2 MAKORINTIYO 9 - Ha`bari Ndjema ya I Maore

Musada ha faida ya wananya wa shi uaminifu

¹ Hari mwa yahusu umusada mbeli za uwatwaharifu, kaisina ata mana ya wami umuangishiani.

² Madza nisujua idjitihadi yanyu, ilio amba tsimusifuni nayo mbeli za Wamakadoniya|Makadoniya amba: «iAkaya|Akaya ya tayari rangu mwaha jana.» Na idjitihadi yanyu imarusa wengi.

³ Ɓasi nisuv̄eleha uwananya wa shi uaminifu, ile udziɓua yatru raifanya umuhusuni, usuparihanihe truv̄u hari mwa itrongo iyo, ɓadi muke tayari mauri ɗe iheli nairongoa,

⁴ ile yasuke amba neka Wamakadoniya wasuniɗunga, ɓasi kawamuparani tayari, rasupatswe na aĩɓu, neka tsisurongoa amba aĩɓu yanyu.

⁵ Ha izo, tsiono muhimu nitriye ɓari wananya wa shi uaminifu wanikadimiye uja hanyu, ile washahilihe na ihishima mwaitolea wahadi, pare ike tayari amba neema, ɓadi tsi shitru farudhwi.

Mutru ataɓuo ha uwengi, uvuna ha uwengi

⁶ Namujuwe amba: Monyewe utaɓu ha ushashi, atsovuna ha ushashi, na uwo ataɓuo ha uwengi, atsovuna ha uwengi.

⁷ V̄av̄o ɓasi kula mutru nav̄e ha ikiasi ahetsi rohoni hahe, ɓila usikitifu, wala uremwa nguvu, mana Mungu uv̄endza ule av̄ao ha furaha.

⁸ Na Mungu ushindra amuv̄eni ha uwengi neema za kula namuna, pare mukane kula wakati piya zamulazimuni ha kula namuna, tsena mukane ha uwengi ya kula shitrendro ndjema.

⁹ Mauri ɗe iheli yaangihwa: «Aenedza ndjema zahe, av̄a zimasikini; uhaki wahe usuẽshi dahari.»

¹⁰ Na Monyewe uv̄a mbeu umutaɓizi na dipe amba shahula atsomuv̄ani ha uwengi mbeu, tsena atsoengedza yamavuna ya uhaki wanyu.

¹¹ Ha izo mutsotadjiriha hari mwa piya, pare muke watolezi musada wa kula namuna ha uwengi. Na umusada wanyu uwo utsov̄ingwao na wasi utsotsongesha himida ha Mungu.

¹² Mana urumishi wa mutsango uwo, tsi tu amba ususaidi hari mwa zakosea watwaharifu, ɓadi tsena usuzidisha himida zihedzewao ha Mungu.

¹³ Ha udhiɓitifu wa urumishi wanyu uwo, wao wasumutukuza Mungu ha siɓaɓu ya utuĩvu wanyu wamuv̄ingani mukuɓali ha dhwahiri iIndjili ya Kristi na ha siɓaɓu ya utolezi musada wanyu ha uwengi hawoju, na ha piya.

¹⁴ Ɗe v̄umoja na huɓa ɗe wamufanyiaoni mamilio ha siɓaɓu ya ineema Mungu amudjaãliaoni ha uwengi.

¹⁵ Mungu nahimidiwe ha ineema kaina mufano yahe.