LUKASI 17 - Ha`bari Ndjema ya I Maore

Yahusu kosa na swamaha

¹ Insa aambia maswihaɓa yahe: «Kaitsomukinishiha amba v̄wasuke trongo zakwalisa watru, ɓadi maondo ha uwo atsozitsongeshao!

² Ɓasi itsoka ɓorwa waye ufungwa na ɓwe tsingoju, andre atrilwe nanga zilindrini, rahana uka amba waye ɗe akwalisa moja hari mwa uwatiti wao.

³ Namudzifahamishe nafusi zanyu. Neka mwananyaho akoso, murudi, amohukia, muswamihi.

⁴ Na neka ahukoso mara saɓa hari mwa suku, amwesa ahujilia mara saɓa ha ujutsa na utsaha muswamaha, v̄av̄o muswamihi.»

Musomo ju la uaminifu

⁵ yaMav̄ingizi-Risala yamuambia Raɓi: «Riengedzeye uaminifu.»

⁶ Ɓas Raɓi arongoa: «Na djeli mukana uaminifu mauri mwana mbia mutiti rahana umutiti, mwatsoambia umuri unu: ‹Dzirurumwe, wadzitaɓu ɓaharini›, na uwo utsomutuĩni.»

Djukuma la murumizi

⁷ «Uv̄i mengoni mwanyu neka ana mulimizi au mutsunga, atsomuambiao amolawa malavuni: ‹Haraka uje uɗye?›

⁸ Katsomuambia ha kinyume: ‹Nipishiye, amwesa upindre unielesheye, niɗye na unwa, iv̄o wawe v̄aho uɗye na unwa?›

⁹ Hali ilazimu amuv̄osheleye marahaɓa murumizi wahe ha iv̄o afanya izo aka aãmurishiwazo?

¹⁰ Ɓasi wanyu wajau, ɓaanda mwafanya piya izo mwaãmurishiwazo, namurongowe: ‹Wasi tsi warumwa wastahiki sifa; rifanya zaka zarilazimu.› »

Insa asuzihira waenefu kumi

¹¹ Ndziani v̄ale aka ha uendra Yerusalemu, Insa av̄iri ɓaina ya Samariya na Galilaya.

¹² Ungia yahe hari mwa ɗago, ajiliwa na watru kumi wakana uwaɗe wa uwenefu. Wazia mbali-mbali na waye,

¹³ wahedza liji, warongoa: «Insa, mutukufu, riv̄orehe!»

¹⁴ Uwaona yahe, awaambia: «Namwendre mwadzionese ha yaMatolezi-Masadaka.» Ɓas, ulawa yawo v̄ale amba wasendra, wazihiriha.

¹⁵ Moja mengoni mwawo v̄ale wakati aona amba azihiriha, aregea, amutukuza Mungu ha ji lendza nguvu.

¹⁶ Awu ha maswa mindruni ha Insa, amuv̄oshelea marahaɓa. Na uwo aka Musamariya.

¹⁷ Ɓas, Insa arenge umurongo arongoa: «Hali watru kumi tsi ɗe wazihiriha? Ɓas, shendra waɓaki wa hav̄i?

¹⁸ Kav̄u ata mutru aregea, aje amutukuze Mungu neka tsi ɗe mudjeni unu?»

¹⁹ Amwesa amuambia: «Hima wendre dzaho, uaminifu waho uhuhuyi.»

Mujilio wa Utawalizi wa Mungu

²⁰ Watru wa ishama ya Mafarisayo wakomudzisa Insa wakati wa Utawalizi wa Mungu utsojao. Awadjiɓu: «Utawalizi wa Mungu, uwo kausuja namuna amba uonehane ha matso.

²¹ Watru kawatsorongoa: ‹Tsunu v̄anu!› au: ‹Tsule v̄ale!› Mana Utawalizi wa Mungu wa hari mwanyu.»

²² Amwesa aambia yamaswihaɓa: «V̄utsoja suku amba mutsotamani muone moja hari mwa zisuku za uMwana wa Mwanadamu, wala kamutsoiona.

²³ Watru watsomuambiani: ‹Tsule hule!› au: ‹Tsunu hunu!› Ɓadi musendre, musuwaɗunge.

²⁴ Mana mauri ɗe iheli peni iv̄enao, iunishiao uwingu rangu uv̄andre ata uv̄andre, iyo ɗe inamuna uMwana wa Mwanadamu atsokao isuku ya umujilio wahe.

²⁵ Ɓadi ilazimu raɓuzi aondeshehe na trongo nyengi, amwesa aharwe na lidunia la leo lini.

²⁶ Zahidjiri wakati wa Nuhu, ɗe zitsohidjirio wajau hari mwa zisuku za uMwana wa Mwanadamu.

²⁷ Wanadamu wakoɗya, wakonwa, wakolola na ulodza ata mupaka ɗe isuku Nuhu angia moni na lidjahazi; lidzaha la maji lija, liwaangamidza piyawo.

²⁸ Tsena itsoka mauri ɗe wakati wa Lutwi. Watru wakoɗya, wakonwa, wakonunua, wakoudza, wakotaɓu na uundra,

²⁹ ɓadi isuku Lutwi alawa Suduma, vua ya moro na vu dzindzano la dzaha lakoshuka ulawa mbinguni, iwaangamidza piyawo.

³⁰ Itsoka ɗe inamuna iyo wajau isuku uMwana wa Mwanadamu atsov̄enuhao.

³¹ iSuku iyo, mutru atsokao ɓanaraju na zitru zahe moni na inyumba, asushuke azirenga. Au mutru atsokao shambani, asuregeye ɗagoni.

³² Namumunahane mutrumushe wa Lutwi.

³³ Mutru atsahao adzivukishe uhayati wahe, atsolatsishiwa nawo; ɓadi mutru utsomulatsishiao, uwo atsouvukisha.

³⁴ Nisumuambiani amba uku uwo, watru waili watsokao hari mwa shitrandra moja, moja atsorengwa, na umoja alishwe.

³⁵ Watruwashe waili warwao v̄umoja, moja atsorengwa, na umoja alishwe.

³⁶ [Na watruɓaɓa waili watsokao malavuni, moja atsorengwa, na umoja alishwe.]»

³⁷ Ɓas, maswihaɓa yahe yamudzisa: «Raɓi, zizo zitsohidjiri hav̄i?» Awadjiɓu: «V̄ahanu ishipindra itsokao, ɗe yamahwezi yatsongulidzanao.»