2 TIMUTAUSU 1 - Ha`bari Ndjema ya I Maore

¹ Wami Ɓaulusu, Muv̄ingizi-Risala wa Kristi-Insa ha yamav̄endzeleo ya Mungu ya ujudza wahadi wa uhayati ulio ha Kristi-Insa,

² ha Timutausu mwana wa shi uaminifu muv̄endzewa wangu: Neema, urehema na amani zilawao ha Mungu amma Ɓaɓa na Kristi-Insa, Raɓi watru, nazihuendreleye.

Himida na mutrilio-ɓari

³ Nisumuhimidia Mungu nimurumishiao ha roho ndziraharifu ɓila tuhuma, mauri ɗe wadzaɗe wangu, namohunahana hari mwa mamilio yangu kula sa, uku na mutsana.

⁴ Nisunahana matsozi yaho, tsena tsina ushauku ya uja nihuone, ile pare nijaye furaha.

⁵ Nisunahana wajau uaminifu wa kweli ulionawo, ulio amba uka kaɓula ha kokwaho Loyisi na ha mayaho Eunisia, na wami tsina yakini amba uwo wa hahoju wajau.

⁶ Iyo ɗe imana ata nihunahanidzao uvudziye lijenge la ineema ya Mungu ilio moni haho ha uhukadzia yangu yimihono.

⁷ Mana Mungu kariv̄a roho ɓaridi, ɓadi yendza ushindzi, uv̄endza na udzizia.

⁸ Ɓasi usuone haya umulawia ushahidi Raɓi watru, wala wami nilio mufungwa ha siɓaɓu ya waye, ɓadi ondesheha v̄umoja na wami ha tanafu ya iIndjili, ha ushindzi wa Mungu.

⁹ Arihuyi, tsena arihiri rike watwaharifu, tsi ha ulawana na zitrendro zatru, ɓadi ha siɓaɓu ya inia yahe monyewe, na irehema aridjaãliayo ha uv̄umoja na Kristi-Insa kaɓula ya umwandro wa yimida.

¹⁰ iRehema iyo iv̄enulwa av̄asa ha umujilio wa Muhuyifu watru Kristi-Insa, alio amba ashindri uufa, tsena atria heuni uhayati kauna ufa, ha iIndjili.

¹¹ Ɗe ha iIndjili iyo ɗe nalishwa mujudzizi, Muv̄ingizi-Risala amma musomedza.

¹² Na iyo ɗe imana ata niparwao na maondo yanu, ɓadi tsisuyaonea haya, mana nisujua uwo namuamini, tsena tsina yakini amba ana ushindzi wa usika iyo nadhwaminishiwayo ata mupaka Suku iyo.

¹³ Ɗunga umufano wa marongozi mema wayakia na wami, ha uaminifu na uv̄endza, ulio hari mwa uv̄umoja na Kristi-Insa.

¹⁴ Sika ha iRoho Ndzitwaharifu iẽshio hatru iãkiɓa ndjema wadhwaminishiwayo.

¹⁵ Usujua amba piya walio Aziya waniɓauha, na mengoni mwao ɗe Figuli na Hermujanu.

¹⁶ Raɓi naenedze urehema wahe hari mwa umuraɓa wa Onesiforu, mana anitria ɓari mara nyengi, wala kaona haya na silisili zangu.

¹⁷ Ɓadi ha kinyume, uja yahe Romu, anizunguha ha djitihadi ata anipara.

¹⁸ Raɓi namudjaãliye upara urehema ha Mola iSuku iyo. Wawe-wawe usujua ha uzuri kiasi anirumishia Efeso.