2 MAKORINTIYO 5 - Ha`bari Ndjema ya I Maore

Makazi yarilindrao pev̄oni

¹ Mana wasi risujua amba neka liɓanga la haima lini riliketsiao ulemenguni v̄anu liangamidziwa, rina pev̄oni v̄ahanu v̄wa uketsi v̄wafanyiwa na Mungu, makazi ya daima kayafanyiwa ha yimihono ya wanadamu.

² V̄anu rilio risuulula, risutumainia ha kusudi ripindrisiwe makazi ya shi pev̄oni yatru,

³ mana ramopindrisiwayo, karitsoparihana wadzi.

⁴ Ɓaanda rilio hari mwa liɓanga la haima la shi ulemenguni lini, risuulula ha udziro wa umudzo rautrika, wala tsi amba risutsaha ritsulwewo, ɓadi ripindrisiwe inyumba ya pev̄oni ile, pare ile ilio mufa, imedzwe na uhayati.

⁵ Na Uwo aritayarisha ya umugaudzio uwo ɗe Mungu, alio amba ariv̄a iRoho ike fungu la handra la piya izo arilishiazo.

⁶ Ɓasi ha izo, wasi ha dahari rina tama, iv̄o rijuao amba pindri rilio hatru hari mwa umwili uwo, risuka mbali na Raɓi.

⁷ Mana risendra ha uaminifu, ɓadi tsi ha uona.

⁸ V̄av̄o rina tama, tsena risuona ɓorwa rilawiye hari mwa umwili, ne rike ha Raɓi.

⁹ Iyo ɗe imana wajau ata riliona nia ya umujiv̄idza, neka amba ra hari mwa umwili, au ramoulawia.

¹⁰ Mana piyasi, ilazimu riv̄ire hari mwa mahakama ya Kristi, ile kula mutru apare zamulazimu ulawana na izo azifanya wakati aka hari mwa umwili, neka ndjema, au mbovu.

Muparanisio na Mungu ha ndzia ya Kristi

¹¹ Rangu rijuao itrongo ya umuria Raɓi, risutsaha riyakinishe wanadamu. Mungu ujua inamuna yatru, tsena nisutumaini amba moni na nafusi zanyu musuijua wajau.

¹² V̄anu karisudziaminisa mbeli zanyu raha, ɓadi risumuv̄ani furswa ya udziɓua ha siɓaɓu ya wasi, ile mushindre mudjiɓu wao wadziɓuao na zile zionehanao, ɓadi tsi na zilio rohoni.

¹³ Mana neka amba rifanyiha wajinga, ɗe ha tanafu ya Mungu, na neka rina ãkili zatru, ɗe ha tanafu yanyu.

¹⁴ Mana uv̄endza wa Kristi usurifarudhisha, iv̄o riliona yakini na zini: moja afu ha faida ya piya. Ɓasi v̄av̄o piya wafu.

¹⁵ Na neka afu ha faida ya piya, v̄av̄o pare wao walio hayi wasuẽshi tsena ha faida yawo wenyewe, ɓadi ha faida ya ule afa, tsena aregezewa hayi ha faida yawo.

¹⁶ Ha izo rangu v̄anu, karisuangalia atsokao yotsi ha shiuɓinadamu. Wala ukana rakomuangalia Kristi ha shiuɓinadamu, av̄asa karisumuangalia tsena namuna ile.

¹⁷ Ɓasi neka mutru ana uv̄umoja na Kristi, v̄av̄o afanyiha shiumbe pia: za hale ziv̄iri, tsizini zilio pia zija.

¹⁸ Na piya ulawa ha Mungu, alio amba ariparanisa na waye ha ndzia ya Kristi, tsena aridhwaminisha urumishi wa umuparanisio.

¹⁹ Mana Mungu aka ha Kristi, akoparanisa ulemengu na iwaye yahe, ɓila uangalia mahosa ya wanadamu, tsena atria hatruju urongozi wahusu umuparanisio.

²⁰ Ɓasi wasi mawakala wa Kristi, na Mungu waye-waye ɗe amuhiraoni ha ndzia yatru. Risumumiani ha lidzina la Kristi, namudzilishe muparanisiwe na Mungu.

²¹ Uwo alio amba kajua dhambi, Mungu amufanya dhambi ha tanafu yatru, ile ha waye rifanyihe wendza haki wa Mungu.