1 TIMUTAUSU 6 - Ha`bari Ndjema ya I Maore

¹ Piya wao walio hari mwa mulandza wa urumwa, nawaone umurumisa wawo amba astahiki hishima ya kusudi, ile lidzina la Mungu na umusomo watru zisuruhanwe.

² Na wao waliona warumisa waaminio, wasuwav̄ungushiye mastaha ha siɓaɓu amba wao wananya wa shi uaminifu. Ɓadi ɗe ikinyume amba nawazidi uwarumishia ha uzuri, mana wao uwafayidisha na zihazi zawo wao watru waaminio, tsena wav̄endzewa. Izo ɗe zalazimu usomedze na usariɓia.

Mifahamisho na misomo ya trambo na uv̄endza marike

³ Neka mutru asusomedza trongo zangina, tsena kasuɗunga ya marongozi ya kweli ya Raɓi watru Insa-Kristi na umusomo walingana na iĩɓada,

⁴ v̄av̄o ajaya ufahari, kasina yotsi aijuao; ana uwaɗe wa ushindrana na umani hari mwa zikauli. V̄av̄o ɗe v̄udzalishihao uwivu, mashindrano, naza, misingidzio miovu,

⁵ mashindrano kayakomo ya watru wendza ãkili zamenyeha, kawasujua ukweli, watru wadanio amba ĩɓada utadjirisha.

⁶ Kweli amba ĩɓada, iyo na faida ɓole ha uwo atoshehao na izo aliona.

⁷ Mana karav̄inga itsokao yotsi uja yatru ulemenguni, wala karishindri uv̄inga itsokao yotsi ulawa yatru.

⁸ Ɓasi neka rina shahula na nguo, izo zitsoritosha.

⁹ Ɓadi wao watsahao watadjirihe upuliha hari mwa madjereɓio, wao usikwa hari mwa utra na hari mwa ngushauku ndzijinga zendza hatwari ha uwengi, zitriao watru hari mwa uangamifu na hasara.

¹⁰ Mana uv̄endza marike ɗe umuzi wa piya zimbovu. V̄wa ɓaãdhwi walio amba ha ushauku na wizo, wadziɓausa na uaminifu, tsena wadziv̄a ngutungu ha uwengi.

Masariɓu ya Ɓaulusu ha Timutausu

¹¹ Ɓadi wawe, mutru wa Mungu, trala trongo zizo, ne uɗunge uhaki, iĩɓada, uaminifu, uv̄endza, ustahamilifu, na uwekevu.

¹² Wanilia ikondro ndjema ya uaminifu, usike uhayati wa daima ulio amba uhiriwa uke nawo, na ha uwo ɗe wafanya mukuɓalisho mwema mbeli za mazahidi ha uwengi.

¹³ Nisuhuãmurisha mbeli za Mungu av̄ao uhayati zitru piya, na mbeli za Kristi-Insa alio amba atoa ushahidifu ha mukuɓalisho mwema mbeli za Pontiusu Ɓilatusa:

¹⁴ usike iãmuri ini ɓila pandra, wala tuhuma, ata mupaka umuv̄enulio wa Raɓi watru Insa-Kristi,

¹⁵ ulio amba utsorendrwa ha uwakati wawo wahetsiwa na uMonyewe Ɓaraka amma Mutawalizi weke wahe, Mufalume wa wafalume, tsena Mola wa wamola.

¹⁶ Waye weke alio amba kafu, Monyewe uketsi hari mwa nuru kaikuruɓishiha, alio amba kav̄u mutru aparomuona wala ashindrao amuone. Hishima na ushindzi kauna mwiso nazimuendreleye. Amina.

¹⁷ Sariɓia walio tadjiri wakati wa leo wasudzione, wala wasutriye itama yawo hari mwa ngutadjirifu zilio amba kaziaminishiha, ɓadi ɗe ha Mungu ariv̄ao piya ha uwengi, ile rifurahishihe.

¹⁸ Nawarendre ndjema, wake tadjiri ha zitrendro ndjema, wake wangu wa uv̄a, tsena wakane maendreleo ya ushirika.

¹⁹ Ha izo, watsodzihetsia dafine ndjema tsena hodari ya wakati ujao, ile wapare uhayati ulio amba wa kweli.

²⁰ He Timutausu, sika trongo wadhwaminishiwayo. Dziɓause na malaguzi kayana mana yashirikisao, na mashindrano yajao ha ujuzi wa trambo.

²¹ V̄wa ɓaãdhwi, ha ufanya amba wana ĩlimu iyo, waɓauha uaminifu. Rehema naimuendreleyeni.