LUKASI 3 - Ha`bari Ndjema ya I Maore

Maĩdhwa ya Yahaya Muɓaĩshizi

¹ uMwaha wa kumi na tsano wa iyezi ya Kaiswara Tiɓeriusu, Pontiusu Ɓilatusa aka atawala iYudeya, Hirudu akoendresa iGalilaya, mwananyahe Filiɓusa yimikaɓala ya Iturea na Trakoniti, na Lisaniasa iAɓileni.

² Tsena, Anasi na Kayafasi waka ɗe Matolezi Maɓole ya Masadaka. Uwo ɗe uwakati urongozi wa Mungu wamushukia Yahaya, mwana wa Zakariya, padzaju.

³ Andre hari mwa piya yimikaɓala djirani na uMuro wa Jurdani, akoĩdhia watru wandre toɓa pare madhambi yawo yaswamihiwe, toɓa yashadidishiwa na umuɓaĩsho ha maji.

⁴ Mauri ɗe iheli v̄waangihwa moni na ishio yav̄inga ya marongozi ya mutrume Izaya: «Lini ɗe liji la mutru ashelemedzao padzaju: ‹Namutayarishe indzia ya Mola, namuondzowe v̄ahanu atsov̄irao.

⁵ Kula goɓea litsofitsiwa, na kula ngu na kula mulima utsoɗarisiwa. Zandra gori zitsoondzolwa, na zindzia mbovu zitsorengeledzewa.

⁶ Tsena, piya wanadamu watsoona ukombozi wa Mungu.› »

⁷ Ɓas, akoambia idunia yakoja iɓaĩshiwe ha maji: «Wanyu kaɓila za nyoha zendza sumu! Mbani ɗe amuambiani amba mutsoshindra mutrale ihadhaɓu ijao?

⁸ Namuv̄enuwe mavuna yastahiki watru wandra toɓa, wala musuketsi mwadziambia amba: ‹Wasi rina Iɓrahima amba mudzaɗe watru.› Mana nisumuambiani, ata hari mwa yamawe yanu, ne Mungu ushindrotoa zilembwe za Iɓrahima.

⁹ Na v̄anu madza lisoha lilishwa miziju mwa yimiri. Kula muri kauv̄a mavuna mema utsokatrwa, uvutswe moroju.»

¹⁰ iDunia ile imudzisa: «V̄av̄o rifanye trini?»

¹¹ Awadjiɓu: «Monyewe ukana nguo mbili, naanyise na ule kasina ata hata, na uwo aliona shahula, nafanye namuna ɗe wiyo iyo.»

¹² V̄ale tsena v̄umujilia maliv̄isa-latete, ile waɓaĩshiwe ha maji. Wamudzisa: «Fundi, wasi rifanye trini?»

¹³ Awadjiɓu: «Mwasuliv̄ise yazidi iyo mwaãmurishiwa.»

¹⁴ Madjeshi wajau waja wamudzisa: «Ẽhẽ wasi, ilazimu rifanye trini?» Awadjiɓu: «Musuv̄osheye atsokao yotsi shitru yahe, wala mususingidziye mutru trambo, ɓadi mutoshehe na umushahara wanyu.»

¹⁵ Ɓaanda watru waka ju la ulindra na tama ɓole, na kula mutru akodzidzisa rohoni yahusu Yahaya, neka waye tsi ɗe Kristi,

¹⁶ awaambia piyawo: «Wami nisumuɓaĩshani ha maji. Ɓadi v̄usuja mwendza ushindzi rahana wami, alio amba tsastahiki ata uɓulia ngwe za kaɓwa zahe. Na waye atsomuɓaĩshani ha iRoho Ndzitwaharifu, na ha moro.

¹⁷ Mihononi hahe asiki utseo wahe, ile atenge liguru na zitrundra, azigamise kanyani. Ɓadi atsovudza liguru moni na moro kauzimiha ha daima.»

¹⁸ Ɓas ha marongozi mengi yangina, ɗe Yahaya akoĩdhia watru na uwajudza iHaɓari Ndjema.

¹⁹ Ɓadi wakati dhwamana Hirudu arudisiwa na Yahaya ha siɓaɓu ya trongo yahe na Hirudiyati, mutrumushe wa mwananyahe, na zitrendrwa mbovu nyengi zangina azifanya,

²⁰ ɗe v̄ahanu waye Hirudu aengedza mbovu yangina ha umutria Yahaya shiv̄ani.

Muɓaĩsho wa Insa

²¹ V̄ale piya watru wakoɓaĩshiwa, Insa wajau aɓaĩshiwa. Na wakati aka hari mwa mamilio, uwingu uɓuha,

²² na iRoho Ndzitwaharifu imushukia ha mufano wa shukuru. Amwesa v̄ulawa ji mbinguni, lirongoa: «Wawe ɗe uMwana wangu muv̄endzewa; wami ujiv̄iwa halisi na wawe.»

iNasaɓa ya Insa

²³ Insa akana mukaɓala wa maha thalathini wakati aandrisa zihazi zahe. Namuna watru wakofikiri, aka mwana wa Yusufu. Na Yusufu waye aka mwana wa Heli,

²⁴ mwana wa Matati, mwana wa Lawi, mwana wa Melki, mwana wa Yanai, mwana wa Yusufu,

²⁵ mwana wa Matatiasa, mwana wa Amosi, mwana wa Nahumu, mwana wa Hesli, mwana wa Nadjayi,

²⁶ mwana wa Mahati, mwana wa Matatiasa, mwana wa Shemeyi, mwana wa Yuseku, mwana wa Yuda,

²⁷ mwana wa Yuhanana, mwana wa Resa, mwana wa Zuruɓaɓeli, mwana wa Salatiyeli, mwana wa Niri,

²⁸ mwana wa Maliki, mwana wa Adi, mwana wa Kusamu, mwana wa Elmadama, mwana wa Heri,

²⁹ mwana wa Yushua, mwana wa Eliezeri, mwana wa Yurimu, mwana wa Matati, mwana wa Lawi,

³⁰ mwana wa Simeona, mwana wa Yuda, mwana wa Yusufu, mwana wa Yunamu, mwana wa Eliakimu,

³¹ mwana wa Meleya, mwana wa Mena, mwana wa Matatha, mwana wa Nathani, mwana wa Daudu,

³² mwana wa Isayi, mwana wa Uɓedi, mwana wa Ɓuazi, mwana wa Salmuna, mwana wa Nashunu,

³³ mwana wa Aminadaɓu, mwana wa Admini, mwana wa Arni, mwana wa Hasruna, mwana wa Ɓeresi, mwana wa Yuda,

³⁴ mwana wa Yaãkuɓu, mwana wa Isiaka, mwana wa Iɓrahima, mwana wa Tera, mwana wa Nahori,

³⁵ mwana wa Seradji, mwana wa Rehu, mwana wa Ɓelegi, mwana wa Eɓeri, mwana wa Sala,

³⁶ mwana wa Kainamu, mwana wa Arfaksadi, mwana wa Shemu, mwana wa Nuhu, mwana wa Lameki,

³⁷ mwana wa Metusela, mwana wa Henoki, mwana wa Yaredi, mwana wa Mahalaleli, mwana wa Kainani,

³⁸ mwana wa Enoshi, mwana wa Sethi, mwana wa Adamu, mwana wa Mungu.