MAGALATWIYA 5 - Ha`bari Ndjema ya I Maore

Unafasi hari mwa uv̄umoja na Kristi

¹ Ile wasi rikane unafasi, ɗe Kristi arikomboa. Ɓasi v̄av̄o namuhodarishihe, wala musudzilishe mwarudi tsena mwatrika mulandza wa urumwa.

² Wami Ɓaulusu tsami nisumuambiani amba neka musudzilisha mutahiriwe, Kristi katsomufayidishani na itsokao yotsi.

³ Nisuishadidisha tsena ha kula mutru adzilishao atahiriwe: alazimu atuĩ iSharia ha ukamilifu wayo.

⁴ Muɓauhana na Kristi, wanyu mutsahao muhakisho mbeli za Mungu ha ndzia ya iSharia; mulawa hari mwa urehema.

⁵ Wasi hatruju, ɗe ha uv̄ingwa na iRoho ɗe rilindrao, v̄umoja na uaminifu, umuhakisho riutumainiao.

⁶ Mana hari mwa uv̄umoja na Kristi-Insa, tsi ɗe utahiriwa, au tsi utahiriwa ɗe iliona mana, ɓadi ɗe uaminifu urendrehao ha mahaɓa.

⁷ Mwakwendra mbio ha uzuri tu! Mbani ɗe amuziani amba mwasutuĩ ukweli?

⁸ Sariɓu lilo kalisulawa ha Uwo amuhiraoni.

⁹ Lalive shashi ufumua piya umuhare.

¹⁰ Wami yangu, hari mwa uv̄umoja watru na Raɓi, tsina uaminifu na wanyu amba kamutsofikiri namuna yangina. Ɓadi mutru amumenyaoni zifikira, neka ɗe mbani au mbani, atsopara zifungo.

¹¹ Na wami uv̄andre wangu wananyangu, na djeli amba nakoĩdhia raha utahiriwa, manatrini ata nitsotreswao raha? V̄av̄o itsoka amba isiɓaɓu ya ukwalisa ilio hari mwaumuri wa pawa|muri wa pawa, kaitsoka tsena.

¹² Nawandre ata wadzipuwe shiga, wao wamuɓaɓanisaoni!

¹³ He wanyu wananyangu, muhiriwa muke hari mwa unafasi. Ɓadi unafasi uwo, usufanyihe amba shisa ya ufanya taɓia ya shiuɓinadamu. Ɗe ha kinyume amba ha uv̄endzana yanyu, namurumishiane wanyu na wanyu.

¹⁴ Mana piya iSharia itsimidziha hari mwa urongozi moja, ne ɗe unu: «Utsomuv̄endza munyaho mauri ɗe inamuna udziv̄endzao wawe monyewe.»

¹⁵ Ɓadi neka musuremana manyo na uɗyana, namufahamu, musuje mwaangamidziwa wanyu na wanyu.

Uẽshi ha shiRoho, ɓadi tsi ha shiuɓinadamu

¹⁶ Nisurongoa ɓasi: Namwendre ha uv̄ingwa na iRoho, na v̄av̄o kamutsotsimidza tsena mav̄endzeleo ya shiuɓinadamu.

¹⁷ Mana shiuɓinadamu una ngushauku kinyume na iRoho, na iRoho ina zilio kinyume na ushiuɓinadamu; zisendra kinyume wizo na wizo, ha namuna amba kamusufanya izo mutsahao.

¹⁸ Ɓadi neka musuv̄ingwa na iRoho, v̄av̄o kamusi tsena hari mwa utawalizi wa iSharia.

¹⁹ Na zitrendro za shiuɓinadamu, izo uonehana dhwahiri: uzindzi, utshafi, upeu watupa,

²⁰ uãɓudu masanamwe, utsayi, uãduwi, umani, uwivu, hasera, ushifuɓa, mitsapushiano, mifarikishano,

²¹ uwivu, ulevi, uv̄iria uɗya, na trongo zangina zilio mufano wa zile. Nisumufahamishani mauri ɗe inamuna madza naifanya: wao wafanyao trongo mauri ɗe zizo, kawatsowarithi Utawalizi wa Mungu.

²² Ɓadi mavuna ya iRoho ɗe: uv̄endza, furaha, amani, suɓira, uwema, roho ndjema, uaminifu,

²³ utrulivu, na udzizia. Kav̄u Sharia ilio kinyume na trongo mauri ɗe zizo.

²⁴ Ɓadi wao walio wa Kristi-Insa waangamidza ushiuɓinadamu na mav̄endzeleo yayo na ngushauku zayo.

²⁵ Iv̄o riẽshio ha iRoho, narendre wajau ha iRoho.

²⁶ Rasudzione, nariziye utukizana na uoneana uwivu.