2 MAKORINTIYO 10 - Ha`bari Ndjema ya I Maore

Ɓaulusu asuwania urumishi wahe

¹ Wami Ɓaulusu nisumumiani ha utrulivu na uwema wa Kristi, wami nirongoleshehao amba ɓaridi namoka matsoni hanyu, na muhali namoka mbali na wanyu,

² nisumutafadalini amba wakati itsokao amba tsija, isuke amba paka nirumiye uhali mauri ɗe inamuna nionao amba itsolazimu nike mbeli za wao wafikirio amba wasi udziv̄inga ha maendreleo ya shiuɓinadamu.

³ Kweli amba ra wanadamu, ɓadi karisuwana shiuɓinadamu.

⁴ Mana zombo riwanao nazo tsi za shiuɓinadamu, ɓadi zina ushindzi ulawao ha Mungu, ile zikomowe ngome.

⁵ Risuv̄indrusa ziãkili za trambo na kula ufahari udzihedzao kinyume na ujuzi wamuhusu Mungu, tsena risuv̄inga kula fikira ifanyihe mufungwa hari mwa itrongo ya umutuĩ Kristi.

⁶ Tsena wasi ra tayari ya uv̄ondra kula shitrendrwa kaisi twaã, wakati itsokao amba utuĩvu wanyu wa mukamilifu.

⁷ Wanyu musuangalia zitrongo ha inamuna muzionao. Neka mutru ayakinisha amba waye wa Kristi, nakuɓali wajau zini: neka waye wa Kristi, wasi wajau.

⁸ Ata wala ukana amba nisuzidi mwanapav̄i udziɓua ha siɓaɓu ya iyezi Raɓi ariv̄a ya umuhodarishani ɓadi tsi ya umuangamidzani, tsitsoionea haya.

⁹ Tsisutsaha naonehana mauri nisumurisidzani ha yamaɓarua yangu.

¹⁰ Mana isurongolesheha amba: «Maɓarua yahe madziro, tsena mahali, ɓadi amoka v̄av̄o waye-waye, waye ata tsi muhodari, na urongozi wahe tsi shitru.»

¹¹ Mutru mauri ɗe uwo najuwe zini: namuna rilio hari mwa urongozi moni na yamaɓarua yatru ramoka mbali, ɗe inamuna ritsokao wajau hari mwa zitrendro ramoka v̄umoja.

¹² Karitsosuɓutu radzilinganisa au radzifanisa na ɓaãdhwi ya wao wadzisifuo wenyewe, ne ɗe iv̄o wadzirengao amba wao wenyewe ɗe ishiv̄imo, na udzifanisa na wao wenyewe, wao ukosewa na ãkili.

¹³ Wasi v̄atru, karitsotupa mupaka ya udziɓua, ɓadi ritsorenga shiv̄imo ha uɗunga yimipaka ya urumishi Mungu arihetsia, mipaka yilio amba yiriwaswilisha hanyu.

¹⁴ Ha izo, karisutupa mupaka mauri amba karawaswili hanyu, mana kweli amba rija ata mupaka hanyu na iIndjili ya Kristi.

¹⁵ Wala karisutupa mupaka ya udzisifu na hazi zafanyiwa na wangina, ɓadi rina tama amba neka uaminifu wanyu usendra na uengedzeha, ɓandza la urumishi latru hari mwanyu lizidi uengedzeha, wala tsi ha utupa mupaka ralishiwa,

¹⁶ ha ujudza iIndjili hari mwa yimikaɓala yav̄iria hanyu, ɓadi tsi ha udziɓua hari mwa izo madza zafanyiwa v̄ahanu v̄walishiwa mutru wangina.

¹⁷ Mutru adziɓuao, nadziɓuwe na Mola.

¹⁸ Mana tsi ɗe ule adzisifuo ɗe akuɓalishihao, ɓadi ɗe ule Raɓi amusifuo.