2 MAKORINTIYO 2 - Ha`bari Ndjema ya I Maore

¹ Ha izo, hanguju tsirenge satua amba nasumuregeyeni naja namutriani huzuni raha.

² Mana neka nisuja nimutriyeni huzuni, mbani ɗe atsonifurahishao neka tsi ɗe wanyu namutriani huzuni?

³ Tsiangiha namuna ile, pare namowaswili oho, nasutrilwe huzuni na wao walazimu wanifurahishe. Tsiyakinisha ha wanyu piyanyu amba ifuraha yangu, iyo yanyu piyanyu.

⁴ Mana v̄umoja na utungu muɓole, usikitifu wa roho, tsena na matsozi ha uwengi ɗe namuangishiani, wala tsi ha umutriani huzuni, ɓadi ile mujuwe uzidifu wa umuv̄endzani nilionawo.

Swamaha ya umukosefu hari mwa iDjama Ndziwaminifu

⁵ Neka v̄wa mutru atria huzuni, kanitria huzuni ɗe wami, ɓadi ɗe wanyu piyanyu, au nusu yanyu anga, ile nasutupe mupaka.

⁶ Shifungo mutru uwo av̄olwayo na idjama, itosho,

⁷ ha namuna amba ya ɓorwa mumuswamihi na umutrulidza, ile asuje azidishiwa na huzuni yatupa.

⁸ V̄av̄o nisumutriani ɓari mumuonese mahaɓa.

⁹ Madhumuni yangu raha ata namuangishiani, ɗe wami utsaha nidhiɓitishe neka mwa watuĩvu hari mwa piya zitrongo.

¹⁰ Na uwo mwamuswamihi, wami wajau nisumuswamihi. Namoswamihi, neka amba v̄wa trongo ya wami uswamihi, ɗe ha siɓaɓu ya wanyu mbeli za Kristi,

¹¹ ile rasumulishe Shetwani arishindra, mana risujua mipango yahe.

iMana ata Ɓaulusu kahoma Troasi

¹² Uwaswili yangu Troasi ha siɓaɓu ya iIndjili ya Kristi, tsipara amba tsiɓuliwa mulongo na *Raɓi wa umurumishia.

¹³ Ata ha izo, tsaka natrulia roho yangu, mana tsaka namupara mwananyangu wa shi uaminifu, Titusa. Ɓasi tsilaga watru v̄ale, tsilekedza Makadoniya.

Ushindrifu hari mwa uv̄umoja na Kristi

¹⁴ Himida naimuendreleye Mungu ariv̄ingao daima hari mwa umusadjadja wa yamasherehi ya ushindrifu wahe, ha uv̄umoja watru na Kristi; na tsena, ha wasi, asuenedza kula v̄ahali iharufu ndzuzuri ya umujulihwano wahe.

¹⁵ Mana amba haheju Mungu, wasi ɗe iharufu ndzuzuri ya Kristi ha wao wahuyiwao, na wao waangamiao.

¹⁶ Ha wasalia ra harufu ya ufa iv̄ingao ufa, na ha uwasalia harufu ya uhayati iv̄ingao hari mwa uhayati. Ɓasi v̄av̄o mbani ashindrao trongo mauri ɗe iyo?

¹⁷ Mana wasi karisi mauri watru wengi wafanyao ɓiashara urongozi wa Mungu; tsi jau, ɓadi ha umo warahara mbeli za Mungu, hari mwa uv̄umoja watru na Kristi, ɗe rilaguao amba watru wav̄elehwa na Mungu.