2 MAKORINTIYO 6 - Ha`bari Ndjema ya I Maore

¹ Rangu rilio washangirizi wa Mungu, risumutriani ɓari mwasurenge ineema mwaipara hahe, mwaifanya shitru tsi yendza mavuna.

² Mana asurongoa: «Hari mwa uwakati nav̄endza tsihutakaɓali, isuku ya ukombofu, tsihusaidi.» Ɓasi wakati mwema ɗe unu, ini ɗe isuku ya ukombofu.

ziTaãɓu za Ɓaulusu hari mwa urumishi wa Mungu

³ Wasi karisuv̄a ata mutru siɓaɓu itsokao yotsi ya umukwalisa, pare ihazi ya urumishi yatru yasuparihwane na kosa.

⁴ Ɓadi ha kinyume, risudziv̄enua hari mwa kula trongo amba wasi warumishi wa Mungu: rangu ha ustahamilifu muɓole hari mwa matreso, ukosefu, usongefu,

⁵ hari mwa ziv̄ondro, ziv̄ani, mitsutsuho, ngurumwa, miɓalidzio ya tsindzi, na ndza;

⁶ hari mwa uraharifu, ujuzi, suɓira, uwema, iRoho Ndzitwaharifu, na uv̄endza wa kweli,

⁷ hari mwa umujudzio wa ikweli, tsena ha ushindzi wa Mungu, ha zizombo ziwaniao na ukingia ihaki;

⁸ hari mwa hishima na uonevu, hari mwa sifa mbovu na ndjema, uonehana amba wadangamanyifu, ata iv̄o rilio wa kweli;

⁹ mauri watru kawajulihana, ata iv̄o rijulihwanao, mauri watru wafao, ata iv̄o rilio hayi, mauri watru wav̄ondrwao, ɓadi karisuulawa;

¹⁰ mauri watru wahuzunishiha, ata iv̄o rilio rahani daima; mauri masikini, ata iv̄o ritadjirisao wengi; mauri watru kawasina itsokao yotsi, ata iv̄o riliona piya.

¹¹ Ha unafasi rilagua na wanyu Makorintiyo, rimuɓuliani roho zatru ha kusudi.

¹² Karamuɓaliani roho zatru, ɓadi wanyu-wanyu ɗe mwaɓala zanyu.

¹³ Ɓasi ha ɓadala ya v̄av̄o, nisumurongodzani mauri wana, namuɓuwe ɓole wanyu wajau roho zanyu.

uMutsanganisio wa wao waaminio na wao kawasuamini, tsi trongo yalazimu

¹⁴ Musudzitriye hari mwa mulandza moja na watru tsi waaminifu. Mana muparano trini ujuao uke ɓaina ya uhaki na uovu? Au uv̄umoja trini ɓaina ya heu na shidza?

¹⁵ Muafikiano trini ɓaina ya Kristi na Ɓelial? Fungu trini muaminifu alionalo v̄umoja na tsi muaminifu?

¹⁶ Mukataɓa trini ulio ɓaina ya iNyumba Ndzitwaharifu ya Mungu na masanamwe? Kweli amba wasi ɗe makazi matwaharifu ya Mungu alio hayi. Mauri ɗe iheli Mungu arongoa: «Nitsoketsi hari mwawo, na uendra hari mwawo. Tsena nitsoka Mungu wawo, na wao watsoka umati wangu.»

¹⁷ «Ha izo, namulawe hari mwawo, tsena mudzitenge, Mola ɗe arongoao. Musuɓambe iyo ilio nagisi, na wami nitsomurengani ha uzuri.»

¹⁸ «Wami nitsoka Ɓaɓanyu, na wanyu, hanguju mutsoka wana watruɓaɓa na watrumama, asurongoa Mola Monyewe ushindzi.»