MAHEƁRANIYA 1 - Ha`bari Ndjema ya I Maore

Mungu av̄enushia uwanadamu ha uMwana wahe

¹ Mida ya hale, Mungu alagua na wadzaɗe watru ha mara nyengi na namuna nyengi ha ndzia ya yimitrume,

² ɓadi hari mwa zisuku za mwiso zini, alagua na wasi ha ndzia ya Mwana wahe, alio amba amufanya muarithi wa piya, na ha waye ɗe aumba ulemengu kamili.

³ uMwana uwo alio umuvagio wa utukufu wa Mungu, na umufano mukamilifu wa utru wahe, asuv̄inga piya zitru ha urongozi wendza ushindzi wahe. Ɓaanda atsimidza umurahatsio wa yamadhambi, aketsi humeni mwa Monyewe Ufalume hari mwa yimikaɓala ya uju.

⁴ Afanyishiha muɓole rahana zimalayika, ata lidzina aliarithi ne dzihu rahana lazo.

uMwana ɗe umuɓole wa piya

⁵ Mana iv̄i hari mwa zimalayika Mungu aparoiambia amba: «Wawe Mwana wangu; ileo ini tsifanyiha Ɓaɓaho?» Amwesa tsena: «Wami nitsoka Ɓaɓa haheju, na waye hanguju, atsoka Mwana.»

⁶ Na tsena, uv̄eleha yahe umudzalwa wa handra uwo ulemenguni, arongoa: «Piya zimalayika za Mungu nazimuãɓudu.»

⁷ Uhusu zimalayika arongoa: «Asufanya malayika zahe pev̄o, na warumishi wahe ngulimi za moro.»

⁸ Ɓadi uhusu uMwana arongoa: «Shiri ya yezi yaho, wawe Mungu, iyo ya daima, na itsimbo ya utawalizi waho, iyo tsimbo ya haki.

⁹ Uv̄endze uhaki, amwesa uenge uovu; iyo ɗe imana Mungu, ata Mungu waho ahutsahua ha uhutsomolea shitswani matra ya furaha zaidi rahana wanyaho.»

¹⁰ Na tsena: «Wawe Raɓi, ɗe mwandroni waumba ishiv̄andre ya tsi, na zimbingu izo, hazi za yimihono yaho.

¹¹ Izo zitsokoma, ɓadi wawe wa v̄av̄o; zitsoɗuhwa piyazo mauri nguo.

¹² Utsoziv̄era mauri koti, zitsogaudziwa mauri nguo. Ɓadi wawe, wa ɗe wawe-wawe, na yimaha yaho kayitsokoma.»

¹³ Na iv̄i hari mwa zimalayika yaparoambilwa amba: «Ketsi humeni hangu ata mupaka nifanye maãduwi yaho yake shikadza-mindru yaho»?

¹⁴ Hali piya izo tsi roho ndzirumishi zav̄elehwa zirumishiye wao watsowarithio uhuyifu?