LUKASI 23 - Ha`bari Ndjema ya I Maore

Insa mbeli za Ɓilatusa

¹ Amwesa wahimi piyawo, wamuv̄ingi Insa mbeli za Ɓilatusa.

² Waandrisa umusingidzia ha urongoa: «Rimupara mutru unu akosariɓia watru watru ha uwaɓalidza wao uliv̄a latete ya Kaiswara, na udzihira waye monyewe amba ɗe Kristi, Mufalume.»

³ Wakati ule Ɓilatusa arongoa ha umudzisa: «Hali wawe ɗe Mufalume wa yaMayahudi?» Insa amudjiɓu: «Uirongoa.»

⁴ Ɓilatusa aambia yaMatolezi Maɓole ya Masadaka na idunia ile: «Tsisuona kosa lotsi ha mutru unu.»

⁵ Ɓadi watru wale wakoshadidisha urongoa: «Asutsotsa uumati ha usomedza hari mwa piya iYudeya, rangu Galilaya v̄ahali aandrisa, ata v̄anu.»

Insa mbeli za Hirudu

⁶ Wakati Ɓilatusa akia trongo ile, adzisa neka mutru ule aka Mugalilaya.

⁷ Ukia yahe amba Insa aka wa umukaɓala watawaliwa na Hirudu, amuv̄eleha ha Hirudu aka wajau Yerusalemu wakati ule.

⁸ Ɓasi wakati Hirudu amuona Insa, ajiv̄iwa ha kusudi, mana rangu hale akotsaha amuone, ha siɓaɓu ya zitrongo akokia zakorongolwa zapatana na waye, tsena akotama amba amuone afanye ãlama ya midjuza.

⁹ Amudzisa masuala mengi, ɓadi Insa kamudjiɓu ata shitru.

¹⁰ yaMatolezi Maɓole ya Masadaka na yaMafundi ya Sharia waka v̄ale wakomusingidzia ha uhali.

Insa asuhukumulwa andre aulawe

¹¹ Hirudu v̄umoja na madjeshi yahe wamudhili Insa. Ɓaanda wamushekedza, wamupindrisa na vao lakovaga, wamuregeza ha Ɓilatusa.

¹² Ɓas, suku ile kamwe Ɓilatusa na Hirudu waãdzana, mana hale waka maãduwi.

¹³ Ɓilatusa ahadhwirisha yaMatolezi Maɓole ya Masadaka, makizi-mbeli na idunia, awaambia:

¹⁴ «Muniv̄ingia mutru unu amba akosariɓia watru watsutsuhe. Na tsami tsimutafiti mbeli zanyu, wala tsamupara na kosa litsokao lotsi hari mwa zitrongo mumusingidzao nazo.

¹⁵ Wala Hirudu, mana amuregeza hatru. Na tsunu, mutru unu kafanya ata trongo istahikio waye uulawa.

¹⁶ Ɓasi nitsomujeledza ɓaanda atsoɓuɓulwao ha kusudi.»

¹⁷ [Na kula wakati wa musherehio aka alazimu awajeledzeye mufungwa moja.]

¹⁸ Ɓadi washelemedza djimlani piyawo: «Muule mutru uwo, urijeledzeye Ɓaraɓasi!»

¹⁹ Ule mutru aka atrilwa shiv̄ani ha siɓaɓu ya mutsutsuho waka wafanyishiha ɗagoni, tsena aka aula.

²⁰ Ɓilatusa alagua na wao tsena, mana aka ania amujeledze Insa.

²¹ Ɓadi wakoshelemedza: «Mureme mizumari hari mwa muri wa pawa! Mureme mizumari!»

²² Ɓilatusa awaambia ha mara ya raru: «Mbovu trini aifanya? Tsamupara na kosa litsokao lotsi lastahiki waye uulawa. Ɓasi nitsomujeledza ɓaanda atsoɓuɓulwao ha kusudi.»

²³ Ɓadi washadidisha ha keme ɓole ha utsaha amba arungiwe hari mwa muri wa pawa. Ɓas, keme zawo zikuɓalishiha.

²⁴ V̄ale Ɓilatusa arenge satua awakuɓaliye itrongo wakoitsaha.

²⁵ Ajeledza ule aka atrilwa shiv̄ani ha siɓaɓu ya mutsutsuho na iv̄o aka aula wakomutsaha, ɓadi awatolea Insa, wamurendre izo wakozitsaha.

Insa asuremwa mizumari hari mwa muri wa pawa

²⁶ V̄ale wakomuv̄inga Insa, wav̄itsana na Mukureniya akohiriwa Simoni akoja ha ulawa malavuni. Ɓas, wamutrihisa umuri wa pawa, auv̄inge, amuɗunge Insa.

²⁷ Aka aɗungwa na dunia ya watru, na watrumama wakomulilia na udzirema ishifuɓa ha huzuni.

²⁸ Sa ile Insa awazingia, amwesa arongoa: «Watruwashe wa Yerusalemu, mwasunililiye, ɓadi namudzililiye ɗe wanyu, na uwana wanyu.

²⁹ Mana v̄wa suku tsizo zijao amba watru watsorongoa: ‹Furaha ha wao kawasina ndzao, wendza trumbo kaladza na yamaɓele kayahamusa!›

³⁰ Wakati uwo, watru watsoambia yimilima: ‹Namurishukiye!› watsoambia uwana milima: ‹Namurifinikiye!›

³¹ Mana neka wasufanyia trongo zini muri mwitsi, v̄av̄o trini ɗe itsohidjirio hari mwa muri wahuma?»

³² Na v̄ale v̄uka v̄uv̄ingwa raha watru warendra-mbovu waili, wakwendra waulawe v̄umoja na Insa.

³³ Uwaswili yawo v̄ahanu v̄uhiriwao Kaka la Shitswa, wamureme mizumari v̄ale hari mwa muri wa pawa v̄umoja na warendra-mbovu wale, moja humeni hahe, na umoja potroni.

³⁴ [Sa ile Insa arongoa: «Ɓaɓa, waswamihi, mana kawasujua trongo waifanyao.»] Waanyisa zinguo zahe ha ufanya kuria.

³⁵ Dunia ika ihimi v̄ale yakoangalia. Tsena yamakizi-mbeli yakomushekedza na urongoa: «Ahuyi watru wangina, ɓasi nadzihuyi monyewe neka waye ɗe Kristi, uMutsahuliwa wa Mungu.»

³⁶ yaMadjeshi wajau wakomushekedza. Wandre kariɓu na waye ha utsaha wamunose siki.

³⁷ Wakorongoa: «Neka wawe ɗe umufalume wa yaMayahudi, ɓasi dzihuyi wawe monyewe.»

³⁸ Uju na waye v̄uka muangishio wakorongoa zini: Unu ɗe uMufalume wa yaMayahudi.

³⁹ Moja hari mwa warendra-mbovu wale waka waremwa mizumari v̄ale akomuruhana na urongoa: «Wawe mwa tsi ɗe Kristi? Ɓasi dzihuyi, urihuyi na wasi!»

⁴⁰ Ɓadi umoja amulagulia ha urongoa: «Wawe kuriyi Mungu, wawe ulio hari mwa mahukuma moja na waye?

⁴¹ Hatru ini haki, mana risuliv̄wa zastahiki zitrendrwa zatru. Ɓadi mutru unu kafanya kosa.»

⁴² Amwesa amuambia: «Insa, ninahane wamoja hari mwa ufalume waho.»

⁴³ Ɓas, amudjiɓu: «Nisuhuambia ha kweli, leo v̄anu utsoka pev̄oni v̄umoja na wami.»

Ufa wa Insa hari mwa muri wa pawa

⁴⁴ Na v̄ale ika mukaɓala wa sa ya sita ya mutsana. Ɓasi v̄ushuku shidza hari mwa piya ishiv̄andre ya tsi ata sa ya shendra.

⁴⁵ liJua lingia shidza, na umusutru wa iNyumba Ndzitwaharifu urandruha hari na hari.

⁴⁶ Sa ile Insa ashelemedza ha ji lendza nguvu: «Ɓaɓa, nisuv̄eleha iroho yangu mihononi haho!» Amohisa marongozi yale, av̄eha pumu ya mwiso.

⁴⁷ Dhwamana wa yamadjeshi uona yahe trongo zile zahidjiri v̄ale, amutukuza Mungu na urongoa: «Ha kweli mutru unu aka arahara!»

⁴⁸ Na piya idunia yakoangalia ɓaanda yaona trongo yaka yahidjiri, waregea dzawo ha udzirema ishifuɓa.

⁴⁹ Piya uwatru wakomujua Insa, v̄umoja na watruwashe waka wamuɗunga rangu Galilaya, waka wahimi mbali-mbali, wakoona piya trongo zakohidjiri v̄ale.

Madziho ya Insa

⁵⁰ V̄uka mutru akohiriwa Yusufu, mwana wa ishama ya uMungulidzano Muɓole. Aka mutru mwema, tsena mutuĩvu.

⁵¹ Waye kaka akuɓali zifikira na zitrendrwa za wanyahe; aka wa shi Arimatiya, ɗago la Mayahudi, na waye akolindra Utawalizi wa Mungu.

⁵² Mutru ule andre amupara Ɓilatusa, atsaha umwili wa Insa.

⁵³ Aushukidza muriju mwa pawa v̄ale, auv̄ambia shitamba ya kitani, andre autria moni na kaɓuri laka latsimbwa hari mwa mulima wa kawe, v̄ahanu raha kav̄waka v̄watrilwa mutru.

⁵⁴ Ika isuku ya Matayarisho, iSuku ya Uv̄umuzi yakoja ingiye.

⁵⁵ Ɓas, watruwashe waka waja na Insa rangu Galilaya wamuɗungu Yusufu, waono likaɓuri na inamuna umwili wa Insa wahetsiwa

⁵⁶ Amwesa waregea dzawo, wandre warengeledza matra manukatro na marashi. Na iSuku ya Uv̄umuzi wav̄umua ha uɗunga iSharia.