MAFILIPI 1 - Ha`bari Ndjema ya I Maore

¹ Ɓaulusu na Timutausu, warumishi wa Kristi-Insa, ha piya watwaharifu hari mwa uv̄umoja wawo na Kristi-Insa walio ɗagoni Filipi, ha yamadhwamana na wasaidizi:

² Rehema na utrulivu nazimuendreleyeni ha ulawa ha Ɓaɓatru Mungu na Raɓi Insa-Kristi.

Mamilio na himida ha yaMafilipi

³ Nisumuhimidia Mwalangu Mungu kula namomunahanani.

⁴ Kula namomumiliani piyanyu, wami umilia ha furaha,

⁵ ha siɓaɓu ya lifuvu mulirengao hari mwa iIndjili rangu isuku ya handra ata leo.

⁶ Tsina yakini na itrongo ini, amba Monyewe uandrisa hazi ndzuzuri iyo moni hanyu, atsoendrelea ha uikamilisha mupaka isuku ya umuregeo wa Kristi-Insa.

⁷ Iyo haki neka nisumufikirini piyanyu namuna iyo, mana nisumuv̄ingani rohoni, wanyu mulio amba neka hari mwa zifungo za silisili zangu, mauri hari mwa idifaĩ na uhakikisha iIndjili, musurenga fuvu piyanyu hari mwa ineema nadjaãliwayo.

⁸ Kweli amba shahidi Mungu ha uv̄endza nilionayo na wanyu piyanyu, uv̄endza wa Kristi-Insa.

⁹ Iyo niitsahao hari mwa mamilio yangu, ɗe amba uv̄endza yanyu yendre na uzidishiha ujuzi wa kweli, na wanyu ushindra muelewe ha ukamilifu zitrongo,

¹⁰ pare mujuwe mutsahuwe ilio mahususu, tsena muke wa kweli ɓila tuhuma isuku ya umuregeo wa Kristi,

¹¹ amwesa ike amba mujadziwa mavuna ya uhaki yajao ha indzia ya Insa-Kristi, ha utukufu na sifa ya Mungu.

Muendreleo-mbeli wa iHaɓari Ndjema

¹² Nisutsaha mujuwe, wananyangu, amba izo zanipara, ha kinyume zitsongesha umuendreleo-mbeli wa iIndjili.

¹³ Kweli amba moni na piya lidjumba la umuɓole wa isirikali, mauri ɗe hari mwa piya yimikaɓala yangina, iv̄enuha amba tsa hari mwa zifungo za silisili ha siɓaɓu ya Kristi.

¹⁴ Ha zifungo za silisili zangu ɗe uwengi wa wananya wa shi uaminifu wangia ɓari hari mwa uv̄umoja wawo na Raɓi, ata wasuɓutuo wajudze Urongozi wa Mungu ɓila trisidzo.

¹⁵ V̄wa ɓaãdhwi kweli wamujudzao Kristi ha uwivu na mashindrano, ɓadi wasalia ha nia ndjema.

¹⁶ Wao wasuifanya ha mahaɓa, iv̄o wajuao amba tsa v̄anu ha uwania iIndjili.

¹⁷ Na wa handra wale umujudza Kristi ha mashindrano, wala tsi ha umo warahara. iNia yawo ɗe ufanya namuna amba zifungo zangu zizidi uka ndziro.

¹⁸ Kav̄u taãɓu! Ha namuna yotsi itsokao, neka ha umo munafiki au warahara, Kristi asujudzwa. Na wami nisujiv̄iwa nayo. Amwesa nitsojiv̄iwa raha,

¹⁹ mana nisujua amba iyo itsoniv̄ingia uhuyifu ha mamilio yanyu, na ha umusada wa iRoho ya Insa-Kristi.

²⁰ Trongo naiv̄a matso ha kusudi niitumainiao, ɗe amba tsitsoona haya na itsokao yotsi, ɓadi nike na uhodari watsimu, amba rangu av̄asa ata ha daima, Kristi atsotukuziwa mwilini hangu, neka tsa hayi, au neka tsifu.

²¹ Mana hanguju uhayati wangu ɗe Kristi, na ufa, uwo tanafu.

²² Ɓadi neka amba uka hayi duniani v̄anu itsonidjaãlia hazi yendza mavuna, tsisujua iv̄i ɗe nitsahuwe.

²³ Nisuvurwa uv̄andre iyo mili: tsina ushauku wa ulawa tsena nike na Kristi, mana iyo ɓorwa mbali tu.

²⁴ Ɓadi uɓaki ulemenguni ina mana zaidi ha siɓaɓu ya wanyu.

²⁵ Ɓasi tsina yakini na wiyo, nisujua amba nitsoɓaki, tsena nitsoendrelea na wanyu piyanyu ha siɓaɓu ya umuendreleo-mbeli wanyu, na ifuraha hari mwa uaminifu wanyu,

²⁶ ile ha wami uzidi siɓaɓu ya udzifaharisha hari mwa uv̄umoja wanyu na Kristi-Insa, wakati nitsorudio hanyu.

²⁷ Ɓadi namudziv̄inge ha namuna yastahiki iIndjili ya Kristi, ile pare neka nisuja nimuoneni, au tsisuja, nikiye amba musiki hodari ha nia moja, amwesa ha ãzima moja musuwanilia uaminifu wa iIndjili,

²⁸ ɓila udzilisha murisidziwe na itsokao yotsi na wao walio kinyume. Hawo uwo udhiɓitifu wa uangamifu, ɓadi yahusu wanyu, wa uhuyifu; na iyo isulawa ha Mungu.

²⁹ Kweli amba yahusu Kristi, mudjaãliwa irehema tsi tu amba ya utria uaminifu wanyu hahe, ɓadi tsena ya uondesheha ha siɓaɓu ya waye,

³⁰ ha uwania kondro wiyo-wiyo na iyo mwaona hangu, tsena munikiao nayo raha.