FILIMUNA 1 - Ha`bari Ndjema ya I Maore

¹ Wami Ɓaulusu, mufungwa ha siɓaɓu ya Kristi-Insa, v̄umoja na umwananya wa shi uaminifu Timutausu, risuhuangishia Filimuna mushangirizi muv̄endzewa watru,

² na mwananyatru mutrumushe Afiati, na Arkiɓusa munyatru hari mwa uwanilia iIndjili, v̄umoja na iDjama Ndziwaminifu ingulidzanao ɗagoni haho:

³ Urehema na amani zilawao ha Ɓaɓatru Mungu na Raɓi Insa-Kristi nazimuendreleyeni.

Uv̄endza na uaminifu wa Filimuna

⁴ Nisumushukuria Mungu wangu kula sa namohunahana hari mwa mamilio yangu,

⁵ mana nisukia ihaɓari ya uv̄endza waho na uaminifu ulionawo na Raɓi Insa, ha tanafu ya piya uwatwaharifu.

⁶ Nisumia Mungu amba murengeo-fuvu waho hari mwa uaminifu uhuv̄ingiye ujuzi mukamilifu wa kula ndjema rilionayo hari mwa uv̄umoja watru na Kristi.

⁷ Kweli amba tsipara furaha ɓole v̄umoja na mutrilio-ɓari ha siɓaɓu ya uv̄endza waho, mana ha wawe mwananyangu wa shi uaminifu, ziroho za uwatwaharifu zirutuɓishiha.

Ɓaulusu asumumilia Onesimu ha Filimuna

⁸ Iyo ɗe imana, ata iv̄o hari mwa uv̄umoja na Kristi niliona furswa ya uhuãmurisha ufanye izo zalazimu,

⁹ ne nisuona ɓorwa nihutafadali ha siɓaɓu ya uv̄endza. Ha inamuna nilio wami Ɓaulusu muɗuhazi, na zaidi ya v̄av̄o tsena mufungwa iv̄o nimurumishiao Kristi-Insa,

¹⁰ nisumilia hahoju umwana wangu wa shi uaminifu Onesimu, alio amba afanyiha mwana wangu uka yangu hari mwa silisili.

¹¹ Mara ya handra kakohufayidisha, ɓadi av̄asa asuhufayidisha wawe na wami.

¹² Nisuhurudisiawo, waye alio shiga ya umwili wangu.

¹³ Natsov̄endza aɓaki na wami anirumishiye ɓadala ya wawe, v̄anu nilio hari mwa silisili ha siɓaɓu ya iIndjili.

¹⁴ Ɓadi tsatsaha nafanya trongo itsokao yotsi kaɓula ya utsaha shauri laho, pare yasuke amba zema zaho farudhwi, ɓadi ha uv̄endza yaho monyewe.

¹⁵ Ukiri uka amba atsapushiana na wawe hari mwa mwana muda, ile urudi umupare ha daima,

¹⁶ tsi amba murumwa raha, ɓadi zaidi ya murumwa, shi mwananya muv̄endzewa. Waye a namuna iyo hususwani hanguju, ɓasi ha mara ngav̄i atsokao namuna iyo hahoju, shimwili na hari mwa uv̄umoja na Raɓi!

¹⁷ Ɓasi neka usuniona amba wami munyaho, murenge mauri ɗe wami.

¹⁸ Neka ahukoso na trongo, au ana deni haho, tsiiremea shifuɓa.

¹⁹ Wami Ɓaulusu ɗe niangihao ha umuhono wangu amba nitsohurudisiayo wami monyewe. Wala tsisuhuambia amba deni ulionayo hangu, ɗe inafusi yaho.

²⁰ Naam, mwananyangu, hari mwa uv̄umoja wa Raɓi, nirendreye hadja iyo, unirutuɓishe iroho ha siɓaɓu ya Kristi.

²¹ Ɗe ha uaminifu wa utuĩvu waho ɗe nihuangishiao, tsena ha ujua amba utsofanya zaidi ya izo nitsahao.

²² Ɓaanda ya v̄av̄o, nitayarishiye v̄ahanu v̄wa uketsi, mana nisutumainia amba ha yamamilio yanyu, niregezewe hanyu.

Masalamu ya mwiso

²³ Eɓafrasu, munyangu wa shiv̄a ha uv̄umoja wahe na Kristi-Insa, asuhusalimu,

²⁴ v̄umoja na washangirizi wangu Markusi, Aristarkusa, Demasu, na Lukasi.

²⁵ Rehema ya Raɓi Insa-Kristi naike v̄umoja na iroho yanyu.