MAGALATWIYA 4 - Ha`bari Ndjema ya I Maore

¹ Trongo niirongoao ɗe ini: piya umuda muarithi alio mwanamutsa, waye katafautisha na murumwa hari mwa itsokao yotsi, wala ukana waye ɗe monyewe wa piya.

² Waye uv̄ingwa na walezi na madhwamana wa imali yahe, ata uwakati wahetsiwa na ɓaɓahe.

³ Wasi wajau, wakati raka wanatsa, rika warumwa wa zinguvu ziv̄ingao ulemengu.

⁴ Ɓadi wakati wamokamiliha, Mungu av̄eleha Mwana wahe, adzalwa na mutrumama, tsena hari mwa yamasharutwi ya iSharia,

⁵ ile akombowe wao wakotawaliwa na iSharia, pare rifanyihe wana.

⁶ Na ha iv̄o mulio wana, Mungu av̄eleha rohoni hatru iRoho ya uMwana wahe, ilio amba isurongoa ha nguvu: «Aɓɓa!» yaãni «Ɓaɓa!»

⁷ Ɓasi ha izo, kusi tsena murumwa, ɓadi mwana. Na ha iv̄o ulio mwana, v̄av̄o wa muarithi, trongo yafanyiwa na Mungu.

Hamu za Ɓaulusu na uaminifu wa Magalatwiya

⁸ Nyuma hule iv̄o kamwakomujua Mungu, mwakorumishia mauri warumwa miungu yilio amba ha ihali yayo, kayisi.

⁹ Ɓadi av̄asa, iv̄o mumujuao Mungu, au amba mujulihanao na Mungu, namuna jeje mushindrao murudi raha hari mwa trongo zile kazina ushindzi tsena ndziv̄ungufu, ha utsaha muzirumishiye raha mauri warumwa wazo?

¹⁰ Mususika hodari masharutwi ya zisuku, yimezi, ziwakati, na yimaha!

¹¹ Nisuria amba ihazi namurumishiani, kaina faida.

¹² Nisumumiani wananyangu, namuke mauri wami, iv̄o nilio mauri wanyu. Kamwanifanyia mbovu itsokao yotsi.

¹³ Musujua amba ɓaanda ya uwaɗe ɗe namujudzani ha mara ya handra iIndjili.

¹⁴ Wala ukana ihali ya umwili wangu ika ndziro hanyuju ne kamwanionea, wala kamwanirungamia. Ɓadi ha kinyume, munirenge mauri malayika ya Mungu, mauri ɗe Kristi-Insa.

¹⁵ Ɓasi ifuraha mwaka nayo ya hav̄i? Mana nisumulawiani ushahidi amba na djeli ika trongo mukinishiha, mwatsodzivoɓoa ya matso, ne muniv̄ewo.

¹⁶ Hali v̄anu tsifanyishiha ãduwi yanyu, mana nisumuambiani zikweli?

¹⁷ iDjitihadi walionayo na wanyu, kayarahara. Wasutsaha wamuɓauseni [na wasi], pare mukane djitihadi na wao.

¹⁸ Iyo trongo ndzuzuri ya ukana djitihadi ha nia ndjema, tsena ha daima, ɓadi tsi amba namoka v̄umoja na wanyu tu ɓasi.

¹⁹ Wana wangu mulio amba tsina utungu wa madzazi raha na wanyu, ata mupaka Kristi afanyishihe moni hanyu!

²⁰ Natsov̄endza nike v̄umoja na wanyu av̄asa, ile nipare liji lastahiki, mana tsishanga ha kusudi na wanyu.

Mufano wa Hadjira na Sara

²¹ Namuniambiye ɓasi, wanyu mutsahao muke hari mwa utawalizi wa iSharia, hali kamusukia iSharia?

²² Mana v̄uangihwa amba Iɓrahima akana wana watruɓaɓa waili, umoja wa mutrumama murumwa, na umoja wa mutrumama munafasina.

²³ Ule wa umutrumama murumwa adzalwa ha uɗunga trongo za shiuɓinadamu, na ule wa umutrumama munafasina, adzalwa ha uɗunga uwahadi.

²⁴ V̄anu v̄wa fumbo: watruwashe waili wanu isurongoa yimikataɓa mili. uMoja, ule wa uMulima wa Sinayi, udzalia urumwa; na uwo ɗe Hadjira.

²⁵ Na Hadjira ɗe uMulima wa Sinayi|Mulima wa Sinayi hari mwa iAraɓiya, na waye asurengwa mauri ɗe iYerusalemu ya leo, mana ya hari mwa urumwa na uwana wayo.

²⁶ Ɓadi iYerusalemu ya uju ya hari mwa unafasi, na wiyo ɗe ilio mayatru.

²⁷ Mana v̄uangihwa: «Ka na furaha, wawe mutrumushe kuna ndzao ulio amba kwadza! Hedza mishelemedzeo ya furaha, wawe kwaparopara utungu wa madzazi! Mana wana wa umutrumushe ajeledzewa, wao wengi rahana wa ule aliona mutrumume.»

²⁸ Ɓasi yahusu wanyu wananyangu, mauri Isiaka, mwa wana wa uwahadi.

²⁹ Na ha inamuna amba ule aka adzalwa ha uɗunga trongo za shiuɓinadamu hale hule akotresa ule aka ha shiRoho, ɗe namuna ilio raha av̄asa.

³⁰ Na uMuangishio usurongoa trini? Amba: «Toa umutrumushe murumwa na umwana wahe, mana umwana wa umutrumushe murumwa katsoarithi v̄umoja na umwana wa umutrumushe munafasina.»

³¹ Ha izo wananyangu, wasi karisi wana wa umutrumushe murumwa, ɓadi ra wa umunafasina.