masadaka Muɓole ahetsiwa shitswa hari mwa umuraɓa wa Mungu.

²² V̄av̄o narikuruɓiye ha umo warahara na uaminifu mukamilifu, tsena na roho yarahatsiwa na tuhuma mbovu, v̄umoja na mwili ulio amba uhoswa ha maji maraharifu.

²³ Narisike hodari itama yatru riikuɓalio ha hadhwira ɓila rasujeledze, mana Uwo atoa uwahadi, waye muaminifu.

²⁴ Narike watsunga wasi na wasi, ritriyane ɓari hari mwa itrongo ya uv̄endza, na hari mwa zitrendro ndjema.

²⁵ Rasulishe ungulidzana na wanyatru wa shi uaminifu, mauri ɓaãdhwi waliona udzevu nayo, ɓadi naritriyane ɓari wasi na wasi, na zini hususwani iv̄o muonao amba iSuku isukuruɓia.

²⁶ Mana neka risuãswi ha kusudi ɓaanda rapara ujuzi wa ukweli, ɓasi v̄av̄o kav̄usuɓaki tsena sadaka la utoa madhambi,

²⁷ ɓadi mulindrilio wendza trisidzo wa ihukuma ya Mungu, uhali wa umoro ujao uvudze wao wamukanyushao.

²⁸ Mutru alio amba atikadi iSharia ya Musa, waye uulawa ɓila poreho, mbeli za ushahidi wa watru waili au wararu.

²⁹ Ɓasi mara ngav̄i, musufikiri, utsokao udziro wastahiki ishiv̄ondro ya uwo itsokao amba agaɗa uMwana wa Mungu, atefua idamu ya umukataɓa ilio amba ha wiyo atwaharishiwa, aruhana iRoho ya irehema?

³⁰ Mana risujua uwo arongoa: «Kiswa, iyo yangu, wami ɗe nitsoliv̄isao.» Na tsena: «Mola atsohukumu umati wahe.»

³¹ Iyo trongo irisidzao, upuliha mihononi ha Mungu alio hayi.

³² Namunahane tu suku za handra ɓaanda mwaunishiwa, mustahamili kondro ɓole yendza maondo.

³³ Wakati mwakoelehwa dhwahiri mbeli za watru ha zilihidzo na matreso, na wakati wangina mwakoka ushirika moja na wao wakofanyiwa zitrendrwa mauri ɗe zizo.

³⁴ Kweli amba muono utungu v̄umoja na wao waka wafungwa, tsena ha furaha mukuɓali muv̄oshewe ndjema zanyu, iv̄o mwakojua amba muna utadjirifu wazidi utsokao dahari.

³⁵ Mwasulatse ɓasi uaminifu wanyu ulio amba usuv̄inga thawaɓu ɓole.

³⁶ Ilazimu mukane ustahamilivu, ile ɓaanda mwafanya mav̄endzeleo ya Mungu, mupare iyo yatolwa wahadi.

³⁷ Mana v̄uangihwa: «Mwana muda raha, mushashi tu, na Uwo alazimu aje atsoja, waye katsohoma.

³⁸ Na mwendza haki wangu atsoẽshi ha uaminifu, ɓadi neka asudzivura, roho yangu kaijiv̄iwa na waye.»

³⁹ Na wasi hatruju, karisi hari mwa wao wadzivurao wandra wadzipoteza, ɓadi hari mwa wao waliona uaminifu uhuyio roho zawo.