MAEFESO 2 - Ha`bari Ndjema ya I Maore

Uhayati muv̄ia hari mwa uv̄umoja na Kristi

¹ Yamuhusuni wanyu, muka mufu ha yamahosa na madhambi yanyu,

² yalio amba mwakoyafanya ha uɗunga maendreleo ya ulemengu unu, mwakotuĩ umutawalizi wa iyezi ya hawani, lidjini lirendrao av̄asa ha wao kawatuĩ.

³ Na wasi piyasi wajau rika hari mwa ihisaɓu yawo, tsena rakoɗunga zingushauku za shiuɓinadamu zatru, rakofanya mav̄endzeleo ya yimili yatru na ya zifikira zatru; tsena ha ihali ya shiuɓinadamu yatru, rika ristahiki ihadhaɓu, mauri ɗe wasalia.

⁴ Ɓadi Mungu waye mutadjirifu wa poreho na ha siɓaɓu ya uv̄endza muɓole ariv̄endza,

⁵ wasi raka rafa ha yamahosa yatru, ariẽshisa v̄umoja na Kristi. Ɓasi ha rehema ɗe mwahuyiwa.

⁶ Hari mwa uv̄umoja watru na Kristi-Insa, Mungu ariregeza hayi v̄umoja na waye, tsena ariketsisa v̄umoja na waye hari mwa yimikaɓala ya pev̄oni,

⁷ ile aonese hari mwa yimida yijao utadjirifu wazidishiha wa urehema wahe aridjaãliawo ha uwema wahe hari mwa uv̄umoja watru na Kristi-Insa.

⁸ Mana ha rehema ɗe mwahuyiwa, ha ndzia ya uaminifu. Na iyo kaisuja ulawa hanyuju, ɓadi iyo ɗe ineema ya Mungu.

⁹ Na iyo kaisi ata hata ha zitrendro, ile v̄usuke ata mutru ajua udziɓua.

¹⁰ Mana wasi ra ɓuumbio lahe, riumbwa hari mwa uv̄umoja na Kristi, pare rifanye zitrendro ndjema Mungu azitayarisha rangu kaɓula amba rizifanye.

Uv̄umoja wa watru wa mbali na mbali ha uaminifu wawo na Kristi

¹¹ Namunahane ɓasi wanyu mulio amba ha ãswili, wanyu wa nishani zangina muhiriwao «tsi matahiriwa» na wao wadzihirao «matahiriwa», trongo yafanyiwa mwilini ha muhono wa mwanadamu,

¹² amba wakati uwo mwakoka ɓila Kristi; muka v̄ondze na umati wa Israila, muka wadjeni na yimikataɓa|mukataɓa ya uwahadi, kamwakana tama wala Mungu ulemenguni.

¹³ Ɓadi av̄asa, hari mwa uv̄umoja na Kristi-Insa, wanyu mwaka mbali hale hule, mukuruɓisiwa ha idamu ya Kristi.

¹⁴ Mana waye ɗe amani yatru, waye alio amba afanya amba waili wale wafanyihe moja; ha utoa fidia umwili wahe, akomoa uuhura wa mutsapushiano, ne ɗe uãduwi.

¹⁵ Azimi hatwi iSharia na ziãmuri zayo na masharutwi yazo, ile hari mwa uv̄umoja na iwaye yahe, afanye amba waili wale wake mutru moja muv̄ia ha ujisa iamani,

¹⁶ na uwaparanisa na Mungu wao waili ha mwili moja, ha ndzia ya umuri wa pawa: na v̄av̄o aangamidza uãduwi.

¹⁷ Aja ajudze ihaɓari ya amani ha wanyu mulio amba muka mbali, na iamani ha wao waka kariɓu.

¹⁸ Kweli amba ha ndzia yahe wasi waili risujua rimukuruɓia Ɓaɓa, ha Roho moja wiyo-wiyo.

¹⁹ Ɓasi ha izo, kamusi tsena wadjeni wala watru wa v̄ondze, ɓadi muna uraĩa moja na watwaharifu, mwa hari mwa udjama wa Mungu.

²⁰ Muja muundrwa hari mwa umusingi wafanyiha ha yaMav̄ingizi-Risala|Mav̄ingizi-Risala na yimitrume, musingi ulio amba Insa-Kristi waye-waye ɗe liɓwe la nyongaju.

²¹ Hari mwa waye ɗe piya liɓundro lafungamanisiha, lihimao like nyumba ndzitwaharifu ilio ya Mola.

²² Ɗe hari mwa uv̄umoja na waye, ɗe wanyu wajau mwaundrwa v̄umoja, pare muke makazi ya Mungu ayaketsiao ha iRoho.