2 MONYE 3 - Ha`bari Ndjema ya I Maore

uMuregeo wa Raɓi

¹ Wanyu wav̄endzewa, lini av̄asa ɗe liɓarua la v̄ili nimuangishiaoni. Hari mwa yao maili, nisudjereɓu utsotsa fahamu, ile nitsongeshe hanyuju fikira iliona ãkili ndziraharifu,

² pare munahane marongozi yarongolwa rangu kaɓula na yimitrume mitwaharifu, na iãmuri mwajudziwayo na Mav̄ingizi-Risala yanyu, ãmuri ya Uwo alio Raɓi amma Muhuyifu.

³ Tu raɓuzi, namujuwe amba hari mwa zisuku za mwiso, v̄utsoja wafudhuli wendza madharau watsendrao ha zingushauku zawo wenyewe.

⁴ Ɓasi watsorongoa: «uWahadi wa mujilio wahe wa hav̄i? Mana rangu mida maɓaɓa yatru yafariki, kula shitru iɓaki mauri ɗe mwandroni mwa ulemengu.»

⁵ Na v̄av̄o wasuɗela ha kusudi amba hale oho, v̄uka mbingu na shiv̄andre ya tsi ilio amba hari-hari na maji, tsena yafanyishiha ha maji, ihea ha urongozi wa Mungu,

⁶ na ha yao raha ɗe lidunia la wakati uwo laangamia, lafinikiwa na maji.

⁷ Na v̄anu ha urongozi ɗe uwo-uwo, ɗe zimbingu na ishiv̄andre ya tsi za av̄asa zahetsiwa ha ulindrilia umoro, zalishwa ya iSuku ya Hukuma, na uangamifu wa waovu.

⁸ Ɓadi v̄wa trongo, wav̄endzewa, ilio amba kayalazimu mwaiɗela, ne ɗe: Ha Raɓi, suku moja mauri maha alifu, na maha alifu mauri suku moja.

⁹ Raɓi kasuhomesa umutsimidzio wa uwahadi, mauri ɗe inamuna ɓaãdhwi waifikirio, ɓadi asusuɓiri mbeli zanyu, mana kasutsaha v̄waka ata moja aangamia, ɓadi piya wandre toɓa.

¹⁰ iSuku ya Raɓi itsoja mauri mwidzi. Na isuku iyo zimbingu zitsov̄ira v̄umoja na keme ɓole, zitru za ãswili zitsolalusiwa ha moro, na ishiv̄andre ya tsi v̄umoja na zitrendrwa zayo zitsov̄enuha.

¹¹ Rangu piya zizo zitsoangamidziwao namuna iyo, ɓasi v̄av̄o mulazimu muke jeje? Ɗe ha muendreleo mutwaharifu v̄umoja na ĩɓada,

¹² ɗe mwalazimu mulindre na ujisa ha upesi iSuku ya Mungu, ilio amba zimbingu zivuao zitsoangamia, na zitru za ãswili zitsolalusiwa ha moro.

¹³ Ɓadi ha uɗunga wahadi wahe, wasi risulindra wingu muv̄ia na shiv̄andre ya tsi pia, v̄ulio amba v̄utsoka uhaki.

¹⁴ Ha izo wav̄endzewa wangu, iv̄o mulindrao trongo zizo, namufanye djitihadi muparihanihe na waye ɓila pandra wala kosa hari mwa amani.

¹⁵ Namurenge amba isuɓira ya Raɓi, iyo uhuyifu wanyu, mauri ɗe inamuna umwananya muv̄endzewa watru Ɓaulusu amuangishiani wajau, ha ihikima adjaãliwayo.

¹⁶ Iyo ɗe itrongo airongoao moni na piya maɓarua yalio amba asulagua trongo zizo. Moni v̄wawo v̄usuparihana trongo zilio ndziro za uelewa, zilio amba watru kawaji tsena tsi wahodari ugaudza imana yazo, mauri ɗe inamuna wafanyao wajau na yiMiangishio yasalia, ha uangamifu wawo wenyewe.

¹⁷ Ɓasi wav̄endzewa wangu, iv̄o madza mujuao trongo zizo rangu kaɓula, namuke hashiri mwasudzilishe mwav̄ingwa ha upotevu wa waovu, mwaja mwalatsishiwa na yakini hodari yanyu.

¹⁸ Ɓadi namuhuwe hari mwa urehema na ujuzi wa Raɓi watru amma Muhuyifu Insa-Kristi. Utukufu naumuendreleye rangu av̄asa ata idahari. Amina.