2 TIMUTAUSU 4 - Ha`bari Ndjema ya I Maore

¹ Nisuhurayi mbeli za Mungu na mbeli za Kristi-Insa atsohukumuo wao walio hayi na wao wafa, tsena ha siɓaɓu ya umuv̄enulio wahe na utawalizi wahe, amba:

² judza Urongozi, parilia kula wakati, neka mwema au tsi mwema. Fundra na urudi watru, tria ɓari na usomedza v̄umoja na suɓira ndzikamilifu.

³ Mana v̄utsoja wakati amba watru kawatsostahamili uvulishia musomo mwema. Ɓadi ha ushauku wa ukia izo ziwawao makio yawo, watsodziparia wengi wa mafundi.

⁴ Watsoɓuzudza makio yawo yasukiye ikweli, wadzizingise hari mwa mahadisi maruv̄u.

⁵ Ɓadi wawe, kana fahamu laho hari mwa piya zitrongo, stahamili yamaondo, fanya ihazi ya mutrangizi wa iHaɓari Ndjema, tsimidza ha ukamilifu urumishi waho.

⁶ Na wami v̄angu, damu yangu isujotsomolwa amba kafara, na wakati wa ulawa wangu uwaswili.

⁷ Tsiwana ikondro ndjema, tsimalidza umwendro, tsisiki uaminifu.

⁸ Rangu v̄anu tsihetsiwa ihishima ya muhakisho mbeli za Mungu. Raɓi, hakimu wa haki, atsoniv̄ayo iSuku iyo; wala tsi wami tu, ɓadi wajau na piya wao wakolindra v̄umoja na huɓa muv̄enulio wahe.

Haɓari zamuhusu Ɓaulusu

⁹ Fanya haraka unijiliye.

¹⁰ Mana Demasu anipuka ha uv̄endza wa lidunia la leo, andre Tesalonika. Kresensi andre Galatwiya, na Titusa waye Dalmatiya.

¹¹ Lukasi weke ɗe alio na wami. Murenge Markusi, umuv̄inge v̄umoja na wawe, mana waye unifayi ha kusudi hari mwa ihazi.

¹² Tsimuv̄eleha Tihikusa Efeso.

¹³ Wamoja, v̄inga inguo ya ɓaridi nailisha Troasi ha Karpusu, na zizio, hususwani zile zilio ha ngwezi.

¹⁴ Mufua-zuma Alisandrusa anirendre mbovu ha uwengi; Mola ɗe atsomuliv̄ao na izo azirendra.

¹⁵ Dzifahamishe na waye wawe wajau, mana ahimi kinyume ha kusudi na marongozi yatru.

¹⁶ Udziwanilia yangu mara ya handra, kav̄u ata mutru aka ɓavu moja na wami; piya wanipuka. Mungu asuwahasiɓiye kosa lilo.

¹⁷ Ɓadi Raɓi ɗe aka na wami, anihodarisha ile pare ha wami, umutekelezio wa iHaɓari ufanyishihe ha ukamilifu, tsena ukilihwane na piya zinishani kazimuji Mungu. Ɓasi tsikombolwa na ihanyo ya simba.

¹⁸ Raɓi atsonikomboa na kula shitrendrwa mbovu, tsena atsonihuyi ile ningiye ha usalama salimina hari mwa Utawalizi wahe pev̄oni. Utukufu naumuendreleye ha daima. Amina.

¹⁹ Nisalimiye Priskila na Akila, na umuraɓa wa Onesiforu.

²⁰ Erastusa aɓaki Korintiyo, tsena Trofimusu, tsimulishi muwaɗe ɗagoni Miletu.

²¹ Fanya djitihadi uje kaɓula ya uwakati wa ɓaridi. Eɓulusu, Ɓudensu, Linusa, Klodiya, v̄umoja na piya wananya wa shi uaminifu wasuhusalimu.

²² Raɓi nake v̄umoja na iroho yaho. Urehema naumuendreleyeni.