2 MAKORINTIYO 7 - Ha`bari Ndjema ya I Maore

¹ Ɓasi ha iv̄o riliona wahadi mauri ɗe zini, wandzani wa roho wangu, naridzitwaharishe na kula inagisio umwili na iroho, na utsimidza utwaharifu ha wasi umuria Mungu.

Haɓari zamufurahisha Ɓaulusu

² Namuriv̄e ɓandza rohoni hanyu. Karakosa mutru atsokao yotsi, karadhulumu mutru atsokao yotsi, wala karaɗanganya mutru atsokao yotsi.

³ Wala tsi ha umunamuani ɗe nirongoao trongo zini, mana madza tsiirongoa amba mwa rohoni hatru rangu duniani ata ufaju.

⁴ Tsina uaminifu muɓole na wanyu, tsena nisujiv̄iwa ha kusudi ha siɓaɓu ya wanyu. Tsijaya mutrulidzio. Hari-hari na piya taãɓu zatru, furaha yangu isutrisa.

⁵ Mana rangu uwaswili yatru Makadoniya, karapara ata uv̄umuzi; rakosongwa ha kula namuna: v̄ondze umani, na moni faza.

⁶ Ɓadi Mungu, Monyewe utrulidza wao wapuha ɓari, aritrulidza ziroho ha umujilio wa Titusa,

⁷ wala tsi ɗe ha umujilio wahe tu ɓasi, ɓadi tsena ha umutrulidzio aupara hanyuju. Arijudza ushauku muɓole mulionawo, huzuni yanyu, na idjitihadi mulionayo na wami, ha namuna amba tsizidi ufurahi.

⁸ Wala ukana tsimutriani huzuni ha liɓarua langu, ne tsisuiona amba siɓaɓu ya ujutsa. Wala ukana tsika tsijutsu, mana nisuona amba liɓarua lile lika limutriani huzuni hari mwa mwana muda,

⁹ av̄asa nisujiv̄iwa, tsi ɗe iv̄o mwaka hari mwa huzuni, ɓadi ɗe iv̄o huzuni yanyu yamuv̄ingani mwendre toɓa. Mana muka mungia huzuni ha uv̄endza ya Mungu. Ha izo, karamudhuruni na itsokao yotsi.

¹⁰ Kweli amba huzuni ijao ha uv̄endza ya Mungu, iyo ufanya mutru andre toɓa, trongo iv̄ingao hari mwa uhuyifu, wala iyo kaitsongesha majitso, wakati ilio amba huzuni ya shi ulemengu uv̄inga hari mwa ufa.

¹¹ Namuangaliye ɓasi itrongo huzuni iyo ijao ha uv̄endza ya Mungu yamuv̄ingiani: djitihadi trini, ɓari trini ya udzieledza, kiasi trini ya utukivu, trisidzo trini, ushauku mungav̄i, huɓa trini mulionayo hari mwa iĩɓada, zifungo jeje ɗe mwav̄a! Hari mwa kula v̄ahanu, muonesa uraharifu wanyu hari mwa trongo ile.

¹² Ɓasi neka amba tsimuangishiani, tsi ha siɓaɓu ya umukosefu, wala umukosewa, ɓadi ile idjitihadi mulionayo na wasi, muv̄enushiweyo mbeli za Mungu.

¹³ Iyo ɗe imana ata rangia ɓari. Na yangina tsena ɓaanda ya umutrilio-ɓari uwo, rika rijiv̄idziwa zaidi ha ifuraha ya Titusa, alio amba iroho yahe ika itrulidziwa na wanyu piyanyu.

¹⁴ Neka amba tsidzifaharisha mwanapav̄i mbeli zahe ha siɓaɓu ya wanyu, tsaparwa na aĩɓu. Mauri ɗe inamuna ilio amba ha ukweli ɗe ralagua na wanyu, ɓasi izo raka radzifaharisha nazo zapatana na wanyu mbeli za Titusa, ziv̄enuha wajau amba kweli.

¹⁵ Na umuv̄endzani yahe isuzidi amonahana utuĩvu wanyu mbeli za piya, na heli mwaka mwamurenga ha adaɓu na hishima.

¹⁶ Nisufurahi iv̄o nishindrao nimuv̄eni uaminifu hari mwa piya.