2 MAKORINTIYO 4 - Ha`bari Ndjema ya I Maore

Urumishi wa Ɓaulusu na wanyahe, ɗe umujudzio amba Insa-Kristi ɗe Raɓi

¹ Ha izo, iv̄o riliona urumishi uwo ha urehema radjaãliwawo, karisupuha ɓari.

² Risuhara trongo za siri zipatsao aĩɓu; karisudziv̄inga ha udjandja, wala karisuɓuzudza urongozi wa Mungu. Ɗe ikinyume amba, ha uvumbua ikweli, risudzieleha hari mwa likoho la unamuzi wa kula mwanadamu mbeli za Mungu.

³ Neka iIndjili yatru raha ifinikiha shitamba, v̄av̄o ifinikiha ha wao wandrao waangamiye,

⁴ wao walio amba kawasuamini. Ãkili zawo ziɓalwa matso na umutawalizi wa lidunia lini, ha namuna amba wasuone umuwalio wa iIndjili ya utukufu wa Kristi, alio umufano wa Mungu.

⁵ Kweli amba tsi ɗe wasi wenyewe ɗe ridzijudzao; risumujudza Insa-Kristi amba waye ɗe Raɓi, na wasi ra warumwa wanyu ha siɓaɓu ya Insa.

⁶ Mana Mungu Monyewe arongoa: «iHeu naiwaliye ishidza», awala moni na iroho yatru, ile awalise ujuzi wa utukufu wahe Mungu hari mwa isura ya Kristi.

Dafine moni mwa ziya za ɗongo

⁷ Ɓadi idafine iyo risuiv̄inga moni hatru, wasi rilio ziya za ɗongo, ile ushindzi kauna mufano unu uonehane amba ulawa ha Mungu, ɓadi tsi hatru.

⁸ Risongwa ha kula namuna, ɓadi karatseresewa; riɓaɓanyiha, ɓadi karalawa tama;

⁹ risutreswa, ɓadi karahalwa; riuswa, ɓadi karaangamia.

¹⁰ Risuv̄inga daima moni na umwili watru ufa wa Insa, pare uhayati wa Insa uv̄enuhe wajau mwiliju hatru.

¹¹ Mana wasi rilio hayi, ha daima risuv̄elehwa hari mwa hatwari ya ufa ha siɓaɓu ya Insa, pare uhayati wa Insa wajau uv̄enuhe hari mwa umwili mufa watru.

¹² Ha izo, moni hatru ufa ɗe urendrao, ɓadi moni hanyu, ɗe uhayati.

¹³ Na ha iv̄o riliona roho wiyo-wiyo ya uaminifu na iyo yaangihwa amba: «Tsiamini, ɗe imana ata nalagua», ɓasi wasi wajau risuamini, ɗe imana ata rilaguao.

¹⁴ Mana risujua amba Uwo amuregeza hayi Raɓi Insa, atsoriregeza hayi wajau hari mwa uv̄umoja na Insa, tsena atsoritekeleza v̄umoja na wanyu mbeli zahe.

¹⁵ Piya zizo ɗe ha siɓaɓu ya wanyu pare irehema, ha uendra na ujilia indadi zaidi na zaidi ya watru, izidishe umuhimidio, ha utukufu wa Mungu.

Uẽshi ha uaminifu

¹⁶ Iyo ɗe imana ata karisupuha ɓari. Ata neka amba hatruju ɓuumbio la v̄ondze latru lisuangamia, ɓadi la moni lisufanyiha pia suku ha suku.

¹⁷ Mana zitaãɓu ndzangu za leo ziriparao, zisuridzalia ha indadi kaina mupaka utukufu wa daima.

¹⁸ Ha izo, wasi uangalia tsi ɗe zile zionehanao ha yamatso, ɓadi ɗe zile kazionehana. Mana zionehanao uv̄ira na ndzia, ɓadi izo kazionehana uka ha daima.