2 TIMUTAUSU 2 - Ha`bari Ndjema ya I Maore

Muwanizi mwema wa Kristi

¹ Ɓasi wawe, mwana wangu, dzihodarishe hari mwa irehema iparihanao ha Kristi-Insa.

² Na izo wazikia na wami mbeli za wengi wa mazahidi, zidhwaminishe ha watru waaminifu watsoshindrao wazisomedze wajau wangina.

³ Ondesheha [v̄umoja na wami], mauri muwanizi mwema wa Kristi-Insa.

⁴ Kav̄usi ata muwanizi hari mwa djeshi ashahilihao na maẽsha ya kula suku amotsaha ajiv̄idze uwo amurenga.

⁵ Na mushindranizi kahishimiwa neka kashindrana ha uɗunga ziSharia.

⁶ Mulimizi adzirumao alazimu ake ɗe wa handra aparao lifungu lahe hari mwa yamavuna.

⁷ Elewa izo nirongoao, na Raɓi atsohuv̄a uelewe piya.

⁸ Munahane Insa-Kristi, shilembwe ya Daudu, aregezewa hayi ulawa ha uwafu, ha uɗunga iIndjili niijudzao.

⁹ Ha wiyo nisuondesheha, ata tsifungwa mauri murendrezi-mbovu. Ɓadi urongozi wa Mungu kawafungwa.

¹⁰ Iyo ɗe imana ata nistahamilio piya zitrongo, ha faida ya wao watsahulwa, ile wao wajau wapare uhuyifu ulio ha Kristi-Insa, v̄umoja na utukufu wa daima.

¹¹ Unu urongozi wa kweli: Neka amba rifu v̄umoja na waye, ritsoẽshi wajau v̄umoja na waye;

¹² neka risustahamili, ritsotawala wajau v̄umoja na waye. Neka risumuhara, waye wajau atsorihara;

¹³ neka karisi waaminifu, waye asuɓaki muaminifu, mana kashindri udzihara waye monyewe.

Murumishi akuɓaliwa na Mungu kaonea haya

¹⁴ Nahanidza wanyaho trongo zizo na osia mbeli za Mungu watrale mashindrano ya makalima, trongo kaina faida itsokao yotsi, neka tsi uangamidza wao wayavulishiao.

¹⁵ Fanya djitihadi udzitekeleze mbeli za Mungu amba mutru akuɓalishiha, murumishi kasuonea haya, asomedzao ha uondzofu urongozi wa ikweli.

¹⁶ Ɓauha mahadisi kayana mana yashirikisao, yalio amba uɓausa wao wayasikao zaidi ha zaidi na iĩɓada.

¹⁷ Urongozi wawo urandra mauri yaɓisi. Na mengoni mwawo ɗe Himeni na Filuti,

¹⁸ walio amba wadziɓausa na ukweli, ha urongoa amba umuregeo hayi madza uhidjiri. Na v̄av̄o wasupoteza uaminifu wa ɓaãdhwi ya watru.

¹⁹ Ɓadi umusingi muhodari wahetsiwa na Mungu, uwo usika, uremwa muhuri na marongozi yanu: «Mola asujua wao walio amba wahe», na tsena «mutru yotsi akuɓalio ha hadhwiri lidzina la Mola, nadziɓause na uovu.»

²⁰ Moni na nyumba ɓole kav̄uka ziya za dhahaɓu na fedha tu ɓasi, ɓadi uka wajau za muri na za ɗongo. V̄wa amba za urumishi wa sheo, na zasalia urumishi muv̄ungufu.

²¹ Ɓasi neka mutru asudzirahatsa ha udziɓausa na trongo zizo, atsoka shiya ya urumishi wa sheo, yatwaharishiwa, imufayio Monyewe, tayari ya kula urumishi mwema.

²² Trala zingushauku za shiunahirimu, utsahe uhaki, uaminifu, uv̄endza, amani, v̄umoja na wao wamukuɓalio Mola ha hadhwira ha umo muraharifu.

²³ Ɓauha malaguzi ya shiujinga kayana mana, ha ujua amba yao uv̄inga umani.

²⁴ Ne ɗe kayalazimu amba murumishi wa Raɓi akana umani, ɓadi alazimu ake mwema mbeli za piya, ashindre asomedze, amwesa ake mustahamilifu.

²⁵ Narudiye ha utrulivu wao wamukanyushao, ukiri uka amba Mungu atsowagaudza wandre toɓa, pare wajuwe ikweli.

²⁶ V̄av̄o watsorudi warengeleye fikira, watraliye marambwi ya Iɓilisa aka awasika amba watuĩ mav̄endzeleo yahe.