MAEFESO 3 - Ha`bari Ndjema ya I Maore

Djukuma la Ɓaulusu ha watru tsi Mayahudi

¹ Iyo ɗe imana nimumiliaoni Mungu, wami Ɓaulusu, mufungwa wa Kristi-Insa ha tanafu yanyu, wanyu tsi Mayahudi,

² neka amba mwaparokia anga urumishi Mungu anidjaãliawo ha irehema yahe, amba niufanye ha tanafu yanyu.

³ Ɗe ha muv̄enulio ɗe najudziwa iãdjaɓu, mauri ɗe inamuna naiangiha ha wana harufu.

⁴ Mwamowasoma, mutsoshindra muone inamuna nielewao iãdjaɓu yahusu Kristi.

⁵ Ãdjaɓu iyo kayaka yajudziwa ha wana wa wanadamu hari mwa yimida yav̄ira, mauri ɗe inamuna yav̄enulwa av̄asa na iRoho ha watwaharifu wahe, yaãni Mav̄ingizi-Risala na wao wajudzao marongozi ya shi mutrume washukidziwawo,

⁶ na iyo ɗe amba: zinishani zangina zina mwaratha ɗe uwo-uwo, wa ziga za mwili moja uwo-uwo, tsena wana fungu hari mwa uwahadi uwo-uwo hari mwa uv̄umoja wawo na Kristi-Insa, ha ndzia ya iIndjili.

⁷ Tsifanyiha murumishi ha ineema ya irehema ya Mungu anidjaãliayo ha ndzia ya umurendreo wa ushindzi wahe.

⁸ Wami nilio umuv̄ungufu wa piya watwaharifu, tsidjaãliwa ineema ini ya ujudza ha watru wa zinishani zangina iHaɓari Ndjema ya utadjirifu wav̄iria shiv̄imo wa Kristi,

⁹ tsena ya utria heuni ha piya wanadamu umutrilio-ndziani wa iãdjaɓu yadzamisiha rangu zamani ha Mungu, Muumbizi wa piya.

¹⁰ Ini aifanya ile av̄asav̄anu zingutawalizi na zingushindzi zilio mbinguni zijuwe, ha ndzia ya iDjama Ndziwaminifu, ihikima ya Mungu ya kula namuna,

¹¹ ha uɗunga umupango wa kaɓula auhidjirisa ha Kristi-Insa, Raɓi watru.

¹² Hari mwa uv̄umoja watru na waye na ha ndzia ya uaminifu na waye, rina unafasi wa umukuruɓia Mungu v̄umoja na utumainivu.

¹³ Ɓasi nisumumiani, musupuhe ɓari na maondo niyav̄iriao ha siɓaɓu ya wanyu: yao ɗe utukufu wanyu.

Mamilio ya Ɓaulusu

¹⁴ Iyo ɗe imana nivundzao malondro mbeli za Ɓaɓa,

¹⁵ Monyewe alio amba kula udjama rangu mbinguni ata shiv̄andreju mwa tsi, iãswili yawo ulawa hahe.

¹⁶ Nisumumia amba ha utadjirifu wa utukufu wahe amudjaãliyeni ushindzi ha iRoho yahe, ile pare uutru wa moni hanyu uhodarishihe,

¹⁷ amba ha uaminifu Kristi aẽshi rohoni hanyu, na tsena amba musise mizi na uketsi hodari hari mwa itrongo ya uv̄endza,

¹⁸ amba mushindre muelewe, v̄umoja na piya watwaharifu, ngav̄i ɗe uv̄ana, ngav̄i ɗe uule, ngav̄i ɗe uuzimu na uundra wa uv̄endza ya Kristi,

¹⁹ tsena muijuwe uv̄endza ya Kristi iyo ilio amba isuv̄iria ujuzi, ha namuna amba mukamilishihe ujadziwa piya ukamilifu wa Mungu.

²⁰ Ɓasi ha Uwo ashindrao, ha ushindzi wahe urendrao hatruju, afanye ha uzidisha piya izo rimiao au rifikirio,

²¹ haheju utukufu naumuendreleye moni na iDjama Ndziwaminifu na hari mwa uv̄umoja na Kristi-Insa piya yimida, ha daima na daima! Amina.