MAEFESO 6 - Ha`bari Ndjema ya I Maore

Yahusu wana na wadzaɗe wawo

¹ Wanyu wana, namutuĩ wadzaɗe wanyu hari mwa uv̄umoja wanyu na Raɓi, mana iyo haki.

² Mauri ɗe iheli yaangihwa: «Muhishimu ɓaɓaho na mayaho», na iyo ɗe iãmuri ya handra yaɗungwa na wahadi amba:

³ «pare uke ha uzuri, tsena uẽshi wakati mwengi shiv̄andreju mwa tsi.»

⁴ Na wanyu maɓaɓa, musutukize wana wanyu, ɓadi namuwalele ha uwafundra na uwav̄a mifahamisho yalawa ha Raɓi.

Yahusu warumwa na warumisa

⁵ Wanyu warumwa, namutuĩ warumisa wa shiulemenguni wanyu ha trisidzo v̄umoja na staha, tsena ha umo warahara, mauri musumurumishia ɗe Kristi.

⁶ Tsi amba matsoni hawo tu mauri musutsaha mujiv̄idze wanadamu, ɓadi mauri warumwa wa Kristi, wafanyao ha piya umo wawo mav̄endzeleo ya Mungu.

⁷ Namuwarumishiye ha roho yarahara, mauri warumwa wa Mola, ɓadi tsi wa wanadamu,

⁸ ha ujua amba kula mutru, neka murumwa au munafasina, atsopara ha Mola thawaɓu ya indjema atsoifanyao.

⁹ Na wanyu warumisa, namurendre ɗe wizo-wizo ha warumwa wanyu. Namudziziye uwarisidza, ha ujua amba Mwalawo amma wanyu a mbinguni, na haheju kav̄usi utsahulivu wa mwanadamu.

Zombo za kondro za shiroho

¹⁰ Ha umalidza, namuhodarishiwe hari mwa uv̄umoja wanyu na Raɓi, ha zinguvu zendza ushindzi zahe.

¹¹ Namupindre piya zombo za kondro za Mungu, ile mushindre mukingiye yimipango ya Iɓilisa.

¹² Mana tsi kinyume na damu na nyama ɗe riwanao, ɓadi kinyume na zingutawalizi, ziyezi, zinguvu zashilidza zitawalao hari mwa ulemengu wa shidza unu, tsena kinyume na djeshi ɓovu la roho lilio mbinguni.

¹³ Ɓasi namurenge piya zombo za kondro za Mungu, ile mushindre mukingiye isuku mbovu iyo, amwesa ɓaanda itsokao amba muhisa ufanya piya, muhime wahodari.

¹⁴ V̄av̄o namukaze, mufunge mukandra wa ukweli trengani, amwesa mupindre uhaki ike ngwezi ya shuma.

¹⁵ Namufanye amba magoshi mindruni hanyu iãzima ya ujudza iIndjili ya iamani.

¹⁶ Hali yotsi itsokao, namusike ikinga ya uaminifu ilio amba ha wiyo, mutsoshindra muzime piya mafumo ya moro ya uMovu|Movu.

¹⁷ Namurenge tsena ikofia ya shuma ya uhuyifu, na upanga wa iRoho ulio ɗe Urongozi wa Mungu.

¹⁸ Namufanye kula wakati ha iRoho kula aina ya ĩɓada na mamilio. Na v̄av̄o, namuke hashiri wala musulemewe ya umilia piya watwaharifu.

¹⁹ Namunimiliye na wami wajau, pare kula namoɓua ihanyo urongozi niv̄olwewo, ile nijudze ha uhodari iãdjaɓu ya iIndjili,

²⁰ ilio amba ha wiyo tsa wakala hari mwa silisili, ile pare niijudze ha uhodari, mauri ɗe inamuna yalazimu.

Masalamu ya mwiso

²¹ Ha wanyu wajau ujua inamuna nilio na iyo nifanyao, Tihikusa alio hari mwa uv̄umoja na Raɓi mwananya muv̄endzewa, tsena murumishi muaminifu, atsomujudzani piya zihaɓari.

²² Nisumuv̄elesheaniwo ha kusudi pare mujuwe ihali rilio, tsena amutriyeni ɓari ziroho.

²³ Utrulivu na uv̄endza, v̄umoja na uaminifu, trongo zilawao ha Mungu amma Ɓaɓa na Raɓi Insa-Kristi, naziendreleye ha uwananya wa shi uaminifu.

²⁴ Urehema nauendreleye ha piya wamuv̄endzao Raɓi watru Insa-Kristi ha uv̄endza kaukomo.