LUKASI 24 - Ha`bari Ndjema ya I Maore

Muregeo hayi wa Insa

¹ Asuɓuhi na mapema ya iSuku ya handra ya umufumo, yaãni Mufumov̄ili, watruwashe wale warenge yamatra manukatro waka wayarengeledza, wandre kaɓurini.

² Wapara amba liɓwe laka latrilwa mulongoju mwa likaɓuri, liv̄ingirisiwa.

³ Ungia yawo, kawapara umwili wa Raɓi Insa.

⁴ Sa ile waremwa na ushangavu na itrongo ile. Ɓas, v̄uwav̄enushia watruɓaɓa waili, wakana nguo zakov̄ev̄ena.

⁵ Waremwa na trisidzo, ata wanyamisa sura zawo v̄otsi. Ɓadi watru wale wawaambia: «Manatrini muzunguhao mutru alio hayi hari mwa uwafu?

⁶ Kav̄o v̄anu, ɓadi aregezewa hayi! Namunahane zitrongo akomuambianizo wakati raha aka Galilaya,

⁷ iv̄o akorongoa: ‹Ilazimu uMwana wa Mwanadamu av̄elehwe mihononi ha watru maãswifu, aremwe mizumari hari mwa muri wa pawa, amwesa isuku ya raru aregeye hayi.› »

⁸ Sa ile wanahana yamarongozi ya Insa yale.

⁹ Urudi yawo ulawa kaɓurini hule, wajudza piya trongo zile ha kumi na moja wale na ha piya wasalia.

¹⁰ Wao wakoambia yaMav̄ingizi-Risala trongo zile waka ɗe Mariama wa Magidala, Yuhana, Mariama mayahe wa Yakoɓu, na uwatruwashe wasalia waka na wao.

¹¹ Ɓadi yaMav̄ingizi-Risala waono marongozi ya watruwashe wale mauri upuzi, ata kawakowaamini.

¹² Ɓadi Monye ahimi, areme mbio andre kaɓurini hule. Unyama yahe ha utsungia, kaona neka tsi ɗe zitamba zaka v̄otsi. Amwesa aregea hahe ha ushangavu na itrongo yaka yahidjiri.

Insa asuv̄enushia watru waili hari mwa indzia ya Emausu

¹³ Ɓasi suku ɗe wiyo ile, v̄ulawa maswihaɓa maili ya Insa yakwendra hari mwa mwana ɗago ahiriwao Emausu, aka aɓaushiana na Yerusalemu hari mwa mwendro wa sa mbili.

¹⁴ Na wao wakohadisiana piya trongo zile zaka zahidjiri.

¹⁵ Ɓas, v̄ale waka ju la ulagua na uzihadisi, ɗe Insa waye-waye awajilia, aɗungana na wao.

¹⁶ Ɓadi matso yawo yaka yaɓalidziwa yasumujuwe.

¹⁷ Awaambia: «Trini ɗe mwendrao na uilagua, ata yamutriani hamu namuna iyo?»

¹⁸ Moja mengoni mwawo ahiriwao Kleoɓasu, amudjiɓu: «Hari mwa piya wadjeni walio Yerusalemu, wawe tu ɗe kwajua trongo zahidjiri zisuku zini?»

¹⁹ Sa ile awadzisa: «Trongo trini?» Ɓas, wamudjiɓu: «Ɗe zapatana na Insa wa Nazareti. Aka mutrume mwendza ushindzi hari mwa zitrendro na marongozi mbeli za Mungu na mbeli za piya wanadamu.

²⁰ yaMatolezi Maɓole ya Masadaka na makizi-mbeli watru, wamuv̄eleha andre ahukumulwe aulawe, amwesa wamurema mizumari hari mwa muri wa pawa.

²¹ Na wasi rakotumaini amba waye ɗe atsokomboao iIsraila. Ɓaanda ya v̄av̄o, leo suku ya raru rangu trongo zizo piya zahidjiri.

²² Na tsena ɓaãdhwi ya watruwashe mengoni mwatru warishangidza ha kusudi. Asuɓuhi na mapema wandre kaɓurini,

²³ wala kawapara umwili wahe. Waja warongoa amba v̄uwav̄enushia malayika, ziwaambia amba a hayi.

²⁴ Ɓaãdhwi ya watru waka v̄umoja na wasi wandre kaɓurini hule, amwesa wapara zitrongo mauri ɗe inamuna watruwashe wale waka wazirongoa; ɓadi waye, kawamuona.»

²⁵ Sa ile Insa awaambia: «He wanyu kamuna ãkili muliona roho ndziro za uamini piya izo zarongolwa na yimitrume!

²⁶ Hali kayaka yalazimu Kristi aondesheha na trongo zizo, iv̄o angia hari mwa utukufu wahe?»

²⁷ Ɓas, ha uandrisa na Musa na piya yimitrume, awaeledza zitrongo zaangihwa zapatana na waye moni na piya yimiangishio.

²⁸ Wakati waka kariɓu na liɗago wakwendra, afanya mauri akotsaha andre mbeli,

²⁹ ɓadi wamuzia ha umuambia: «Ɓaki na wasi, mana jua litso, uku usujongia.» Ɓas, angia amba aɓaki na wao.

³⁰ Wakati aka mezaju na wao arenge dipe, na ɓaanda ahimidia Mungu, alikutrua, amwesa awav̄alo.

³¹ Sa ile matso yawo yaɓuha, ata wamujua. Ɓadi v̄ale azimia mbeli zawo.

³² Ɓas, wakoambiana wao na wao: «Hali roho yatru kayakovua moni hatru wakati akorihadisia ndziani na urieledza yimiangishio?»

³³ Wahimi kamwe sa ile, waregea Yerusalemu, wandre wapara kumi na moja wale wangulidzana na wasalia waka na wao,

³⁴ waambilwa: «Ha kweli Raɓi aregea hayi, amuv̄enushia Simoni.»

³⁵ Ɓas, wawaambia izo zawahidjiria ndziani na inamuna wamujua hari mwa umukutrulio wa lidipe.

Insa asuv̄enushia maswihaɓa yahe

³⁶ V̄ale waka ju la ueledzana trongo zile, Insa waye-waye ahimi hari-hari na wao. Awaambia: «Salama naimuendreleyeni.»

³⁷ Ha inamuna wasikwa na trisidzo na faza, wakoona mauri wav̄enushiwa na mufu.

³⁸ Ɓadi awaambia: «Manatrini mwamenyeha ziroho zanyu, muliona fikira za udzidzisa rohoni?

³⁹ Namuangaliye yimindru na yimihono yangu, ha kweli ɗe wami. Namunisike muone, mufu kakana nyama, wala miɓa, mauri ɗe iheli munionao.»

⁴⁰ Iv̄o akorongoa trongo zile, awaonesa yimihono na yimindru yahe.

⁴¹ Ɓasi ɓaanda raha kawakoamini ha siɓaɓu ya ifuraha na ushangavu wawo, awadzisa: «Muna shitru ya uɗya v̄anu?»

⁴² Wamuv̄a gudru la fi yaohwa;

⁴³ alirenge, aliɗyi mbeli zawo v̄ale.

⁴⁴ Amwesa awaambia: «Zini ɗe nakomuambianizo wakati raha naka v̄umoja na wanyu, amba piya trongo zanihusu zaangihwa moni mwa iSharia ya Musa, yimitrume na iZaɓuri, zilazimu zitsimidzihe.»

⁴⁵ Ɓas, awaɓulia zifikira pare waelewe uMuangishio Mutwaharifu.

⁴⁶ Awaambia raha: «Tsizini zaangihwa: Kristi ilazimu aondeshehe, amwesa aregezewe hayi ha ulawa ufaju isuku ya raru.

⁴⁷ Na itrongo ya uendra toɓa na yamadhambi yaswamihiwa, zilazimu zijudziwe ha lidzina lahe ha piya zinishani, uandrisa rangu Yerusalemu.

⁴⁸ Wanyu mwa mazahidi wa trongo zizo.

⁴⁹ Na wami nitsomuv̄elesheani itrongo Ɓaɓangu aitolea wahadi. Ɓadi wanyu, namuɓaki ɗagoni ata mupaka mupindrisiwe ushindzi wa uju.»

Insa asuhea pev̄oni

⁵⁰ Amwesa awav̄ingi ata mukaɓala wa Ɓaitihaniya. Adzua yimihono, awaɓariki.

⁵¹ Ɓas wakati akowaɓariki v̄ale, awaɓaushia, ahedzewa andre pev̄oni.

⁵² Na wao ɓaanda wamuãɓudu, waregea Yerusalemu na furaha ɓole.

⁵³ Ha dahari-dahari wakoka moni na iNyumba Ndzitwaharifu ha [umusifu] na umutukuza Mungu.