2 TIMUTAUSU 3 - Ha`bari Ndjema ya I Maore

Udziro wa zisuku za mwiso

¹ Jua amba hari mwa zisuku za mwiso, v̄utsoja nguwakati ndziro.

² Mana watru watsov̄endza ɗe zinafusi zawo, watsotrishilia marike, watsodzirendra, watsodziona, watsoka makufurina, kawatsotuĩ wadzaɗe wawo, kawatsojua zema, kawatsostehi zilio ndzitwaharifu,

³ kawatsov̄endza wanyawo, kawatsoswamihi, watsonazi, kawatsodzizia, watsoka wahali, maãduwi ya zindjema,

⁴ wahaini, wakaidi, watsodziona, watsov̄endza masterehi rahana Mungu.

⁵ Watsodzifanisa na watru waɗungao trongo za shiungu, ne kawatsokuɓali uushindzi wazo. Dziɓause na watru wao.

⁶ Hari mwawo v̄wa ɓaãdhwi wadziseledzao moni na malago ya watru, na urenga matreka watruwashe wendza zitswa ndzangu, watruwashe wadzitrihisao udziro wa madhambi, na uv̄ingwa ha ngushauku za namuna na namuna.

⁷ Ha daima watruwashe wao uka ju la usoma, ɓadi kawashindri uwaswili hari mwa ujuzi mukamilifu wa ukweli ata idahari.

⁸ Mauri ɗe Yanusu na Yambrusu wamukanyusa Musa, ɗe inamuna iyo wajau watru wao wakanyusao ikweli. Wao watru wendza ãkili zamenyeha walio amba hari mwa trongo ya uaminifu, wa hari mwa upotevu.

⁹ Ɓadi kawashindri uendra mbali, mana ujinga wawo uv̄enuha ha watru piya, mauri ɗe inamuna watru waili wale waka.

Ɓaulusu asumutria ɓari Timutausu

¹⁰ Ɓadi wawe, uniɗungu ha uzuri hari mwa musomo, maendreleo, mipango, uaminifu, suɓira, uv̄endza, ustahamilifu,

¹¹ matreso, na maondo yalio amba tsiyapara Antiyokiya, Ikoniyumu na Listra. Matreso jeje nayav̄ira! Na hari mwa piyawo Raɓi anikomboa.

¹² Kweli amba piya watsahao waẽshi shiĩɓada hari mwa uv̄umoja na Kristi-Insa, watsotreswa.

¹³ Ɓadi waovu na wanafiki watsendra ha uzidishiha na uovu, ha wao upoteza wasalia na udzipoteza wao wenyewe.

¹⁴ Ɓadi wawe, ɓaki hari mwa izo wasoma, wazikuɓali v̄umoja na yakini; usujua ha mbani ɗe wazisoma,

¹⁵ na rangu unatsani haho, usujua yiMiangishio Mitwaharifu; yiyo ushindrohuv̄a ihikima iv̄ingao uhuyifu, ha ndzia ya uaminifu ulio hari mwa uv̄umoja na Kristi-Insa.

¹⁶ Piya uMuangishio uja ulawa ha Mungu, tsena ufayi ya usomedza, ufundra, urudia na ufundrisa maendreleo ya uhaki,

¹⁷ ile mutru wa Mungu akamilishihe, ake tayari ya ufanya kula shitrendro ndjema.