MAGALATWIYA 3 - Ha`bari Ndjema ya I Maore

iMahususu ɓaina ya iSharia na uaminifu

¹ He wanyu Magalatwiya mudzifanyao wajinga! Mbani ɗe amugangini? Ne muv̄enuliwa hadhwira matsoni hanyu Insa-Kristi, amba aremwa mizumari hari mwa muri wa pawa.

² Trongo nitsahao nijuwe hanyuju ɗe ini tu: Hali ɗe ha uɗunga iSharia ɗe mwadjaãliwa iRoho Ndzitwaharifu, au ɗe iv̄o mwakia ihaɓari ya uaminifu?

³ V̄anu kweli amba murendreha wajinga namuna iyo? Ɓaanda mwaandrisa ha iRoho, amba av̄asa musuja mukamilishe ha ushindzi wa shiunadamu wanyu?

⁴ Piya izo mwaziẽshi, amba ɓure-ɓure tu? Neka kweli amba ɓure-ɓure tu!

⁵ Monyewe umudjaãliani iRoho, tsena ahidjirisao midjuza hari mwanyu, hali asuzifanya iv̄o muɗungao iSharia, au ɗe iv̄o mwakia ihaɓari ya uaminifu?

⁶ Mauri ɗe Iɓrahima «amuamini Mungu, na iyo ɗe yafanyishiha muhakisho mbeli zahe.»

⁷ Ɓasi v̄av̄o, namujuwe amba: wao waliona uaminifu ɗe walio «wana wa Iɓrahima».

⁸ Tsena iv̄o uMuangishio Mutwaharifu waona rangu kaɓula amba Mungu atsokuɓali watru tsi Mayahudi ha uaminifu wawo, ɗe wamujudza Iɓrahima ihaɓari ndjema iyo amba: «Piya zinishani zitsoɓarikishiha ha indzia yaho.»

⁹ Ha izo, wao waliona uaminifu waɓarikishiha v̄umoja na Iɓrahima, monyewe uaminifu.

¹⁰ Kweli amba wao watriao tama zawo hari mwa uɗunga iSharia, wa hari mwa ulaãnifu, mana v̄uangihwa: «Alaãnishiha mutru yotsi alio amba kasuɗunga ha ukamilifu piya zaangihwa moni na ishio ya iSharia, tsena kasuzitsimidza.»

¹¹ Na tsena irahara amba kav̄u ahakishao mbeli za Mungu ha ndzia ya iSharia, mana v̄uangihwa: «Monyewe uhakikishiwa ha uaminifu, atsoẽshi.»

¹² Ɓadi iSharia kaisulawa hari mwa uaminifu. Mana v̄uangihwa: «Monyewe uɗunga trongo zizo, atsoẽshi ha ndzia yazo.»

¹³ Kristi waye arikomboa na ilaãna ya iSharia ha ufanyiha laãna ɓadala yatru. Mana v̄uangihwa: «Alaãnishiha mutru yotsi alembedzewa hari mwa muri.»

¹⁴ Na iyo pare iɓaraka ya Iɓrahima iwaswili ha zinishani zangina ha ndzia ya Kristi-Insa, amwesa ha uaminifu, ripare iRoho yaka yatolewa wahadi.

iSharia kaivundzu wahadi wa Mungu

¹⁵ Wananyangu, nisuja nilaguwe ha shiunadamu: mukataɓa wamohisofungwa namuna yastahiki, kav̄usi mutru ajuao auzime, au auengedzeye nuktwa.

¹⁶ Na v̄anu zinguwahadi zika ziv̄olwa Iɓrahima na shilembwe yahe. uMuangishio kausurongoa amba «na zizilembwe», mauri amba wengi, ɓadi usurongoa moja, «na ishilembwe yaho», na uwo ɗe Kristi.

¹⁷ Trongo nitsahao niirongowe ɗe ini: Mukataɓa wafungwa na Mungu namuna yastahiki, kautsojua wazimwa na iSharia yaja ɓaanda ya maha aruɓamiya wa thalathini, trongo itsoɓuliao uwahadi wa Mungu.

¹⁸ Na djeli umwaratha uka uja ha uɗunga iSharia, v̄av̄o kaitsoka tsena amba ulawa hari mwa uwahadi. Na v̄anu ha uwahadi ɗe Mungu amudjaãlia Iɓrahima urehema wahe.

iÃzima ya iSharia

¹⁹ Ɓasi ãzima ya iSharia trini? Ika iengedzewa pare mahosa yav̄enuhe, ata mupaka aje iShilembwe ilio amba ika itolewa uwahadi. iSharia ika iv̄ingwa na malayika, ha umuhono wa muparanisa.

²⁰ Na muparanisa uwo, tsi muparanisa wa mutru moja; ɓadi Mungu, waye moja.

²¹ Hali v̄anu iSharia isendra kinyume na zinguwahadi za Mungu? Ata hata! Na djeli v̄uka v̄utolwa Sharia ishindrao iv̄inge uhayati, v̄av̄o umuhakisho ha Mungu watsoja na iSharia.

²² Ɓadi uMuangishio urongoa amba ulemengu piya uɓaliwa hari mwa madhambi, ile uwahadi udjaãliwe, ha uaminifu na Insa-Kristi, ha wao waaminio.

²³ Kaɓula ya uaminifu uja, rika rifungiha hari mwa ugogezi wa iSharia, ata mupaka uaminifu uv̄enulwe.

²⁴ Ha izo, iSharia ika mulezi watru ata umujilio wa Kristi, ile rikuɓalishihe ha uaminifu.

²⁵ Ata uaminifu uja yawo, karisi tsena utsini na mulezi.

²⁶ Mana ha ndzia ya uaminifu, mwa piyanyu wana wa Mungu ha uv̄umoja wanyu na Kristi-Insa.

²⁷ Kweli amba piya wanyu mwaɓaĩshiwa hari mwa uv̄umoja na Kristi, mumupindri Kristi.

²⁸ Kav̄u tsena Muyahudi wala Mugiriki, au murumwa wala munafasina, kav̄u tsena mutruɓaɓa wala mutrumama, mana wanyu piyanyu mwa moja hari mwa uv̄umoja wanyu na Kristi-Insa.

²⁹ Na neka wanyu wa Kristi, v̄av̄o mwa zilembwe za Iɓrahima, tsena mwa mawarithi ha uɗunga uwahadi.