2 MAKORINTIYO 8 - Ha`bari Ndjema ya I Maore

Ɓaulusu asutria ɓari watru wav̄e musada

¹ Wananyangu, risumujudzani ineema ya Mungu yadjaãliwa ziDjama Ndziwaminifu za Makadoniya.

² Ata ha iv̄o wakov̄irisiwa hari mwa taãɓu za kusudi, na wao wakozidi furaha hari mwa usikini muɓole wawo ata yakowav̄inga watowe musada ha utadjirifu,

³ ha inamuna wakoshindra, tsiishuhudia, ata uzidi izo wakoshindra, tsena ha uv̄endza yawo wenyewe.

⁴ Warirayi ha kusudi amba warenge fuvu hari mwa ineema ya urumishi wa utolea musada uwatwaharifu.

⁵ Wafanya zaidi rahana izo rakofikiria. Wadziv̄a raɓuzi wao wenyewe ha Raɓi, iv̄o ha wasi, ha uɗunga yamav̄endzeleo ya Mungu.

⁶ Iyo ɗe imana ramutria ɓari Titusa amba rangu aandrisa, amalidze ineema iyo hanyuju.

⁷ Mauri ɗe inamuna mwazidishiha hari mwa piya zitrongo: uaminifu, urongozi, ujuzi, djitihadi ya kula namuna, na yamahaɓa mwayapara ha ndzia yatru, namuzidishihe wajau hari mwa ineema ya urumishi wa utoa musada.

⁸ Wala tsisurongoa iyo amba ãmuri, ɓadi ha uvumbua idjitihadi ya wasalia, nisumuv̄ani ifurswa ya udhiɓitisha ukweli wa uv̄endza yanyu.

⁹ Mana musujua ineema ya Raɓi watru Insa-Kristi|Insa: waye alio amba akana utadjirifu, adzisikinisha ha tanafu yanyu, pare ha usikini wahe, wanyu mutadjirishihe.

¹⁰ Na iyo fikira ɗe nitoao hari mwa trongo iyo: iyo ndjema hanyuju, iv̄o mwaka wa handra, tsi tu amba wa urendra, ɓadi tsena wa uitsaha rangu mwaha jana.

¹¹ Ɓasi av̄asa namumalidze uifanya, pare ishitrendro ilingane na ushauku wanyu, ha ulawana na izo mulionazo.

¹² Mana ushauku muɓole wamoka, uwo ukuɓalishiha ulingana na iyo mutru alionayo, ɓadi tsi na iyo mutru kasina.

¹³ Mana ikusudi tsi ya umutriani hari mwa usongefu amba pare wasalia wav̄unguhe taãɓu, ɓadi ɗe ha uɗunga usawa.

¹⁴ Wakati mauri ɗe unu rilionawo, iyo yamuzidishani itsowasaidi na izo wakosewa nazo, ile wakati watsozidishiwao, yawazidisha itsomusaidini na izo mwakosewa. V̄av̄o v̄utsoka usawa.

¹⁵ Mauri ɗe inamuna yaangihwa: «Uwo aka angulidza nyengi kaka azidishiwa, na ule aka angulidza shashi, kakokosewa.»

Titusa asuv̄elehwa Korintiyo ha siɓaɓu ya mutsango

¹⁶ Mungu nahimidiwe, Monyewe utria rohoni ha Titusa djitihadi moja na iyo rilionayo na wanyu.

¹⁷ Mana tsi tu amba akuɓali mutrilio-ɓari watru, ɓadi asuja hanyu v̄umoja na djitihadi ɓole, tsena ha uv̄endza yahe monyewe.

¹⁸ Risuv̄eleha v̄umoja na waye umwananya wa shi uaminifu alio amba isifa yahe ha izo afanya ha tanafu ya iIndjili ienea hari mwa piya ziDjama Ndziwaminifu.

¹⁹ Wala tsi tu, ɓadi atsahulwa na ziDjama Ndziwaminifu aɗungane na wasi hari mwa ishitrendro ya rehema ini radhwaminishiwayo, ha utukufu wa Raɓi waye-waye na uv̄enua inia ndjema yatru.

²⁰ Karisutsaha rasingidziwa na mbovu yahusu umutsango muɓole unu wadhwaminishiwa urumishini hatru.

²¹ Mana djitihadi yatru ɗe ufanya ndjema, tsi tu amba mbeli za Raɓi, ɓadi tsena mbeli za wanadamu.

²² Risuv̄eleha v̄umoja na wao mwananyatru wa shi uaminifu alio amba aridhiɓitisha ha mara nyengi na trongo nyengi idjitihadi yahe. Na v̄anu tsena asuzidi uiv̄enua ha uaminifu muɓole alionawo na wanyu.

²³ Hari mwa yamuhusu Titusa, waye munyangu tsena mushangirizi wangu hari mwanyu. Na ha wananya wa shi uaminifu wasalia, wao ɗe mawakala wa ziDjama Ndziwaminifu, ha utukufu wa Kristi.

²⁴ Ha izo, mbeli za ziDjama Ndziwaminifu, namuv̄e udhiɓitifu wa uv̄endza yanyu, tsena amba rikana haki ya udziɓua mbeli zawo ha siɓaɓu ya wanyu.