LUKASI 2 - Ha`bari Ndjema ya I Maore

uMudzalio wa Insa

¹ Hari mwa uwakati ule, Kaiswara Augusti atoa ãmuri v̄ufanyiwe hisaɓu ya piya uwakazi wa zitsi zatawaliwa na Romu.

² iHisaɓu ya handra iyo ifanyishiha wakati Kureniyusu aka wakala wa itsi ya Siriya.

³ Ɓas, piya uwatru wakwendra wadziangihe, kula moja hari mwa liɗago lahe.

⁴ Ha izo, Yusufu wajau alawa Nazareti ya iGalilaya ha uendra Yudeya hari mwa liɗago la Daudu lihiriwao Ɓaitilham, mana waye aka mutru wa umuraɓa na wa udjama wa Daudu,

⁵ pare aangihwe v̄umoja na mutsumba wahe Mariama, akana hamili.

⁶ Uka yawo hule, wakati wa Mariama udza uwaswili.

⁷ Aja adza mwana wa handra wahe, mutruɓaɓa. Amuv̄ambia nguo, amuladza moni na shiya ya zahula za zinyama, mana kawaka wapara ɓandza moni na inyumba ya wadjeni.

Malayika isuv̄enushia watsunga

⁸ Na mukaɓala ule v̄uka watsunga-maɓariɓari wakoketsi tobe, ile mauku wagogeye maɓangwe yawo.

⁹ Wakati ule malayika ya Mola ija iwav̄enushia na utukufu wa Mola uwawalia, ata waremwa na faza ɓole.

¹⁰ Ɓadi malayika ile iwaambia: «Mwasuriye, mana nisumujudzani haɓari ndjema itsov̄ingiao furaha ɓole umati piya.

¹¹ Mana leo ini, hari mwa liɗago la Daudu, mudzaliwa Muhuyifu, ne ɗe Kristi, Raɓi watru.

¹² Na ini itsoka ãlama hanyuju: mutsopara mwanazaza av̄ambiwa shitamba, aladzwa moni na shiya ya zahula za zinyama.»

¹³ Sa na isa ile, imalayika ijiliwa na dunia nyengi ya shi mbinguni, tsena zakomusifu Mungu na urongoa:

¹⁴ «Natukuzihe Mungu hari mwa yimikaɓala ya uju rahana uju, na amani shiv̄andreju mwa tsi ha wao awav̄a fadhwila.»

Watsunga-maɓariɓari wasendra Ɓaitilham

¹⁵ Wakati malayika zile zawaɓaushia amba zirudi mbinguni, watsunga wale waambiana wao na wao: «Narendre Ɓaitilham, raone trongo yahidjiri oho, iyo Mola arijudzayo.»

¹⁶ Ɓas walawa, ha uharaka wandre hule, wamupara Mariama na Yusufu, v̄umoja na umwanazaza ule aladzwa moni na shiya ya zahula za zinyama.

¹⁷ Ɓaanda wamuona, warongoa trongo waambilwazo zapatana na umwana ule.

¹⁸ Piya wao wawakia, washanga na trongo zile watsunga wale wakowaambiazo.

¹⁹ Mariama v̄ahe asiki piya trongo zile rohoni, akwendra na uzifikiri moni hahe.

²⁰ Na watsunga-maɓariɓari wale waregea dzawo ha umutukuza Mungu na umusifu, ha siɓaɓu ya piya zile wazikia na uziona, trongo zahidjiri piya namuna waka waambilwazo.

²¹ iSuku ya nane yamopara atahiriwa, av̄olwa lidzina la Insa, dzina laka lajudziwa mayahe na imalayika kaɓula ya waye umumira.

Insa asuyelehwa moni na iNyumba Ndzitwaharifu

²² Wakati wa utsimidza iSharia ya utawaza yaka yahetsiwa na Musa ukamiliha yawo, Yusufu na Mariama wav̄ingi umwana ule Yerusalemu, ile wamuyelehe ha Mola,

²³ ha uɗunga zini zaangihwa moni na iSharia ya Mola: «Kula mwana wa handra mutruɓaɓa atsotamaniwa Mola.»

²⁴ Tsena, wandre watowe lisadaka latsahwa na iSharia ya Mola: «Zukuru mbili, au wana ndiwa waili.»

²⁵ Na v̄ale v̄uka mutru ɗagoni Yerusalemu akohiriwa Simeona; aka mutru mutuĩvu mwendza djitihadi na zitrongo za Mungu, amwesa akositamia ukombozi wa Israila; tsena iRoho Ndzitwaharifu ika na waye.

²⁶ Aka av̄enushiwa na iRoho Ndzitwaharifu amba katsofariki raha kamuona uMutsahuliwa wa Mola.

²⁷ iRoho imuv̄ingi angia moni na iNyumba Ndzitwaharifu. Ɓaanda ɓaɓahe na mayahe wakomuv̄inga umwana Insa wamutsimidziye zile zatsahwa na iSharia,

²⁸ Simeona amurenge mihononi hahe, amutukuza Mungu na urongoa:

²⁹ «Av̄asa Mwalangu, ruhusu murumishi waho andre dzahe ha usalama, ha uɗunga urongozi waho,

³⁰ mana matso yangu yaono uwokovu waho,

³¹ uwokovu wautayarisha mbeli za watru piya,

³² mwenge uonesheye zinishani, tsena utukufu wa Israila, umati waho.»

³³ Ɓaɓahe na mayahe wa Insa wakotaãdjaɓu na zitrongo zakorongolwa zapatana na waye.

³⁴ Ɓas, Simeona awaɓariki, amwesa umuambia mayahe Mariama: «Kweli amba mwana unu ahetsiwa ake siɓaɓu ya umuusio na umuhimio ha watru wengi wa Israila, tsena ake ãlama itsotsongeshao ukinyume ha watru.

³⁵ Na wawe v̄aho, utungu utsohuforoa iroho mauri uroswa tshora, ile pare zifikira za umo wa watru wengi ziv̄enuhe.»

Hadisi ya Hanati, mutrumushe akojudza marongozi akoshukidziwawo

³⁶ V̄uka tsena ɓweni mutrume akohiriwa Hanati, mwana wa Fanueli, wa udjama wa Ashura. Akana maha mengi halisi, tsena aka aẽshi maha saɓa na mume wahe amulola mwanamutsa.

³⁷ Ufiliwa yahe na mume wahe, aɓaki mutsumba ata v̄anu atsimu maha thamanini na minne. Kakolawia iNyumba Ndzitwaharifu, ɓadi aka hari mwa ĩɓada mauku na mitsana ha ufunga na umia Mungu.

³⁸ Wakati ɗe uwo ule, angia v̄ale wajau, akomutukuza Mungu na umurongoa Insa ha piya wale wakolindra ukombozi wa Yerusalemu.

³⁹ Wakati Yusufu na Mariama watsimidza piya izo zakotsahwa na iSharia ya Mola, waregea Galilaya, ɗagoni hawo Nazareti.

⁴⁰ Na umwana ule akohua na uhodarishiha; ajaya hikima, na urehema wa Mungu uka ju lahe.

Insa moni mwa iNyumba Ndzitwaharifu wakati akana maha kumi na mili

⁴¹ Kula mwaha wadjemazahe wa Insa wakwendra Yerusalemu hari mwa Unahanizi wa Mutupio.

⁴² Wakati apara maha kumi na mili, wahea hule ha uɗunga imila ya uMusherehio.

⁴³ Ata suku za Unahanizi ukoma yazo, wakoregea dzawo, ɓadi mwanamutsa ule Insa aɓaki Yerusalemu, wala ɓaɓahe na mayahe kawafahamu.

⁴⁴ Wakofikiri amba aka v̄umoja na wanyawo wa musafara. Wafanya mwendro wa suku, amwesa wangia hazini ya umuzunguha hari mwa wadjemazawo na wandzani wawo.

⁴⁵ Ɓadi ɓaanda kawamupara, waregea Yerusalemu ha umuzunguha.

⁴⁶ Wamov̄ira suku traru, wamupara moni na iNyumba Ndzitwaharifu, aketsi hari-hari mwa mafundi, akowavulishia na uwadzisa masuala.

⁴⁷ Piya wao wakomukia wakoshanga na ihikima yahe na yamadjawaɓu yahe.

⁴⁸ Ɓasi wadjemazahe umuona yawo, washanga halisi. Sa ile mayahe amuambia: «Mwana wangu, manatrini warifanyia trongo ini? Tsasi wami na ɓaɓaho rakohuzunguha v̄umoja na huzuni ɓole.»

⁴⁹ Awaambia: «Manatrini mwakonizunguha? Hali kamwajua amba ilazimu nishahilihe na zitrongo za Ɓaɓangu?»

⁵⁰ Ɓadi v̄ale kawaelewa imana ya urongozi wahe ule.

⁵¹ Amwesa awaɗungu, washuku Nazareti, na waye akowatuĩ. Mayahe asiki piya trongo zile rohoni.

⁵² Na Insa akohua ha hikima na mwili, amwesa na fadhwila mbeli za Mungu na mbeli za uwanadamu.