LUKASI 14 - Ha`bari Ndjema ya I Maore

Insa asuzihira muwaɗe Suku ya Uv̄umuzi

¹ V̄uka Suku ya Uv̄umuzi, Insa angia nyumbani ha moja mengoni mwa uwaɓole wa ishama ya Mafarisayo, akwendra aɗye. Na watru waka v̄ale wakomutunda.

² Na v̄ale mbeli na waye v̄uka mutru akana mazimba mwilini.

³ Ɓas, Insa arenge umurongo, aambia mataãlamu wa Sharia na yaMafarisayo: «Hali iruhusiwa mutru uzihira Suku ya Uv̄umuzi, au kayaruhusiwa?»

⁴ Ɓadi waɓuriha zi. Ɓas, Insa arenge muwaɗe ule amuzihira, amwesa amuambia andre dzahe.

⁵ Ɓaanda ya v̄av̄o aambia watru wale: «Uv̄i mengoni mwanyu v̄av̄o, neka umwana wahe au inyombe yahe ipuliha sisimani Suku ya Uv̄umuzi, katsoihedza sa ile kamwe?»

⁶ Ɓasi kawashindra wadjiɓu itsokao yotsi.

Mutru kalazimu adziv̄a sheo

⁷ Amwesa atolea mufano watru waka wakariɓisiwa v̄ale, iv̄o aona amba wakotsahua yamaɓandza ya mbeli. Awaambia:

⁸ «Wamokariɓisiwa na mutru harusini, usutsahuwe ɓandza la mbeli, ha uria amba v̄wa mutru mwendza sheo rahana wawe hari mwa watru wakariɓisiwa v̄ale,

⁹ amba monyewe umukariɓisani wanyu waili atsoja ahuambiye: ‹Muv̄e mutru unu ɓandza lilo.› Utsoona haya wamwendra hari mwa liɓandza la mwiso.

¹⁰ Ɓadi wamokariɓisiwa, endra waketsi liɓandza la mwiso, pare ule ahukariɓisa amoja, ahuambiye: ‹Mwandzani wangu, tsengelea uju hule.› Ɓas, itsoka sheo hahoju mbeli za piya watru wakariɓisiwa na wawe v̄ale.

¹¹ Mana yotsi atsodzihedzao, atsoshukidziwa, na uwo atsodzishukidzao, atsohedzewa.»

Insa asusomedza hali ya ukariɓisa

¹² Amwesa aambia mutru ule amukariɓisa: «Neka upishia watru shahula ya mutsana au ya mahariɓi, usukariɓise wandzani waho, wala wananyaho, wala wadjemazaho, wala madjirani matadjiri, ha uria wasuje wahukariɓisa wajau, ata waliv̄wa zile wawafanyia.

¹³ Ɓadi wamopiha karamu, kariɓisa zimasikini, wendza zifeli, magoɓo, na wafa-matso.

¹⁴ V̄av̄o utsoɓarikishiha, mana kawatsoshindra wahuliv̄a zile wawafanyia. Ɓadi utsoliv̄wa wakati wa umuregezeo hayi wa waraharifu.»

Mufano wa karamu

¹⁵ Moja mengoni mwa wale wakoɗya v̄ale, ɓaanda akia marongozi yale, amuambia Insa: «Aɓarikishiha uwo atsokao hari mwa ikaramu ya Utawalizi wa Mungu.»

¹⁶ Ɓas, Insa amudjiɓu: «V̄uka mutru aka apihi karamu ɓole, tsena alaliha watru wengi.

¹⁷ Wakati wa uɗya mahariɓi wamopara, av̄eleha murumizi wahe, andre ahire wale walalihwa, awaambiye: ‹Namuje, mana trongo piya za tayari.›

¹⁸ Ɓadi piyawo ha nia moja watsaha muswamaha. Wa handra amuambia: ‹Tsinunua shamba, tsilazimu nendre nalione. Nisuhumia unitsashiye muswamaha.›

¹⁹ Wangina tsena amuambia: ‹Tsinunua nyombe kumi za magari, nisendra nazidjereɓu. Nisuhumia unitsashiye muswamaha.›

²⁰ Na wangina tsena amuambia: ‹Wami tsilawa ufungia. Iyo ɗe imana tsitsopara naja.›

²¹ Murumizi ule uregea yahe, av̄ingi piya mahaɓari yale ha murumisa wahe. Ɓas, monyewe ɗagoni v̄ale atukiwa, amuambia murumizi wahe ule: ‹Endra haraka hari mwa yamav̄are na zindzia za liɗago, warenge zimasikini, wendza zifeli, wafa-matso, na yamagoɓo, uwav̄inge.›

²² Ɓaanda ya v̄ale murumizi ule aja arongoa: ‹Mutukufu, trongo wakotsaha zifanyiwe, zifanyiwa, amwesa v̄uɓaki tsena maɓandza.›

²³ Ɓas, sa ile monyewe aambia umurumizi wahe: ‹Endra hari mwa piya wana ndzia, urambadze na mavala, na wao utsowaparao uwafarudhishe waje wangiye, ile inyumba yangu ijaye.

²⁴ Mana nisumuambiani, kav̄u ata moja hari mwa wale walalihwa atsolauliao ikaramu yangu.› »

Masharuti ya uwo atsahao amuɗunge Insa

²⁵ Dunia ɓole yakomuɗunga Insa hari mwa musafara wahe. Ɓas, azingi awaambia:

²⁶ «Neka mutru asunijilia aniɗunge, ne asumuv̄endza ɓaɓahe, mayahe, mushe wahe, wana wahe, wananyahe, au ata inafusi yahe rahana wami, katsoshindra aka swihaɓa langu.

²⁷ Na yotsi kadzitrihisa umuri wa pawa wahe aniɗunga, kashindri uka swihaɓa langu.

²⁸ Mana uv̄i mengoni mwanyu neka asutsaha adziundriye, kaketsi raɓuzi afanya hisaɓu zahe, aangalia neka marike zitsotosha?

²⁹ Neka tsi namuna iyo, ɓaanda aundra umusingi, katsoshindra amalidza, na watru watsomutseha

³⁰ ha urongoa: ‹Mutru ule aandrisa uundra, wala kashindra amalidza.›

³¹ Au tsena, mufalume mbani amotsaha andre awane kondro kinyume na mufalume munyahe, kaketsi raɓuzi aangalia neka waye ushindra na watru alifu kumi andre awane kinyume na ule amujiliao na watru alifu shirini?

³² Neka amba katsoshindra, rangu mufalume munyahe ule raha alio mbali, atsov̄eleha watru wandre wamutsahe masharuti yatsotriao amani.

³³ Ɓasi ha izo, yotsi hari mwanyu katsolisha piya izo alionazo, katsoshindra aka swihaɓa langu.»

Mufano wa shingo yalawa ladha

³⁴ «Shingo shitru ndjema. Ɓadi neka shingo ilawa ladha, itsoregezewa na trini?

³⁵ Kaina faida na ishiv̄andre ya tsi, wala kaika shitru ihodarishao. Iyo ulatswa v̄ondze. Mutru aliona makio ya ukia, nakiye.»