MAEFESO 5 - Ha`bari Ndjema ya I Maore

¹ V̄av̄o namuke watiɓizi wa Mungu, iv̄o mulio wana wav̄endzewa wahe.

² Namuẽshi ha maendreleo ya uv̄endza, mauri ɗe inamuna Kristi wajau ariv̄endza, adzitoa fidia monyewe ha Mungu ha tanafu yatru, ake kafara amma sadaka linukao tro.

³ Trongo ya zina, utshafi wa kula namuna, au uv̄endza-upara, zasurongoleshehe ata hata hari mwanyu, mauri ɗe inamuna yastahiki ha watwaharifu.

⁴ V̄usuke marongozi yendza aĩɓu, ya shi ugedze, wala mayi; izo tsi ndzuzuri. Ɓadi ha kinyume, namukane marongozi yendza himida.

⁵ Mana namujuwe ha uzuri trongo ini amba: kav̄usi mwendza taɓia mbovu za shahawa, zendza utshafi, au za uv̄endza-upara, trongo ilio sawa na uãɓudu masanamwe, atsokao na fungu hari mwa umwaratha wa Utawalizi wa Kristi na Mungu.

Uẽshi hari mwa heu

⁶ V̄usuke ata mutru amudanganyani ha marongozi kayana mana, mana ɗe ha siɓaɓu ya izo, ɗe hadhaɓu ya Mungu ijiliao watru kawasumutuĩ.

⁷ Ɓasi mwasushangiriane na wao.

⁸ Kweli amba hale hule muka shidza, ɓadi av̄asa, mwa heu ha uv̄umoja wanyu na Raɓi. Ha izo namuẽshi shi watru wa heu,

⁹ mana mavuna ya heu ɗe kula uwema, uhaki na ukweli.

¹⁰ Namutsahe mujuwe zimujiv̄iao Raɓi;

¹¹ musurenge fuvu hari mwa zitrendrwa za shidza zilio amba kazina faida, ɓadi ha kinyume namuziv̄enuwe.

¹² Mana izo wafanyao ha siri, ata ya uzirongoa ne aĩɓu.

¹³ Ɓadi piya izo zamov̄enulwa, uonehana hari mwa iheu,

¹⁴ mana kula yav̄enulwa ufanyiha heu. Iyo ɗe imana ata v̄urongolwao: «Hima, wawe wasindzia, dzimidze hari mwa uwafu, na Kristi atsohuwalia.»

¹⁵ Namutunde ha uzuri ɓasi maendreleo yanyu: yasuke mauri ya magedze, ɓadi yake mauri ya wendza hikima.

¹⁶ Namurumiye ha uzuri uwakati mulionawo, mana zisuku za mbovu.

¹⁷ Ɓasi v̄av̄o, mwasuke ɓila ãkili, ɓadi namuelewe amba mav̄endzeleo ya Mola ɗe yav̄i.

¹⁸ Mwasudzileze na ushi: uwo uv̄inga hari mwa uangamifu; ɓadi ha kinyume, namujaye na iRoho.

¹⁹ Namulaguliane ha ngutende, na madjimbo ya sifa, na himbo za shiroho. Namuhimbe na umusifu Mola ha piya ziroho zanyu.

²⁰ Daima namuhimidiye Mungu amma Ɓaɓa ha piya, ha lidzina la Raɓi watru Insa-Kristi.

²¹ Kula moja hari mwanyu nadzihetsi tayari ya utuĩ munyahe ha mastaha mulionawo na Kristi.

Maendreleo hari mwa ndrolo

²² Watruwashe, namudzihetsi watuĩvu ha waume wanyu, mauri ɗe inamuna mulio ha Raɓi.

²³ Mana mutrumume waye ɗe shitswa wa umutrumushe, mauri ɗe Kristi alio shitswa wa iDjama Ndziwaminifu ilio mwili wahe, waye alio uMuhuyifu wayo.

²⁴ Ɓasi mauri ɗe iDjama Ndziwaminifu iv̄o idzihetsio tayari ya umutuĩ Kristi, watruwashe nawake tayari ya utuĩ waume wawo hari mwa piya.

²⁵ Na watruwaume, kula moja nav̄endze mushe wahe, mauri Kristi namuna av̄endza iDjama Ndziwaminifu, adzitoa fidia ha siɓaɓu ya wiyo,

²⁶ ile aitwaharishe ɓaanda airahatsa na maji ha Urongozi,

²⁷ pare adzielesheye waye monyewe iDjama Ndziwaminifu ndzitukufu iyo kaina pandra ɓila mufiro, wala itsokao yotsi mufano wazo, ɓadi ndzitwaharifu kaina kosa.

²⁸ Ɓasi ha namuna iyo ɗe watruwaume walazimu kula moja av̄endze mushe wahe, mauri ɗe umwili wahe monyewe. Uwo av̄endzao mushe wahe, asudziv̄endza monyewe.

²⁹ Mana kav̄waparoka mutru aenga mwili wahe monyewe; ɓadi ha kinyume, waye uulisa na uuangalia ha uzuri, mauri ɗe Kristi namuna aifanyao ha iDjama Ndziwaminifu,

³⁰ mana wasi ziga za umwili wahe.

³¹ «Ɗe imana ata mutruɓaɓa atsolawao ha ɓaɓahe na mayahe ile adzifungamanise na umutrumushe wahe, na wao waili watsofanyiha mwili moja.»

³² V̄av̄o v̄wa ãdjaɓu ɓole, na wami yangu nisurongoa amba isumuhusu Kristi na iDjama Ndziwaminifu.

³³ Ɓadi namuna yotsi itsokao, kula moja mengoni mwanyu nav̄endze mushe wahe mauri ɗe waye monyewe, na mutrumushe astehi mume wahe.