1 YUHANI 2 - Ha`bari Ndjema ya I Maore

¹ Wanyu wana wa shi uaminifu wangu, nisumuangishiani zini ile pare mwasuãswi. Ɓadi neka mutru aja aãswi, rina mudailizi mbeli za Ɓaɓa, waye Insa-Kristi, alio wa haki.

² Waye-waye ɗe lisadaka liripariao muswamaha madhambi yatru, wala tsi ɗe yatru tu ɓasi, ɓadi wajau na ya ulemengu kamili.

Ãmuri ya hale, tsena ya av̄asa

³ Na ha ini ɗe rijuao amba risumujua: ɗe wasi usika ãmuri zahe.

⁴ Monyewe urongoa amba asumujua ɓila usika ãmuri zahe, waye munafiki, na ikweli kaisi haheju.

⁵ Ɓadi mutru asikao urongozi wahe, uv̄endza wa Mungu ha kweli uswafishiha haheju. Ha ini ɗe rijuao amba ra hari mwa uv̄umoja na waye:

⁶ ɗe amba uwo arongoao amba a hari mwa uv̄umoja na waye, alazimu adziv̄inge mauri ɗe inamuna waye adziv̄inga.

⁷ Wanyu wav̄endzewa wangu, ini tsi ãmuri pia ɗe nimuangishiaoni, ɓadi ãmuri ya hale mwakanayo rangu mwandro. Ãmuri ya hale ini ɗe urongozi mwaukia.

⁸ Ata wala ukana, ini ãmuri pia ɗe nimuangishiaoni, trongo ilio kweli haheju, amwesa na hanyu, mana ishidza isulawa, na iheu ya kweli madza isuwala.

⁹ Mutru arongoao amba a heuni, ne asuenga munyahe, v̄av̄o raha a shidzani.

¹⁰ Mutru av̄endzao munyahe, uɓaki heuni, na haheju kav̄uka siɓaɓu ya umukwalisa.

¹¹ Ɓadi mutru aengao munyahe, a shidzani. Asendra hari mwa shidza, tsena kasujua v̄ahanu andrao, mana shidza imuulu yamatso.

Musufunganise roho zanyu na ulemengu

¹² Nisumuangishiani wana wangu, mana madhambi yanyu yaswamihiwa ha siɓaɓu ya lidzina lahe.

¹³ Nisumuangishiani wanyu maɓaɓa, mana musujua uwo alio rangu mwandro. Nisumuangishiani mashaɓaɓi, mana mushindri uMovu|Movu.

¹⁴ Tsimuangishiani wanyu wana, mana musumujua Ɓaɓa. Tsimuangishiani wanyu maɓaɓa, mana musumujua uwo alio rangu mwandro. Tsimuangishiani mashaɓaɓi, mana wanyu wahodari, mana urongozi wa Mungu usuketsi hanyuju, amwesa mushindri uMovu.

¹⁵ Mwasuv̄endze lidunia, ɓila zilio duniani. Neka mutru asuv̄endza lidunia, uv̄endza wa Ɓaɓa kauka haheju.

¹⁶ Mana kula ilio duniani, mauri ngushauku mbovu za shimwili, utumainivu wa matso, na udzifaharisha na mali, izo piya kazilawa ha Ɓaɓa, ɓadi ha lidunia.

¹⁷ liDunia lisuv̄ira, na ngushauku zalo wajau. Ɓadi monyewe ufanya mav̄endzeleo ya Mungu, waye uɓaki dahari.

Mufahamisho kinyume na Makanyusha-Kristi

¹⁸ Wana wangu, ini ɗe isa ya mwiso. Mauri ɗe inamuna mwakia amba v̄wa Mukanyusha-Kristi ajao, ɓasi v̄anu v̄uhimi makanyusha-Kristi wengi. V̄av̄o risujua amba ini ɗe isa ya mwiso.

¹⁹ Walawa hatru, ɓadi kawaka watru watru. Na djeli waka watru watru, itsoka amba waɓaki na wasi. Ɓadi walawa, ile iv̄enuhe amba tsi piyawo walio watru watru.

²⁰ Ɓadi wanyu mudjukumisiwa na uMutwaharifu, tsena piyanyu muna ujuzi.

²¹ Tsimuangishiani tsi amba mana kamusujua ukweli, ɓadi mana musuujua, tsena kav̄u trambo ilawao hari mwa ukweli.

²² uMunafiki ɗe mbani, neka tsi ɗe uwo aharao amba Insa ɗe Kristi? Uwo ɗe uMukanyusha-Kristi, uwo amuharao Ɓaɓa na uMwana.

²³ Yotsi aharao uMwana, kasina wajau Ɓaɓa; uwo akuɓalio uMwana, ana wajau Ɓaɓa.

²⁴ Yahusu wanyu, ihaɓari mwaikia rangu mwandro, naiɓaki hanyuju. Neka trongo mwaikia rangu mwandro isuɓaki hanyuju, mutsoɓaki wajau hari mwa uv̄umoja na uMwana na Ɓaɓa.

²⁵ Na uwahadi ariv̄a ɗe unu, ɗe uhayati wa daima.

²⁶ Tsimuangishiani zini husuana na wao watsahao wamupotezeni.

²⁷ Yahusu wanyu, umudjukumisio mwaupara ulawa hahe, nauɓaki moni hanyu, tsena tsi paka mutru amusomedzeni; ɓadi rangu umudjukumisio wahe usumusomedzani zitrongo piya, na uwo kweli, wala tsi trambo, namuɓaki hari mwa uv̄umoja na waye, mauri ɗe inamuna uwo wamusomedzani.

²⁸ Av̄asav̄anu wana wangu, namuɓaki hari mwa uv̄umoja na waye, ile pare wakati yotsi atsov̄enuhao, rikane yakini, tsena v̄wasuke ata aĩɓu moja yariɓausa na waye suku ya muv̄enulio wahe.

²⁹ Neka musujua amba waye mwendza haki, namujuwe amba yotsi arendrao uhaki, uwo adzalishiha shi waye.