2 MAKORINTIYO 12 - Ha`bari Ndjema ya I Maore

iNida ya Ɓaulusu na umuɓa mwilini hahe

¹ Ilazimu nidziɓuwe, wala ukana kaina faida. Ɓasi av̄asa nisuja nilaguwe yahusu zinida na yimiv̄enulio nadjaãliwa na Raɓi.

² Wami ujua mutru aliona uv̄umoja na Kristi, ina maha kumi na minne, hali aka hari mwa umwili wahe, au hali kaka, wami tsisujua, Mungu tu ɗe ajuao, namuna yotsi saɓu mutru uwo ahedzewa ata mupaka uwingu wa raru.

³ Tsena nisujua amba mutru uwo, neka aka hari mwa umwili wahe au kaka, wami tsiji, Mungu asujua,

⁴ au neka aka ahedzewa pev̄oni, akia marongozi kayashindri urongolesheha, yalio amba kayaruhusiwa shiumbe mwanadamu itsokao yotsi ayarongoa.

⁵ Nitsodziɓua na mutru mauri ɗe uwo, ɓadi tsitsodziɓua na iwami yangu, neka tsi ɗe na zingulemevu zangu.

⁶ Na djeli nakotsaha nidziɓuwe, tsatsoka mujinga, mana natsorongoa ikweli. Ɓadi nisudziɓalidza nayo, pare v̄usuke mutru anihetsi uju rahana iyo aonao, na iyo anikiao nayo.

⁷ Na ha iv̄o miv̄enulio yiyo yaka ya midjuza, ha uniɓalidza wami udziɓua, tsika tsitriliwa muɓa moni na umwili, wakala wa Shetwani amba anireme, ile nasudziɓuwe.

⁸ Ha mara traru tsimumia Raɓi aitowe mbali na wami.

⁹ Na waye aniambia: «iNeema yangu isuhutosha, mana ushindzi wangu ukamiliha hari mwa ulemevu.» Ɓasi v̄av̄o nisuona ɓorwa nidziɓuwe na zingulemevu zangu, ile ushindzi wa Kristi uke hangu.

¹⁰ Iyo ɗe imana amba wami ufurahi hari mwa zingulemevu, hari mwa zinaza, hari mwa yamaondo, yamatreso na zitaãɓu ha siɓaɓu ya Kristi. Mana namoka mulemevu, v̄av̄o ɗe nikao na nguvu.

iHamu ya Ɓaulusu ha yaMakorintiyo

¹¹ Tsika tsifanyiha mujinga, na wanyu ɗe mwaka mwanitsongesha. Kweli amba ika ilazimu wanyu ɗe munisifu, mana tsaka muv̄ungufu rahana «mav̄ingizi-risala wahu» wale hari mwa itsokao yotsi, wala ukana wami tsi shitru.

¹² Ãlama ndziv̄enufu za Muv̄ingizi-Risala zihidjirisiwa hari mwanyu: ustahamilifu hari mwa piya, ãlama za midjuza, ãdjaɓu, na midjuza.

¹³ Hari mwa trini ɗe mwaka mwav̄unguha rahana ziDjama Ndziwaminifu zasalia, neka tsi amba wami tsaka djukumani hanyu? Namuniswamihi na likosa lilo!

¹⁴ Tsami tsa tayari ha mara ya raru ya uja hanyu, wala tsitsoka hari mwa lidjukuma lanyu. Mana tsisutsaha iyo mulionayo, ɓadi nisumutsahani ɗe wanyu. Wanatsa tsi ɗe walazimu wahetsiye ãkiɓa wadzaɗe wawo, ɓadi uwadzaɗe ɗe wahetsiye uwanatsa.

¹⁵ Na wami nitsotoa ha umo warahara, tsena nitsodzitoa ata iwami yangu ha tanafu yanyu. Hali neka nisuv̄iria umuv̄endzani, v̄av̄o nitsov̄endzewa ha ushashi?

¹⁶ Ɗe wajau, tsaka mudzo hanyuju. Ɓadi ha unafiki wangu, mauri ɗe namuna irongoleshehao, tsimuparani ha udjandja!

¹⁷ Hali tsimudhulumuni ha moja mengoni mwa watru nakomuv̄elesheaniwo?

¹⁸ Tsimutria Titusa ɓari aje hanyu, tsena v̄umoja na waye tsiv̄eleha umwananya wa shi uaminifu ule. Hali Titusa amudhulumuni? Hali karakoendra na roho ɗe wiyo-wiyo, hari mwa ndzia moja?

¹⁹ V̄av̄o ukiri uka amba wakati unu piya musufikiri amba risudzidifaĩ mbeli zanyu. Ɗe mbeli za Mungu hari mwa uv̄umoja na Kristi ɗe rilaguao. Na piya izo wav̄endzewa, ɗe ha umuhodarishani.

²⁰ Mana nisuria amba namowaswili, tsitsomuparani namuna natsotsaha, na wanyu tsena kamutsonipara namuna mwatsotsaha. Nisuria wami upara umani, uwivu, hasera, mitsapushiano, zilihidzo, marongo nnayi, udziɓua na fidjo.

²¹ Nisuria amba uwaswili yangu, Mwalangu Mungu asunipatse aĩɓu raha mbeli zanyu, tsena naja nahuzunishiha ha siɓaɓu ya wengi hari mwa wao waãswi nyuma hule, wala kawandra toɓa na zitrendrwa za utshafi zawo, uzindzi na shahawa mbovu zangina raha.