2 MONYE 1 - Ha`bari Ndjema ya I Maore

Masalamu

¹ Wami Simoni Monye, murumishi amma Muv̄ingizi-Risala wa Insa-Kristi, ha wao wapara uaminifu wendza thamani moja na watru, ha uhaki wa Mungu watru amma Muhuyifu Insa-Kristi.

² Urehema na amani nazimuendreleyeni ha uwengi ha indzia ya umujua Mungu na Insa, Raɓi watru.

Namuyakinishe umuhirio na umutsahulio mwadjaãliwa

³ Ushindzi wa shiungu wahe uriv̄a piya zalazimu uhusu uhayati na ĩɓada, ha urijudza Monyewe urihira ha utukufu na uwema wahe monyewe.

⁴ Ha wizo ariv̄a zinguwahadi zendza thamani tsena zazidi uɓole zahe, ile ha wizo mukane ushirika hari mwa ihali ya shiungu yahe, mutrale umenyefu uv̄ingwao ulemenguni ha zingushauku zendza uovu.

⁵ Ha siɓaɓu ya iyo kamwe, namufanye piya djitihadi zanyu ile muengedze uwema ju la uaminifu wanyu, na ju la uwema, ujuzi,

⁶ ju la ujuzi, trongo ya udzizia, na ju la udzizia, ustahamilivu, ju la ustahamilivu, maendreleo ya ĩɓada,

⁷ na ju la maendreleo ya ĩɓada, uv̄endza wa shiunanya, na ju la uv̄endza wa shiunanya, mahaɓa.

⁸ Mana neka trongo zizo za moni hanyu, tsena zisuengedzeha, kazitsomulishani amba muke ɓila zitrendro wala mavuna hari mwa umujua Raɓi watru Insa-Kristi.

⁹ Ɓadi uwo alio amba trongo zizo kazisi hahe, waye mufa-matso, kasuona mbali; waye uɗela amba arahatsiwa madhambi ya hale yahe.

¹⁰ Ha izo wananyangu, namufanye djitihadi zaidi muyakinishe umuhirio na umutsahulio mwadjaãliwa. Mwamofanya izo, dahari kamutsopuliha.

¹¹ V̄av̄o ɗe mutsodjaãliwao ha unafasi umungilio hari mwa utawalizi wa daima wa Raɓi amma Muhuyifu watru Insa-Kristi.

¹² Iyo ɗe imana ata niliona inia ya umunahanidzani dahari trongo zini, ata iv̄o muzijuao, tsena mwahodarishiha hari mwa ikweli mulionayo av̄asa.

¹³ Nisuona amba iyo haki ya wami, wakati raha nilio hari mwa inyumba ya haima ini, nitsotse fahamu lanyu ha umunahanidzani trongo zizo,

¹⁴ mana nisujua amba tsi hale nitsoilawia, mauri ɗe inamuna Raɓi watru Insa-Kristi anijudza.

¹⁵ Na wami nitsofanya djitihadi amba neka tsilawa, mushindre munahane trongo zini kula wakati.

Rishuhudia ha yamatso utukufu wa Kristi

¹⁶ Kweli amba tsi ha uɗunga mahadisi yatrungwa ɗe ramujudzani ushindzi na umujilio wa Raɓi watru Insa-Kristi, ɓadi rishuhudia ha matso yatru utukufu wahe.

¹⁷ Mana apara ha Mungu Ɓaɓa hishima na utukufu, wakati liji lamujilia ulawa ha Mwendza Utukufu Muhu, amba: «Unu ɗe uMwana muv̄endzewa wangu, tsena wami ujiv̄iwa halisi na waye.»

¹⁸ Na liji lilo, wasi rilikia ulawa mbinguni wakati raka v̄umoja na waye hari mwa umulima mutwaharifu.

¹⁹ Na v̄anu risusika hodari zaidi urongozi washukidziwa, ulio amba mutsofanya ndjema mwamoustamia, mauri kombe liwalao v̄ahanu v̄wendza shidza, ata uku wamojosha na inyora ya alifadjiri iheye rohoni hanyu.

²⁰ Kaɓula ya kula trongo, namujuwe amba kav̄usi urongozi washukidziwa hari mwa uMuangishio amba mutru ujua aueledze waye monyewe.

²¹ Kweli amba kav̄waparoka urongozi washukidziwa ulio amba ha yamav̄endzeleo ya mwanadamu, ɓadi ɗe ha uv̄ingwa na iRoho Ndzitwaharifu, ɗe wanadamu walagua urongozi walawa ha Mungu.