2 MAKORINTIYO 1 - Ha`bari Ndjema ya I Maore

¹ Wami Ɓaulusu, Muv̄ingizi-Risala wa Kristi-Insa|Kristi ha yamav̄endzeleo ya Mungu, na umwananya wa shi uaminifu Timutausu, risumuangishiani wanyu iDjama Ndziwaminifu ya Mungu ilio Korintiyo, v̄umoja na piya maaminifu walio hari mwa iAkaya|Akaya kamili.

² Urehema na amani zalawa ha Ɓaɓatru Mungu na Raɓi Insa-Kristi, nazimuendreleyeni.

Marongozi ya umuhimidia Mungu

³ Naɓarikishihe Mungu amma Ɓaɓa wa Raɓi watru Insa-Kristi, Ɓaɓa wa kula rehema amma Mungu wa kula mutrulidzio.

⁴ Waye ɗe aritrulidzao hari mwa piya taãɓu zatru, ile ha umutrulidzio riuparao wasi v̄atru walawa ha Mungu, rishindre ritrulidze wao walio hari mwa kula namuna ya taãɓu.

⁵ Kweli amba mauri ɗe iheli matungu ya Kristi yazidishihao hatruju, ɗe inamuna iyo wajau mutrulidzio watru uzidishihao ha indzia ya Kristi.

⁶ Neka ra hari mwa taãɓu, ɗe ha umutrulidzio wanyu na ukombofu wanyu; neka ritrulidziwa, ɗe ha siɓaɓu ya umutrulidzio wanyu utsomuv̄ingaoni ata mustahamili hari mwa matungu ɗe yao-yao na yatru.

⁷ Na itama yatru yamuhusuni ya hodari, mana risujua amba neka musurenga fuvu hari mwa yamatungu, musurenga fuvu wajau hari mwa umutrulidzio.

⁸ Kweli amba karisutsaha yaka amba kamwajua, wananyangu, zitaãɓu raziona hari mwa liɓavu la Aziya. Rika risongwa ha kusudi ata yakov̄iria zinguvu zatru, ha namuna amba rika rilawa tama ya uɓaki hayi.

⁹ Hatruju wasi, rakodziona amba watru wahukumulwa waulawe, ile rasuhetsi tama yatru hatruju, ɓadi ha Mungu aregezao hayi uwafu.

¹⁰ Waye ɗe arikomboa na ufa mauri ɗe uwo, tsena atsorikomboao nawo raha. Kweli rihetsi tama yatru haheju, tsena rina tama amba atsorikomboa raha.

¹¹ Wanyu-wanyu musurisaidi wajau ha yamamilio yanyu. Ha izo, wengi watsohimidia ha siɓaɓu ya wasi na ineema radjaãliwa, yaparihwana ha mamilio ya wengi.

iMana Ɓaulusu ahetsi musafara wahe wakati wangina

¹² Mana ingazi ya udziɓua yatru ɗe ushahidifu wa inafusi yatru amba ridziv̄ingi ulemenguni v̄anu, na hususwani mbeli zanyu, hari mwa uraharifu na ukweli zilawao ha Mungu; ɓila tsi amba ha hikima ya shiuɓinadamu, ɓadi ha urehema wa Mungu.

¹³ Kweli amba wasi karisumuangishiani trongo zangina neka tsi ɗe zizo muparao musome, tsena muzielewe. Na wami nisutumainia amba mutsoelewa ha ukamilifu,

¹⁴ mauri ɗe inamuna madza mwaelewa ha pindri, amba wasi ɗe isiɓaɓu ya udziɓua yanyu, na wanyu yatru, hari mwa iSuku ya Raɓi watru Insa.

¹⁵ Ɗe hari mwa iyakini iyo ɗe naka naãzimia nije raɓuzi nimuoneni, ile mupare muneemeshehe mara ya v̄ili.

¹⁶ Tsika tsihetsi niv̄ire hanyu namwendra Makadoniya, amwesa namolawa oho, niregeye hanyu, ile munirengeledzeye umusafara wa uendra Yudeya.

¹⁷ Hali iv̄o narenga satua iyo, v̄av̄o tsakana yakini na itrongo nakotsaha niifanye? Au amba ãzima nizirengao za shiuɓinadamu ha namuna amba «Ewa» amma «Ãhã» wami uzirongoa wakati ɗe uwo-uwo?

¹⁸ Mauri ɗe ikweli amba Mungu waye muaminifu, marongozi ramujudzaniwo, yao tsi «Ewa» amma «Ãhã» wakati ɗe uwo-uwo.

¹⁹ Mana uMwana wa Mungu, Insa-Kristi, waye alio amba rimujudza hari mwanyu, yaãni wami, Silasi na Timutausu, waye kaka «Ewa» amma «Ãhã», ɓadi haheju «Ewa» ɗe ilio.

²⁰ Mana piya zinguwahadi za Mungu, «iEwa» yazo uparihana haheju. Iyo ɗe imana wajau ata ha ndzia yahe rirongoao «iAmina», pare Mungu atukuzihe.

²¹ Na Monyewe urihodarisha wasi na wanyu hari mwa uv̄umoja na Kristi, tsena aritsahua na uridhwaminisha, ɗe Mungu.

²² Waye ɗe aritria umuhuri wahe, tsena waye ɗe atria rohoni hatru iRoho, ile ike fungu la handra la izo arilishia.

²³ Wami nisumurenga Mungu shahidi hari mwa uhayati wangu amba ɗe ha umuɓaliliani ɗe tsaregea Korintiyo.

²⁴ Tsi amba ritsaha ritawaliye uaminifu wanyu, ɓadi ra v̄umoja hari mwa ushangirifu ile mukane furaha, iv̄o mulio wahodari hari mwa uaminifu.