LUKASI 19 - Ha`bari Ndjema ya I Maore

Hadisi ya Zakayi, muliv̄isa-latete

¹ Insa ɓaanda angia Jeriko, akov̄ira ha upasua liɗago.

² Ɓas, v̄uja mutru akohiriwa Zakayi, shitswa wa yamaliv̄isa-latete, na waye aka tadjiri.

³ Akotsaha aone amba Insa ɗe uv̄i, ɓadi kakoshindra ha siɓaɓu ya idunia, mana aka mukutri.

⁴ Areme mbio andre mbeli, ahea uju na muri pare amuone, mana akojov̄ira v̄ale.

⁵ Ɓas, wakati Insa awaswili mukaɓala ule, adzua yamatso, amuambia: «Zakayi, haraka ushuke, mana ilazimu leo nike ɗagoni haho.»

⁶ V̄ale kamwe ha uharaka Zakayi ashuku, amukariɓisa ha furaha.

⁷ Watru wale uona yawo trongo ile, wakonguruma piyawo na urongoa: «Andre aketsi ha mutru muãswifu.»

⁸ Ɓadi Zakayi ahimi mbeli za Raɓi, amuambia: «Mutukufu, tsami nisurenga inusu ya mali zangu, niiv̄e zimasikini. Na mutru yotsi atsokao amba tsimudanganya, nitsomuregezea shitru yahe ata mara nne.»

⁹ Sa ile Insa amuambia: «Leo uwokovu ungia muraɓani v̄anu, ha siɓaɓu amba unu wajau shilembwe ya Iɓrahima.

¹⁰ Mana uMwana wa Mwanadamu aja azunguhe na uhuyi wao wapotea.»

Mufano wa warumizi wadhwaminishiwa mali

¹¹ V̄ale wakovulishia trongo zile, na Insa awatolea raha mufano, mana aka kariɓu na Yerusalemu, na watru wakofikiri amba Utawalizi wa Mungu wakoja uv̄enuhe wakati ule kamwe.

¹² Ɓasi arongoa: «V̄uka mutru wa udjama mutukufu, akodzitayarisha uendra hari mwa tsi ya mbali pare andre av̄olwe ufalume, amohisa arudi.

¹³ Wakati ule ahiri kumi hari mwa warumizi wahe, awav̄a mapauni kumi, amwesa awaambia: ‹Namufanye ɓahazazi marike zini ata wakati nitsojao.›

¹⁴ Ɓadi watru wa itsi yahe wakomuenga; ɓas wav̄eleha watru mengoni hahe, wandre warongowe: ‹Wasi karisutsaha mutru unu aritawalia.›

¹⁵ Ɓasi uregea yahe ɓaanda av̄olwa ufalume, ahiri warumizi wale aka awav̄a zimarike, ile ajuwe ha namuna jeje kula moja aka azifayidisha.

¹⁶ Wa handra aja, arongoa: ‹Mutukufu, lipauni laho litria faida ya mapauni kumi.›

¹⁷ Amuambia: ‹Ufanya fetre, wawe murumizi mwema. Ha iv̄o waonesa uaminifu hari mwa trongo shashi, usuv̄olwa yezi hari mwa malago kumi.›

¹⁸ Wa v̄ili aja, amuambia: ‹Mutukufu, lipauni laho litria faida ya mapauni matsano.›

¹⁹ Amuambia: ‹Wawe wajau, usuv̄olwa yezi hari mwa malago matsano.›

²⁰ Na wangina aja, arongoa: ‹Mutukufu, lipauni laho tsilini, tsika tsiligamisa moni na nguo.

²¹ Mana nakohuria iv̄o ilio amba wawe muhali, wawe urenga shitru kwailisha, tsena uvuna shitru kwaitaɓu.›

²² Wakati ule murumisa ule amuambia: ‹Nisuhunamua ha yamarongozi yaho yao, wawe murumizi wa peu! Wakojua amba wami mutru muhali nirengao iyo ilio amba tsailisha, tsena nivunao iyo ilio amba tsaitaɓu.

²³ Ɓasi manatrini kwatria fedha yangu hari mwa djumba la marike, ile uregea yangu, naipara amba ingia faida?›

²⁴ Amwesa aambia watru waka v̄ale: ‹Namumurengeye lipauni lilo, muv̄elo ule aliona mapauni kumi.›

²⁵ Sa ile watru wale wamuambia: ‹Mutukufu, madza ana mapauni kumi!›

²⁶ ‹Nisumuambiani, uwo aliona, atsov̄olwa, ɓadi uwo kasina, atsorengewa ata iyo alionayo.

²⁷ Zaɓaki v̄anu, namuv̄inge hunu maãduwi yangu, wale kawakotsaha nawatawalia. Namuwav̄inge v̄anu, amwesa muwaangamidze mbeli zangu.› »

Insa asungia Yerusalemu na shime

²⁸ Ɓaanda ahisa urongoa trongo zile, Insa akilia mbeli idunia ile, ahea Yerusalemu.

²⁹ Wakati akuruɓia Ɓaitifadji na Ɓaitihaniya ha ukaɓili umulima uhiriwao Mulima wa Mizaituni, Insa akidza mbeli waili hari mwa maswihaɓa yahe, awaambia:

³⁰ «Namwendre hari mwa liɗago lilio mbeli v̄av̄o; mwamongia, mutsopara mwana pundra afungwa, kaparopandrwa. Namumuɓuliye, mumuv̄inge.

³¹ Neka v̄wa mutru amudzisaoni: ‹Manatrini mumuɓuliao?› namumudjiɓu: ‹Raɓi asumutsaha.› »

³² Wale wav̄elehwa wandre, tsena wapara zitrongo mauri ɗe inamuna Insa aka awaambia.

³³ Iv̄o wakoɓulia umwana pundra, wenyewe wawadzisa: «Manatrini muɓuliao mwana pundra uwo?»

³⁴ Wale wadjiɓu: «Raɓi asumutsaha.»

³⁵ Ɓas, wamuv̄ingia Insa umwana pundra, wakadza nguo zawo uju mwayo, amwesa wamuv̄ashidza Insa.

³⁶ Hari mwa umwendro wahe ule, watru wakorenga nguo zawo na uziodza ndziani.

³⁷ Wakati wakokuruɓia Yerusalemu amba wakoshuka ha ulawia uMulima wa Mizaituni, piya idunia ya maswihaɓa yaandrisa ufurahi na umutukuza Mungu ha ji lendza nguvu ha siɓaɓu ya piya zimidjuza waka waziona.

³⁸ Wakorongoa: «Naɓarikishihe umufalume ajao ha lidzina la Mola! Amani mbinguni, na utukufu hari mwa maɓandza ya uju rahana uju!»

³⁹ Ɓaãdhwi ya Mafarisayo waka moni na idunia ile wamuambia Insa: «Fundi, lagulia watru waho.»

⁴⁰ Awadjiɓu: «Nisumuambiani, neka wao waɓuriha, yamawe ɗe yatsolatsao keme!»

Insa asulilia iYerusalemu

⁴¹ Wakati akokuruɓia liɗago ata aliona, Insa alililia, amwesa arongoa:

⁴² «Na djeli wawe wajau wakojua ileo ini zitrongo zihuv̄ingiao amani, ɓadi av̄asa zidzamisiwa yamatso yaho.

⁴³ Mana v̄utsohujilia suku zilio amba maãduwi yaho yatsohuzingidzia na maɓundro, yahuɓaliliye na uhusonga piya yimikaɓala.

⁴⁴ Watsohutseresa, wawe na uwana waho walio haho, wala kawatsolisha haho ata ɓwe moja uju na munyahe. Mana kwafahamu uwakati waka wajiliwa.»

Insa asuĩdzia maɓahazazi moni mwa iNyumba Ndzitwaharifu

⁴⁵ Angia moni mwa iNyumba Ndzitwaharifu, aĩdzia watru wakoudza moni v̄ale,

⁴⁶ awaambia: «V̄uangihwa: ‹iNyumba yangu itsoka nyumba ya mamilio›; ɓadi wanyu muifanya amba ‹gumbo la waidzi.› »

⁴⁷ Akosomedza kula suku moni na iNyumba Ndzitwaharifu. Na v̄ale yaMatolezi Maɓole ya Masadaka, yaMafundi ya Sharia, na uwaɓole wa umati ule wakozunguha ndzia wamuule.

⁴⁸ Ɓadi kawakojua hali ya ufanya, mana wanadamu piya wakomuvulishia na ustamiyivu muɓole.